Декабрь зурул 13-нний МахIачкъалалив Къумукьнал театрдануву хьусса «Жу дурурччуссар дакьаву ва халкьуннал цашиву» 

тIисса регионнал дянивсса хъаннил форумрай хIасиллу дунни Дагъусттаннайн ххявхсса дунияллул террористътал ххит бувну 20 шин бартлагаврин хасну республикалий дуллай бивкIсса давур­ттал. Форумрал сакиншинначиталну хьунни Республикалул Миллатирттал политикалул министерство ва Дагъусттаннал Хъаннил союз. Шикку гьуртту хьунни СКФО-лул хъаннил жяматийсса идарарттал вакилтал, муниципал дуккаврил, культуралул ва искусст­валул ишккаккулт.

---

Имара Саидова
Дагъусттаннал БакIчи Владимир Васильевлул чулуха хъами барча буллалисса адрес дур­ккуна Республикалул миллатирттал политикалул министр Энрик Муслимовлул. Цаламур чулухасса ихтилатравугу ванал кIицI лавгуна республикалийн ярагъуннищалсса къачагътал ххявхсса нигьачIисса ппурттуву Дагъус­ттаннал хъаннил дунияллий дакьаву ва халкьуннал цашиву дуруччаву мурадрай тамансса захIмат бивхьушиву.
Дагъусттаннал Хъаннил союзрал председатель Интизар Мамутаевал барчаллагь увкунни тай дяъвилул иширттаву ополчентурал ва саллатIнал чIарав бавцIусса ва кумагру буллай бивкIсса зунттал хъаннихь, душваврахь.

Форумрайн бувкIсса гьарцагу хъамитайпа дакIнийн бутлай бия тай тарихравун багьсса лахIзарду.
Ва мероприятиялий гьур­ттушинна дан бувкIун бия Аьра­сатнал субъектирдаясса хъаннил жяматийсса идарарттал вакилтал, Ингушнал, Чачаннал, Къарачай-Чаргаснал хъаннил союзирттал каялувчитал. Вайннавух бия Ханты-Мансийскаллал региондалул Ватан дуручлай аьпа­лул хьусса аьралитурал кулпатирттал советрал председатель Татьяна Владимировнагу. Ванил ца акъа-акъасса арс Антон Тихоннул, къуллугърал бурж биттур буллай, жан дуллуссар ЦIуссалакрал аьрщарай. Ванан дуллуссар Къучагъшиврул орден аьпалул хьуну махъ. Та кьини цурдагу дия Антон увсса кьинилийн тIайла дарцIуну. Хъювсулгу дурккун, нину буслай дия цилалу хъуна увну ивкIшиву арс.

— Кьура шинава цукуннугу на сивсура бучIан ттула арснал жан дуллусса аьрщи ккаккан. Цаннасса аьщун куна, айгьин къавхьуну, лавгуна ттул арс аьралуннаву къуллугъ буллан. Махъату кIул хьуна мунал цалва хIарачат бувну бивкIшиву спецназрайн (Армавирдал) агьансса. Сентябрь зурул 5-нний 1999 шинал генерал-полковник В.Г. Казанцевлул хIукмулийн бувну, Антон цала частьравух гьан увну ия Дагъусттаннайн. Та ца частьрава ливтIуссар 34 саллатI. Тания шихунмай на ттунма нава багъишла битан хъанай бакъара ттущава ттула арс уруччин къашаву.

Дагъусттаннал аьрщарай жу хIурмат-кьиматрай кьамул бунну. МахIаттал хьунна, нава арсначIан чичлай бивкIсса чагъардува яхьуну бушиву кIул шайхту, — увкунни Татьяна Владимировнал.
Хъирив сахIналийн бувккуна ТIюхчардал шяраву оьрус миллатрал саллатI боевиктураща ххассал уллай бивкIсса Табиева АьтIикатлул душ ва ванил кIиягу арс. Цищава АьтIикIатлуща тIурча, къашавай буну, бучIан къавхьуну бия. ДакIнийн бутанну, аьралитал бусса БМП боевиктурал пIякь учин бувсса чIумал, щавурду дирсса Алексей Палагаев ливхъун ивкIшиву чIаравсса АьтIикIатлул къатравун. Цила кулпатран, оьрчIан хъуннасса нигьачIавугу дунура, АьтIикIатлул хIарачат бу­ссар Алексей кIучI уллай. Амма боевиктуран му лявкъуссар. Му чIумалгу АьтIикIат, нигьа къабувсун, Алексей миннахьхьун къауллай, на ванал ниттийн лажин цукун дугьави тIий, боевиктурал хьхьичI кьянкьану бавцIуну бивкIссар.
Форумрай мукунма дакIнийн бивчуна Беслан, Къизлар, Буйнакск, Каспийск, Волгодонск, Волгоград, Москав шагьрурдай теракт сававну хьусса оьз­рурдугу.

Барчаллагьрал чагъарду ва ХIурматрал лишаннал наградартту дуллунни миллатирттал дянивсса дусшиву цIакь даврил ххуллий хъин-хъинсса давуртту дурсса хъаннин.
Чувшиврул орден дуллунни ЦIуссалакрал райондалий дяъви най бивкIсса ппурттуву, оьр­мулун нигьачIаву дунагу, связьрал даву, дацIан къариртун, зузи дурну бивкIсса Полина Халилован.