Уттигъанну Санкт-Петербурглив хьунни гьар шинах бувайсса VIII Щалааьрасатнал даражалийсса «БучIантIимунил школа: Аьрасатнал хIакьинусса школалул къайгъурду ва хьхьичIунмай нанаврил перспектива» тIисса форум.

З. АьбдурахIманова
Гьашину «Аьрасатнал яла ххуйсса 100 школа» тIисса федерал конкурсрал лауреатну хьуну бур МахIачкъалаллал «КIулшивурттал Къатта» тIисса школагу. Вара конкурсрай «Шинал директор – 2019» тIисса хIурматрал лишандалун лайкь хьуну ур ва школалул каялувчину зузисса, ГьунчIукьатIрал шяраватусса, Юсуплул арс ТIагьиров Халипа. Ваная хьхьичIвагу жул кказитрай чивчуну буссия.

«БучIантIимунил школа» форумрал сакиншинна дувайссар ПаччахIлугърал ДумалучIасса кIулшивуртту дулаврил ва элмулул Комитетрал, Федерациялул СоветрачIасса Элмулул комитет­рал, Аьрасатнал ссузирдал Директортурал союзрал ва цайминналгу чIарахбацIаврийну.
Гьашинумур форумрай гьур­тту хьуну ур билаятрал 50 региондалиясса 150-ннийн ив­сса инсан.
«Аьрасатнал яла ххуйсса 100 школа» тIисса конкурсрал мураднугу хъанахъиссар жула билаятрайсса кIулшивуртту дулаврил идарарттал каялувчитурал ци гьунарду бурив ккаккаву, миннал цала школарттай цуку-цукунсса технологияртту, ттизаманнул шартIру ишла дуллай бурив ххал баву.

Халипа ТIагьиров барчагу уллай, чIа учин ччай бур ванангу, ванал коллективрангу ва дук­лаки оьрчIангу тIайлабацIуртту ва гихуннайгу хъуни-хъунисса хьхьичIуннайшивуртту.