[dropcap]В[/dropcap]ай гьантрай ПаччахIлугърал тIювалул инспекциялул хъунама Аьли Жабраиловлул Каспийскалий дунни шагьрулул къатравун гъилишиву дулаврил масъалалун хас дурсса батIаву.Муний гьуртту хьунни Каспийскаллал бакIчинал хъиривчу Заур Римиханов, шагьрулул УЖКХ-лул хъунама Камилпаша Давлатов, луртаннал щаллу баврил ва управляющий компаниярттал вакилтал.
Аьли Жабраиловлул тIимунийну, Каспийскалий захIматшиву хьуну дур къатравун гъилишиву дулаврил ва кIирисса щинал дузал баврил чулуха. Ца зурул мутталий Госжилнадзорданул идаралийн бувкIун бур сайки 200 аьрза шагьрулул ялапарлувтурая.
Му бакъассагу, Каспийскаллал чIявуквартирартту бусса къатри кIинтнийн хIадуршиврул хIакъиравусса паспортру лавсун бур, амма му гъилишиврул ва кIирисса щинал дузал баврил масъала чулийн бувккун бакъар. Заур Римихановлул бусаврийну, ГЖИ-лийн чIявуми аьрзарду чивчуну бур кугьна хьусса общежитиярттал ялапарлувтурал, миннул инженер сетру дакьин дуван къашайсса тагьарданий дур.
Камил Давлатовлул тIимунийну, шагьрулий гъилишиву дулайсса турбарду бух бувккун бур, мунийн бувну Каспийскалин итадаркьуну диркIун дур сайки 5 млн. къурушрал, муния махъ пландалийн ларсун дур гъилишиву дулайсса 15 километра турбардал бакьин бансса давуртту. Арцу сентябрьданул ахирданий дирчуну тIий, давуртту чIалну дайдирхьуну дур. ХIакьинусса кьини 40% давурттал бартдиргьуну дур. Мунияту бюхъайссар гъилишиву чIалну дуллуну дикIан ми къатравун.
ДР-лул ПаччахIлугърал тIювалул инспекциялул каялувчинал, батIаврил хIасиллу дуллай, бувсунни шагьрулий бувкIсса аьрзардал хIакъираву хъирив лаявуртту дуллантIий бушиву ва тахсирлувтал административ жавабрайн кIункIу бувантIишиву.
