Школардая хьун аьркинссар уттизаманнул центрду

Республикалул БакIчи Владимир Васильев вай гьантрай хьунаавкьунни ДР-лул Ухссавнил территориал округрайсса муниципалитетирттаясса хъунисриннал советрал вакилтуращал.

Шикку гьаз бувсса ихтилатирттавасса агьаммур бия цIана жула шагьрурдай ва щархъаву щурущисса «100 школа» тIимур проектраясса.


З. АьбдурахIманова
Республикалий ва проект сававну чIалансса ккаккияртту хъанахъишиврия батIаврий гьарта-гьарзану бувсунни ДР-лул экономикалул ва территориал лябуккулул министр ХIажи Султановлул. Ванал бусаврийну, 2017 шинал Дагъусттаннай, цIугу бувну, тIивтIуну бур 8 школа, хъиривмур шиналгу 24 школа. Вайгу хъана­хъиссар 9700 дуклаки оьрчI ккалаккисса школартту. Гьашину тIурча, бакьин бувну бур 15800 дуклаки оьрчI ккалаккисса 47 школа.

2018-2020 шиннардий жула республикалий аьмну 104 школа бан ккаккан бувну бусса бур.
ХIажи Султановлул кIицI лавгунни, «100 школа» проект сававну, республикалул 101 школалий цIу къалачIуншиврулсса мюхчаншиврул давуртту дан бювхъушиву, 188 школалий гъилишиву ядансса давуртту дурну дур. Миннува 123 школалий, дакьин дурну, гъили щин нани дурну дур оьрчIал лажин-ка шюшинсса, кьатIув буккан­сса кIанттурдайн, 10 школалий тIалав дуллали­сса низамращал­сса медкабинетру тIивтIуну бур.

Республикалул Ухссавнил территориал округрай вай кIира шинал дянив бакьин бувну бур 47 школа.
БатIаврил ахирданий Да­гъусттаннал БакIчинал хъуни­сриннайн тапшур бунни, цала округ­райсса циняв школарттал тагьар ххал дурну, ттигу мюнпатсса цуку-цукунсса давурттив дан бюхълай бурив ккаккан.