Аьбдуллул душ Султанова Жавагьи
Декабрь зурул 17-нний жуятува батIул хьунни Гъумучиял шяравасса Аьбдуллул душ Султанова Жавагьи.
Жавагьи бувну бур 1949 шинал март зурул 4-нний Гьухъалив. 1963 шинал вайннал кулпат бивзун бур Каспийскалийн. МахIачкъалалив машлул техникумгу къуртал бувну, Жавагьи зун бивкIун бур машлул давурттай.
Жавагьи бия цинявннащал хIал бавкьусса, ка-кумаг бан мудан хIадурсса, гъан-маччанах ччаву дусса хъамитайпа. ДакI-аьмал хъинсса, иминсса хасият дусса Жавагьи хIакьинусса кьинигу архIал зий бивкIминнан, кIулминнан ва цинявппагу гъан-маччаминнан дакIния къабуккантIиссар.
Жавагьи дунияллия лагаврил кьурчIишивугу кIидачIлай, жижара буллай буру душнихь Рукьижатлухь, арснахь ХIажимяммахь, ссурваврахь ва щалвагу авладрахь.
Цил гьав нурданул дуцIиннав, махъминнал оьрмурдай барачат бишиннав.
Гъумучиял
ва Гьухъаллал жямат
Альберт Къушиев
Хар-хавар бакъасса бивкIулул оьрмулул аргъираву жуяту личIи унни жяматран хъинну бусравсса Альберт Къушиев.
Хъуннасса кьурчIишиву кIидачIлай, жижара буллай буру кулпатрахь Аминатлухь, ванил уссихь Мурадлухь, ванал арсурваврахь Аьлибеклухь ва Багьауттиннухь, ссурахъу Рамазаннухь, уссурссуннайхчIинсса гъанчунахь, вайннал аьзизсса лас, куяв, ниттиуссу, ссурахъу аьпалул шаврийн бувну.
Альбертлун хъинну ххирассия шяраваллил агьлу, гъан-маччами, дустал. Ччя-ччяни ияйссия шяравун, чIахху-чIарахнан, дустуран ссайгъатругу лавсун. Гьарица шинах Ххувшаврил кьини дяъвилий ливтIусса гъанчунал суратирттащал лагайссия бивкIу бакъасса полкраву.
Альберт ия дакI хъинсса, хасиятрал авкьусса, мюхтажнан ка-кумаг бан, чIарав ацIан хIадурсса инсан. Жун ва тачIав дакIния къауккантIиссар.
РухI алжаннул ххари даннав, гьав нурданул дуцIиннав.
Читтурдал жямат
Душнил
Сайранал аьпалун
Бурувгун-буруганнин
ЧIарах дурккунни ца шин,
Нузкьунттул чIу хьутари,
Бухханссар тIий, ялугьлай.
Ниттилссих мякьнувасса
Вила ххира ссил оьрчIру
ЛивчIунни махIрум хьуну,
Утти ина къаккаклай.
Ххаллил чIаххувчунащал,
Хъунбавал ссурахъищал,
Лавгунна ина, ххирай,
ЧIимучIалттул хъаттирдай.
Вил симандалияту
Пиш такIуй чан къашайва.
КIулссиявкьай вин, ххирай,
Жугу кьабивтун, гьансса!
ПиштIи ттул зурул симан,
ЧIимучIалттул заназин,
ЗахIматну бур яхъанан
Ина бакъа дунъяллий.
Циван кьаритав, мусий,
Жагьилнува дуниял,
Циван дичин бав, ххирай,
Ххиранал бакIру хьхьичIун!
Вих аьтIийннасса нину Узу
Рамазаннул арс ХIамзаев МахIаммад
Декабрьданул 21-нний оьрмулул 66 шинаву захIматсса цIуцIаврища ххассал ан къабювхъуну, ахиратрал хьунни, ЧIяйннал шяраваллин бакъассагу, щалла Ккуллал райондалий бусравну оьрму бувтсса ХIамзахъал Рамазаннул ва СултIанхъал Ажиттаннул арс ХIамзаев МахIаммад.
ХIамзаев МахIаммад увну ур 1953-ку шинал ЧIяйннал шяраву. 1971 шинал школагу къуртал бувну, Совет Армиялуву цайва бивхьусса буржгу ххаллилну лавхъун, хъунама сержантнал чиндалуву кIура авну ур МахIачкъалалив. Дуклан увххун ур автомобиллал ххуллул техникумравун. 1976 шинал техникумрал студентътурал стройкьюкьлул командирнугу увчIуну ивкIун ур.
1977-ку шинал кьамул увну ур ДАССР-данул МВД-лул СВПУ-1 хъунама начальникну. Микку 1989-ку шинал ивтун ур опорный пунктрал инженерну.
Вай къуллугъирттай унува, дуклан увххун ур Дагъусттаннал педагогикалул институтравун индустриал факультетрайн. Дуккаву къуртал шайхту, дуллуну дур лейтенантнал чин, цувагу увцуну ур цамур къуллугърайн ДПС ОВД-лул взводрал хъунама инспекторну, 1993-ку шинал ивтссар ОБДПС-рал взводрал командирну – капитаннал чиндалущал. Ми жаваб дулайсса къуллугъирттай МахIаммадлул цува ккаккан увссар даву кIанийн дуртун щаллу дайсса пишакар ушиву.
2005 шинал къашавай хьуну, даву кьаритан багьссар.
Къашавайсса гьантрай муначIан, гъан-маччами бакъассагу, чIявусса дустал, уртакьтал ялун бухлай-буклай бия. Цува мукун унува, бусласисса хавар сий дусса бикIайва, сипатрава пиш чан къашайва. МахIаммад къашавайссаксса шиннардий, цуксса цинма захIмат хъанай бунугу, зунттал хъаннил яхIгу, къириятгу, ичIаллил лази-лакьавугу, МахIаммадлухсса аякьагу, чан хьун къадиртссар ххаллилсса тухумрал душнил Аслил, МахIаммадлул уссурваврал – АхIмадил, Ширванинал, ссил Аминатлул.
МахIаммадлул цува зузисса идарарттал чулуха хIалал дурссар чIярусса медаллу, грамотартту, личIи-личIисса бахшишру.
МахIаммад ахиратрал шаврил дакIнийхтунусса жижарагу буллай, хъуннасса къумашиву кIидачIлай буру ванал кулпатрахь Аслихь, арс Аькраматухь, душ ПатIиматлухь, уссурвал АхIмадлухь, Ширванинахь, ссу Аминатлухь, цинявппагу ссурахъаврахь ва махъсса гъан-маччанахь.
МахIаммаддул бунагьирттал аьпа баннав. Гьав нурданул дуцIиннав.
ЧIяйннал жяматрал цIания
Шалласу Шалласуев
ДакIнийхтунусса жижарагу буллай, кьурчIишиву кIидачIлай буру бусравсса 1-мур ЦIувкIуллал жяматрахь, хаснува Рамазанов ТIажиблул агьлу-авладрахь, Бакрихъал тухум-тайпалухь, ххаллилсса лаккучу, милицанал полковник
Рамазанов АьвдурахIин ТIажиблул арс
ахиратрал шаврийн бувну.
Бунагьирттал аьпа баннав! Гьав нурданул дуцIиннав!
ЧIяйннал жяматрал
цIания Шалласу Шалласуев
