ДуркIсса кIул хьуннин ялату лагай шин. Вана бухкIуллухун дирну 2020-ку шин. ЦIакь хьусса аьдатрайн бувну жува булукьару

 ЦIушинал байрандалийн кIункIурду дукрардал, тIясру салатIирттал буллай, ваца цIусса шин дуркIун махъ дукан-хIачIан дакъа гьантри хьунсса кунма.

ЦIушинал байрандалул хьхьу жулла чурххансса экзамен дувару жура: аьгъусса, колориярттал дурцIусса дукра, нахIу-нацIушивуртту, миннул ялун личIи-личIисса красителлу бивчусса ягу газрал дурцIусса хIачIия, хIантту-коньякру. Цукунни чурххан зарал къабиянну байран хьунадакьин? Дукиялувугу, хIачIиялувугу цумушиву дуруччирча дакъа, цамур кьяйда бакъассар.

---

* * *
ЦIусса шинал хьхьу, пикри буварча, му шинал лахъишиврийсса вайми хьхьурдардияр цикIуй личIишиву дакъасса хьхьур.

* * *
Пикри бувну сакин дувара декабрьданул 31-ннийнсса рацион. Зуйра зура къадагъа дишара дукра тарину дуван ва байрандалул хьхьуну, ваца муниннин ппалав бавкьуну бивкIсса кунма, дукралийн къабагьан. Байрандалул хьхьуну зулла хьхьичIсса кIичIулуву дукра дихьлахьи чанну, порциярттай, ваца зува ца ххирасса ресторандалуву бу­сса кунма.

* * *
Ва хьхьунусса ссупралий чIяру дувара лялиян дуван бигьами дукра, ахънилссаннул салатру.

* * *
КканпIитIирттан ва аьгъу­сса кремру дусса пирожнирдан кIанай ишла дувара ахъул­сса, миннул зул чурххангу зарал биян къабувантIиссар, байрандалул ссупралий ярг-яргсса рангругу ххи дувантIиссар. Машан ларсми кканпIитIирттал кIану ссупралий булара кьаркь ахъул­ссаннухьхьун (сухофруктырдахьхьун).

* * *
Колбасарттан, сосискарттан кIанай салатирттавун ва укунна ссупралий ишла дувара дикI.

* * *
ЦIусса шинал ссупралий чIявучичIа дикIайсса оливье салатравун колбасалун ягу дикIун кIанай аьнакIул ягу индюшкалул дикI ишла дуварчагу, хъиннува хъинссар.

* * *
Ттучаннаясса газировкарттан ва ранг-рангсса сокирттан кIанай («натуральный» тIий чивчунугу), ишла дувара шарда дурсса компотру ва морсру. Шарда дурми хIачIиярттал зул ссупра хъиннува чIюлу бувантIиссар, анжагъ бакIрал ня ва фантазия цахъи щурущи буванни бусса.

* * *
Майонез ишла къадурну салатру дуван къабигьар. Амма, карчI къадурну, дувара зура майонез, ттучандалия ларсмурнияргу тIиндалул нахIусса, цIуллу-сагъшиврунгу, хайр бакъа, заралгу бакъасса.
Майонезран кIанай ишла дувара ххуйсса ххяххиялул аьгъу­шиву, шарда дурсса соусру, барт, накьлил уртту дирчуну ва лимондалул сокрал кIунтIру бувтIуну нахIу дурну.
Майонез дакъа бучIи хъанай бакъахьурчагу, щалва пачка бачIва къабувну, шайссаксса чанну дирхьуну щаллу хьунмур бара.

* * *
Градусру думи хIачIияртту дурагу ишла къадурну щаллу шайсса иш бакъахьурча, му хьхьуну ца журалулми хIачIира, вагу, тагу хIала къадакьлай, мигу – чIяру къадурну, 1-2 бокал. ХIачIаймургу дачIрасса ххю­ттуйн махIачIари. ХIачIиялуву хайр бумунин ккаллину дур кьаркь чахир, мигу – чанну.

* * *
Чурххан вари чинсса зарал, зиян бакъассар тIисса ахъул­ссаннулгума дуцин дикIан аьркинссар, цIушинал байрандалий дикIу, укуннасса кьини дикIу: гьантлун дукияра 2-4 мандарин, ца гьивч, ца хъюрт, ца банан, кIама хIаллил ахъулссаннул (ягоды).

* * *
Щаллусса кьини за къадуркуну, ахттакьуннайгу къадуркуну, думур ЦIушинал хьхьунил 12 хьувкун дукан бацIаву къатIайлассар. Дукра канан аьркинссар, байран дунугу, укуннасса кьини дунугу, чан-чанну, чIун-чIумуй.

* * *
ЦIушинал байрандалий бикIу, вайми гьантрай бикIу, чурххан заралсса дукиялул, аьнт­сса хIачIиярттал ясир буван мабацIару.

ХIадур бувссар
Бадрижамал Аьлиевал