Декабрьданул 12-нний ДР-лул БакIчи Владимир Васильевлул республикалул ялапарлувтурахь барча дунни Аьрасатнал Федерациялул Конституциялул Кьини.
«Барча тIий ура зухь паччахIлугърал байран – Аьрасатнал Федерациялул Конституциялул Кьини!
Гьанумур закон кьамул даврил хъуннасса мяъна диркIссар Аьрасатнал паччахIлугъ цIакь даврил, билаятрал цашиву ва суверенитет сахла даврил, демократиялул чулийсса дахханашивуртту хьун даврил, граждан общество цачIун баврил ххуллий.
Агьалинал кьянкьасса бияла чIалачIи бувну, Конституциялул баян бувссар инсаннал ихтиярду ва тархъаншиву лавайсса даражалул ххазинану хьушиву, му хьуссар инсаннал лайкьсса оьрму бутаврин архIалсса шартIру дузал даврил цIакьсса гьануну.
Ми мурадру хIакьинусса кьинигу хъанахъиссар жунма яла хьхьичIунмину. Агьалинал кабакьаврийн чул бивщуну, республикалий дуллай буру коррупциялийн данди бацIаврил давуртту, жяматийсса идарарттащал, политикалул партиярттащал ва депутатътуращал цачIу сакин дуллай буру бюджетрал арцу мюнпатну харж даврил ялув бацIайсса система.
Инсантурал оьрмулун архIалсса шартIру дузал даврин хасъсса Конституциялул хIужрарду иширайну бартбигьлай бур «Ттул ххуллурду», «Шагьрулул къулайшивурттащалсса кIанттурду», «Ттул щин», «100 школа» тIисса республикалул проектирдаву.
Цинявннан чIа тIий ура цIакьсса цIуллушиву, узданшиву, цIу-цIусса тIайлабацIуртту ва хьхьичIуннайшивуртту, Дагъусттан ва Аьрасат тIутIайх бичаврил цIаний», — тIий бур барча баврий.
