Декабрь зурул 11-нний ДР-лул Миллатрал политикалул министерствалий хьунни Дунияллул халкьуннал дянивсса сурат дишаврил выставкалий гьуртту хьусса
Дагъусттаннаясса дуклаки оьрчIащалсса хьунабакьавуртту. ОьрчIру ва нину-ппу барча буллалисса ихтилатру бунни миллатрал политикалул министрнал цалчинма хъиривчу Гьарун Давыдовлул, Москавливсса Дагъусттаннал вакилханалучIасса Жяматийсса советрал комиссиялул председатель ПатIимат Расуловал, Дагъусттаннайсса выставкалул сакиншинначи Муслим Хавчаевлул.
А. Аьбдуллаева
Октябрь зурул ахирданий Москавлив Миллатирттал къатлуву Дагъусттаннал вакилханалул кабакьулийну хьуссар «We are the World» («Мы – это Мир») тIисса цIанилусса выставка. Дагъусттанная выставкалий гьуртту хьуна 5-6 школалиясса (захIматсса азар дусса, чIу ххуйну къабаяйсса, чаннал ссуссукьушиву дусса школардал, мукунма гьунар бусса оьрчIансса ва искусствалул школардал) дуклаки оьрчIру.
Выставкалий дирхьуну дия мукунна Германнавасса, Франциянавасса, Украиннавасса, Белоруссиянавасса дуклаки оьрчIал суратру.
Дагъусттанная выставкалий дия 24 сурат. Цинярдагу Москавливсса выставкалий диркIсса давуртту тIайла дуркссар Франциянавун, Парижливсса «Пежо» салондалуву нанисса Дунияллул халкьуннал дянивсса V-мур выставкалийн. Жюрилул, личIи къабувну, цинявппагу автортуран дуллунни Гран-При. Дагъусттаннал дуклаки оьрчIал дирхьусса караматсса суратру ххуй дирзунни цинявппагу тамашачитуран ва жюрилун.
Миллатрал политикалул министерствалий хьусса мажлисрай выставкалий гьуртту хьусса цинявппагу оьрчIан буллунни дипломру ва бахшишру.
Дипломру лавсминнавух бия жула лакку оьрчIругу: Узалов Сурхайхан (7 шин), Хавчаева ХIурия (7 шин), Оьмариева Алина.
ОьрчIан наградартту дуллуну махъ сакиншинначитурал барчаллагь увкунни цинявппагу нитти-буттахь ва оьрчIру хIадур буллай бивкIсса учительтурахь.
