Дагъусттаннал агьалинал къатравун газ буцин сиптачи хьусса, оьрму газовый промышленностьран хас бувсса, АьФ-лул ва ДР-лул Газралва навтлил промышленностьрал лайкь хьусса зузала, инженер-нефтяник, Илмуттиннул арс Насруттин Насруттиновлул чивчуну бур республикалул тарихраву хъунмасса бутIа.

---

Имара Саидова
[dropcap]Н[/dropcap]асруттин оьрчIнийва хияллай икIайсса ивкIун ур агьалинал къатравун газ буцин. Дяъви къуртал хьусса, ккашикалсса шиннардий оьрчIшиву ларгсса Насруттиннун ччянива захIматрал кьадру кIул хьуну бур. Ванал ппугу дяъвилийн лавгун, нинугу ччяни оьрмулува ларгун дур. Насруттин ва ванал чIивима уссу оьрмулул дугьара хьусса буттал ниттихун багьну бивкIун бур.

Ца ппурттуву, Нас­руттин, Избербашлив интернатрай дуклакисса чIумал, цавайннал оьвкуну, хъамалу лавгун ивкIун ур. Микку мунан ккавккун бур аьрщарава нанисса тIабиаьтрал газ ччувччуну най, гьава гъили хъанахъисса куц. МахIаттал хьуну ивкIун ур, ччувччуну нанисса газрал гъилишиву асар хьувкун.
1944-ку шинал дяъвилия мушакъатну зана хьусса буттал гьан увну ур Насруттин нефтяниктурал шагьрулун ккалли­сса Избербашливсса интернат­рай дуклан. Микку дуклакисса ппурттуву хIасул хьуну бур ванаву оьрмулул мяъна-мурадну хьусса хиялгу.

Цува хияллай ивкIсса газрал промышленностьрал элму куртIну лахьхьаву мурадрай, 1952 шинал Насруттин дуклан увххун ур Грозналлал Навтлил институтравун. 1957 шинал институтгу къуртал бувну, зий айивхьуну ур Манасрайсса шяраваллил техникалий. Амма ва цукунчIав паракьатну итлай ивкIун акъар газрацIун сукку хьусса хияллал. Му жаваблув­сса даврил дайдихьу дувансса ихтияр дулун щилчIав бакIрайн ласлай къабивкIун бур. Ванал пикрилуцIун авкьуну, хьхьичIва-хьхьичIсса кумагчину хьуну ур ванал цала ппу, Социалист ЗахIматрал Виричу, ХХII-мур партсъездрал цIанийсса колхозрал председатель Илмуттин Нас­руттинов.

1967 шинал Насруттин увчIуну ур Ленинский райондалул (цIанасса Къарабудагъккантуллал) исполкомрал председательну.
Кьадарданул кьисмат бухьунссия, му къуллугърай зузи­сса чIумал ва кIул хьуну ур личIи-личIисса шиннардий ДАССР-данул ЖКХ-лул министрну зий ивкIсса, Избербашуллал горкомпартиялул цалчинма секретарь, инженер-нефтяник Микаил Юсуповлущал. Насруттиннул пикрилуцIун авкьуну, Юсуповлул кIул увну ур ва СССР-данул Минпромгазрай зузисса махъ нанисса пишакартуращал. Даву дан ччувччуну нанисса Насру­ттиннул хьхьичI ххуллурду цив­ппа тIитIайсса бивкIун бур.

Тай шиннардий Дагъусттаннай къабивкIун бур газрал отраслилул цавагу къуллугъ. 1972 шинал Грознайлийсса цала гьалмахтурахь дан бувну бур Къарабудагъккантуллал райондалийн газ буцинсса проектрал смета. 1974 шинал кIива газораспределительный станциягу бувну, бувцуну бур газ Къарабудагъккантлив ва Кьакьащурагьун. Ва хьуссар Дагъусттаннал агьалинал тарихраву дакIний личIансса ца агьамсса ишну. Ужагъир­ттайн тIабиаьтрал газ буцаврийну инсантуран ичIура хъуннасса бигьа-рахIатшиву хьуссар. ХIакьину тIурча, Да­гъусттаннал цинявппагу шагьрурду ва зувинния лирчусса районну щаллу дурну дур газрал.

Хъунмасса захIмат бивхьуну ванал сакин дурну диркIсса «Газпром транс Газ» ООО цIанакулгу хьхьичIунну зий дур. Пенсиялийн увккун махъгу Насруттин дакI цIий ур цала щала оьрму хас бувсса идаралий. ЦIанагу ва ур «Газпромтрансгаз» ООО-лул хъунама директорнал маслихIатчину.
Декабрь зурул 20-нний Нас­руттин Илмуттиновичлул кIицI ларгунни увсса кьини. Аьдатравун багьну, Насруттин увсса кьини барча дан бучIай ванал коллегахъул, жуналистътал ва цайми-цаймигу хIурмат бусса хъамал. ЦачIанма бувкIсса хъамаллурахь Насруттиннул, цуппа ца лахIза хъамакъабивтун, буслай ур тай шиннардий республикалул районнайн ва щархъавун цува газ буцлай ивкIсса куц.