[dropcap]В[/dropcap]анал оьрчIшиву тIайла дарцIуну дур тай бала-хатIасса, чIявуссаннал оьрмурдан оьссану хьусса дяъвилул шиннардийн.
Амма му бигьа бакъасса оьрмулул ххуллу ванал бивтун бур сивсуну, сайки гьарцагу шаттирацIун хьхьичIунмайсса хъит ххину, лябукку буну. Цанма тIабиаьтрал сахаватну буллусса гьунар ванал, бугу-бурувччуну, ишлагу бувну бур дуккаврил ва элмулул ххуллий.
Буттал шяраву, Ккулув, мяйва классрал школагу бувккуну (та чIумал райондалий къабивкIссар цавагу дянивмур даражалул школа), 1945 шинал ХIажикьурбаннул арс Буржунов Гьарун увххун ур Гъумучиял педагогикалул училищалул 2-мур курсирайн. Мугу хьхьичIунну къуртал бувну, ларсун дур байбихьулул классирттал учительнал специальность. Муния махъ, армиягу лавхъун, 1953-ку шинал увххун ур дуклан Дагъусттаннал паччахIлугърал педагогикалул институтрал филологиялул факультетрайн ва, 1957 шинал мугу ххаллилну къуртал бувну, мукьра шинал мутталий оьрус мазрал ва литературалул дарс дихьлай ивкIун ур Ккуллал дянивмур даражалул школалий.
1960-ку шинал, цавувасса гъирагу, потенциалгу чIалай, Гьарун увххун ур Москавуллал Педагогикалул элмурдал академиялул аспирантуралувун, «Национал школардай оьрус мазрал дарс дишаврил методика» тIисса специальностьрайн. 1963-ку шинал цIанихсса аьлимчу-лингвист Е.А. Бокаревлул каялувшиврулу дурурччуну дур кандидатнал диссертация. 1976-ку шинал ххаллилну дурурччуссар докторнал диссертациягу.
1963-ку шиная шинай, хIакьинусса кьинилийн ияннин, Гьарун Буржунов зий ивкIссар Дагъусттаннал педагогикалул институтраву (университетраву) – 55 шинал мутталий.
Ххишала акъа итххявхсса, чантI увкусса специалист, аьлимчу машгьур хьуссар лингвистикалул дунияллий ва бартбивгьуссар хъинну чIявусса мурадру, чирчуну, чивун дуккан дурссар 200-нния лирчусса элмийсса давуртту, миннувух – 40 лу (монографияртту, учебникру). Ванал кIунттила дурксса давуртту чялишну ишла дуллайгу буссар дарс дишаврил методикалуву.
Гьунар ххисса лингвист, аьлимчу-методист, профессор Гьарун Буржунов жула Дагъусттаннал ца яла машгьурсса педагогикалул вузраву зий ивкIссар оьрус маз дишаврил методикалул кафедралул хъунаману, филологиялул факультетрал деканну. Ванал хIадур увссар 4 доктор ва 36 элмурдал кандидат, увчIуну ивкIссар Докторнал диссертация дуруччайсса советрал председательну. Ва ивтун уссар А.Л. Тахо-Годил цIанийсса элмийсса хъиривлаявурттал педагогикалул мазрал секциялул председательнугу.
ХIасил, Гьарун Буржуновлул цала оьрмулий бартбивгьуцири элмийсса иширттал диапазон муксса гьарза-гьартасса ва авадансса дурхха, ччима бунияласса аьлимчунал дахIалай чинссар.
Ванал кIунттила дурксса давуртту, басмалий рирщуну, итадаркьуну дуссар Аьрасатнал ва СНГ-лул чIявусса шагьрурдай, миннул диялсса тIалавшин дуссар студентътурал, преподавательтурал, методистурал ва лингвистурал дянив.
Дагъусттаннал филологиялул патриарх увсса кьинигу барча дуллай, чIа тIий буру Гьарун ХIажикьурбановичлун цIуллусса шинну, цала буцириннаясса ххаришивуртту!
Рашидат Халидова,
филологиялул элмурдал
доктор, профессор
