ХIакьинусса кьини жучIава личIи-личIисса давурттай зий бур чил билаятрал агьлу. Идарарттан бюджетрал экономия шаву мурадрай,
чил билаятрал инсантал давурттай бацIан бувну хайр бур. Амма мигрантътал давурттайн кьамул буллалиминнал щаллу дан багьлагьисса тIалавшиннарду дуссар. ХьхьичIва-хьхьичI идаралухь ягу инсаннахь дикIан аьркинссар мигрантътал даврийн кьамул бансса ихтияр.
Чил билаятраясса инсаннаща бюхъайссар зун Аьрасатнаву мукунсса ихтияр ягу патент бухьурча. Ихтияр къааьркинссар, агана чил билаятраясса инсан мудан ягу чIумуйсса Аьрасатнаву ялапар хъанай ухьурча, Аьрасатнаву пишалул кIулшивуртту ласлай ухьурча ва каникуллал чIумал зий ухьурча. Ягу мунайн жула билаятрайн элмийсса ахттаршиннарду дан ягу цайми давуртту дан оьвкуну бухьурча.
Му бакъассагу, хасъсса ихтияр дакъана чил билаятраясса инсан даврийн кьамул ан бучIиссар, агана му увкIун ухьурча Аьрасатнавун виза къааьркинсса шартIирдай, ягу му лавайсса даражалул пишакар хIисаврай зун Аьрасатнавун учIан увну ухьурча.
Къааьркинссар хасъсса ихтияр, агана мигрант пишалул кIулшивуртту ласлай очнайну дуклай ухьурча ягу му ЕАЭС-вун духлахисса хIукуматраясса ухьурча.
Мигрант даврийн кьамул уллалисса инсаннан ихтияр ласуншиврул аьрза чивчуну (Аьрасатнал МВД-лул цIакь дурсса формалий), тIайла буккан аьркинссар МВД-лул миграциялул масъаларттаха зузисса управлениялул кIанттул отделениялийн.
Агана даврийн кьамул уллай бухьурча виза дусса инсан, даврийн кьамул ансса ихтияр дакъассагу, Виваллил иширттал министерствалия ласун аьркинссар чил билаятрал инсаннайн Аьрасатнавун оьвтIисса чагъаргу.
Виза думинначIагу, дакъаминначIагу чара бакъа дикIан аьркинссар миграциялул карта. Ва дуцIин дайссар Аьрасатнал дазуй. Ванийн бувну чIумуйсса яхьунсса ихтияр дулайссар чил билаятраясса инсаннахьхьун. ХIасил, даврийн кьамул буллалийни личIи-личIисса инсантуран личIи-личIисса документирттал пакетру аьркин багьлагьиссар.
Статусрах бурувгун цинявппагу чил билаятраясса зузалт кIива бутIуйх бачIин багьлай бур:
1. Виза дуну ягу дакъа Аьрасатнавун нанисса.
2. ЕАЭС-равун духлахисса хIукуматирттая бувкIсса.
Цалчинмур категориялул инсантурал хIакъираву ми Аьрасатнавун бучIайхту даврийн кьамул буллалиминнал аьркинссар захIматрал икьрал чичин. МигрантначIа бикIан аьркинссар паспорт, чIумуйсса яхьунсса ихтияр ягу вид на жительство, захIматрал книжка, кIулшивуртту ласаврил хIакъиравусса документ, ДМС-лул (добровольное медицинское страхование) полис (мигрант даврийн кьамул уллалисса инсаннаща бюхъайссар икьрал дангу медициналул идаралущал багьлух медициналул кумаг бансса), даврийн кьамул ансса ихтияр ягу патент.
Чил билаятраясса инсан Аьрасатнаву чIумуйсса ухьурча, яхьунсса ихтияр дулайссар шанна шинайсса. Укунсса ихтиярданун кIанай дулайссар вид на жительство, агана чил билаятраясса инсан мудана Аьрасатнаву яхьуну ухьурча.
Мунал чанна-чанну шин хьуну дикIан аьркинссар Аьрасатнаву ялапар хъанай. Чил билаятраясса инсаннащал чирчусса захIматрал икьралданий му даврийн кьамул уллалиманал ккаккан бан аьркинссар патент ягу даврийн кьамул ансса ихтияр, чIумуй яхьунсса ихтияр ягу вид на жительство.
Чил билаятрая бувкIминнан даврий бацIлацIисса чIумал аьрали сияхIрай ушиврул документ къааьркинссар. ЕАЭС-вун духлахисса хIукуматирттаяминнал иш цахъи бигьассар. Сайки гайра аьрасатлувтурая куннассар вайннаясса тIалавшиннарду. Белоруссиянавасса, Къазахъисттаннаясса, Арманинавасса, Къиргъизнавасса инсантуран къааьркинссар зунсса ихтияр (ягу патент) ласлан, къааьркинссар мукунна чIумуйсса яхьунсса ихтияр. Вай даврийн кьамул буллалиминнаягу тIалав къадувайссар чил билаятрал инсан даврийн кьамул ансса ихтияр. Вай билаятирттая бувкIминнан паспорт, захIматрал книжка ва кIулшивуртту ласаврил документ, страховой полис ва миграциялул карта духьурча гьассар.
Белоруссиянава бувкIминнан ва картагу къааьркинссар.
ЕАЭС-вун духлахисса хIукуматирттал инсантуращал захIматрал икьрал чирчуну махъ, ми даврийн кьамул бувминнал шанма гьантлул дянив МВД-лул органнайн баян бан аьркинссар. Мигрант даврия лавгун махъгу, мукунма, шанма гьантлул дянив баян бан аьркинссар Виваллил иширттал министерствалийн, ми сияхIрая букьан баншиврул. Ва даву интернетрайхчIингу (электрон журалий) дан хьунтIиссар.
КIулну бикIан аьркинссар, чил билаятраясса инсан Аьрасатнавун увкIукун, му миграциялул сияхIрай ишайссар. Низамрайн бувну, чил билаятраясса инсан увкIун арулва гьантлул дянив му даврийн кьамул уллалисса инсаннал баян бан аьркинссар миграциялул сияхIрал органнайн. Иш багьсса чIумал баян бан аьркинссар ца гьантлул дянивгу.
ЕАЭС-рал хIукуматирттаясса инсантал сияхIрайн ласайссар, агана ми Аьрасатнаву зуруяр ххишаласса чIумуй бухьурча. Мунияр чIирисса чIумуй бухьурча, сияхIрай ишин къааьркинссар.
Чил билаятраясса инсантал даврийн кьамул бувми жавабрайн буцайссар:
1. Агана даврийн ухлахиманачIа зунсса ихтияр ягу патент бакъахьурча.
2.Агана му кьамул уллалиманал закондалул тIалавшиннардайн бувну мигрант кьамул ансса ихтияр ларсун дакъахьурча. 3. Агана мигрант даврийн увцусса инсаннал захIматрал икьрал дуршиву ягу руцан дуршиву миграциялул масъаларттаха зузисса кIанттул органнайн баян къабарча шанма гьантлул дянив. Цалчинсса ва кIилчинсса иширттаву дишайссар аьчIа: агьалинай 2 азарунния – 5 азарда къурушрайн дияннинсса; къуллугъчитурай – 25 азарунния 50 азаруннийн дияннинсса; идаралий – 250 азарунния 800 азаруннийн бияннинсса (ягу идара лакьайссар 14 гьантлия – 90 гьантлийн бияннин).
Шамилчинмур ишираву инсантурай дишайссар аьчIа 2 азарунния – 5 азаруннийн дияннинсса, къуллугъчитурай 35 азарунния – 50 азаруннийн дияннинсса, идаралий – 400 азарунния 800 азаруннийн дияннинсса.
АьФ-лул Налогирттал кодексрал 207-мур статьялул 2-мур пунктрай ккаккан бувну буссар инсан резидентну ци чIумал ккалли хъанахъиссарив.
Резидентнан къаккаллиссар Аьрасатнал билаятрай 183 гьантлий, 12 зурул лажиндарай ялапар къахъанахъисса инсан. Резидентътуран къаккаллисса чил билаятрал инсантуращалсса валюталул операцияртту (харж булаву) дайссар Аьрасатнаву тIиртIусса банкрал счетирдайхчIин. Мукунсса инсантуран харж кассрайхчIин булурча, идаралий аьчIа дишайссар – харжирал мукьва бутIул шанма бутIуя щала харжирайн дияннинсса, къуллугъчитурай – 20 азарунния 30 азарда къурушрайн дияннинсса. Резидентнан къаккаллисса инсаннал харжирая дугьан аьркинссар НДФЛ. Чил билаятраясса резидентътуран къаккаллисса инсантурая бугьайссар 30%, лавайсса даражалул пишакартурая тIурча – 13%.
Лажин хIадур дурссар
А. Аьбдуллаевал
