[dropcap]В[/dropcap]ай чаннасса тIааьнсса ссутнил гьантрай Лакку билаятрал аргъ дирзун дия, уттара дурккун дия цIанихсса Оьллаар. Вай гьантрай Лаккуйн бувкIун бия щалагу билаятрайх кIама бивщу­сса лак.

БувкIун бия дустуращал, даврил уртакьтуращал Лакрал кьини хъун дан. ХIакьинусса кьинигу кьакъабагьавай буслай бур ккавкмуния ва асар хьумуния.

---

ХIадис ХIажиев, Аьрасатнал Конституциялул судрал судья:
-Лакку билаятрай хьусса бюх­ттулсса байрандалул на ххаригу унна, махIатталгу. Цал ттигу пахругу багьунни ттула миллатрая. Лавайсса даражалий хьунни байрандалул гьарицагу лахIза. Ттул хьхьичI дарцIунни хьхьичIвасса Гъази-Гъумучиял суратру.
1919 шин – райондалий, Гъази-Гъумучиял округрай, 50 азаруннийн бивсса инсантал бу­сса чIун. Мунияр махъсса 1930-ку шин – мукунма райондалий чIявусса халкь бусса замана.
ХIакьинусса байрандалийгу чIявусса инсантал бур. Район утта­ра дурккун дур, шиккун оьр­му зана бивкIсса хханссар. Жула байран хъун дан, жула чIарав бацIан тиха- шиха бувкIсса бусравсса хъамалгу чансса бакъар. Вагу жула хIурмат бушиврул барашиннар. Гъази-Гъумучиял байрандалия гьарца инсан рязину, дакI ххарину гьаншиврий, ва кьини гьарнан тIааьнну дакIний личIаншиврий мукIруну ура.

Ссалам Хавчаев:
-Ва жула цIа дурксса аэродромрай – Оьллаарив на цалчин акъара хьусса. Ттун ххан бикIай лак мудангу бюхттулнийн, лахънийн кIункIу тIий бивкIсса кунма. Мунин барашинна дуллай ия байрандалий гьуртту хьун увкIсса жула летчик-космонавт, Совет Союзрал Виричу Муса Маннаровгу.
КIицI лаган, махъсса шиннардий райондалул мадара хьхьичIунмай хъит кунни. Хьунни чIярусса хъин чулийсса да­хханашивуртту, гьаз хьунни экономикалул ва социал даража. Амма уттиния тихуннай дулланмургу чансса дакъар.
ХIакьину жула байрандалийн чIявусса халкь бавтIун бур. Ттул пикрилий, ва сант ишла дурну, гихунмайсса жула масъалар­ттая, дан-дитанмуния гъалгъа бан аьркинни цачIу щябивкIун. Урувгун-урганнин 100 шингу ялун диянтIиссар. Му чIумалнингу жува цIуллуну-сагъну, гьава­сгу, гъира-шавкьгу чан къархьуну бикIан аьркинссару. 90 шин шаврил кьини гихуннайсса райондалул лахъазанттансса трамплинну хьун аьркинссар.

Сиражуттин Илиясов:
-Ххаллилсса байран хьунни. Гьарзат хIисавравун ларсун, лавайсса даражалий хIадур бувну бия байрандалул мажлис сакиншинначитурал. ЧIалай бур хъунмасса захIмат бивхьуну бушиву. Яла-яла, ттун ххуй бивзунни, байрандалуцIун бавхIуну, Гъумук тIивтIусса, личIи-личIисса заманнул лахIзарду аьч буллалисса, экспонатирттал авадансса музей. ЦIуллушиву дулуннав ва ххаллилсса даву дурсса инсантура­хьхьун, укунсса экспонатру ядурминнан.
Лакрал кьини хъун дан чIя­вусса инсантал бувкIун бия личIи-личIисса районная ва шагьрурдая. Гьарнах аякьа дансса, гьарнал хIурмат бансса чаран лявкъуну бия сакиншинначитурал.
Цинявппа ххарину, рязину бия. Лакрай дакI цIий, Лакку билаятрай ххуйсса, хъинсса давуртту дуллансса ниятрай бувкIминнан тIайлабацIу чIа тIий ура.
Лакрал аьрщарай, Дагъусттаннал аьрщарай ххарисса хавардугу, ххуйсса давурттугу чIяру хьуннав тIий ура.

Шалласу Шалласуев:
-Совет хIукумат дирхьуния махъ Дагъусттаннай цалчин сакин дурсса районни жула Лак­рал район. 1935-ку шинайнин Лакрал райондалувун духлай диркIссар Ккуллалмур районгу. Жула район Дагъусттаннай ца яла хьхьичIунмурну диркIссар хIукуматрал гьарца иширттаву. Лакрал райондалия бувкссар хъуни-хъунисса инсантал Да­гъусттаннай колхозру дуллай байбивхьусса чIумал, хьхьичIра-хьхьичI колхозру дурссар Лак­рал райондалий. Мукунма хьхьичI бивкIссару жува ду­ккавривугу.
ХьхьичIва-хьхьичI лакрал тIивтIуну бивкIссар жула халкь Щурагьату Лаккуйн биян буллансса «Лактранс» тIисса объединение.
Ххуллурду бавривугу цинярдагу Дагъусттаннал районнаву жула райондалул цимилагу хьхьичIунсса кIанттурду бувгьуну бивкIссар.
Лакрал агьалинал хъунна­сса виричушиву ккаккан дур­ссар Хъунмасса Буттал кIанттул цIанийсса дяъвилий. 50 азарунния ливчусса халкьуннава 8300 инсан (ва хъанахъиссар 16,5%) гьуртту хьуссар дяъвилий. Ва хъанахъиссар, Дагъусттаннал бакъассагу, щала Совет Союзралгу агьалинал ккал хIисав дурну яла хъунмасса процент. Ттущал Лаккуйн увкIсса аьлимчу, ттул дус ия укун саргъунну, кка­ккиялунну хIадур дурсса байран къаккаркссар тIий.
БайрандалуцIун бавхIуну жула хъуншагьрулий Гъази-Гъумук тIивтIунни жагьилтурансса парк, ххаллилсса тарихрал музей. Ккаккиялун бишинну, эбратну бия жула хъуншагьру. Пахрулул дуцIлай дия дакI. Ттул хъунмасса умуд бур уттинин райондалий дурмур дугу- дурурччуну, лайкьну гихуннай дачин данссар жагьилсса никирал тIисса.

Даниял Магьдиев:
-Ва байрандалул ххуйшивугу, мюнпат бушивугу хьхьичIра-хьхьичI муниву дия, захIматри, жапари къаувкуну, чIун дур, дакъар къаувкуну, Аьрасатнал гьарицагу мурцIнийсса лак ичIунмай, цала ватандалийн кIура баяву.
Хъунмасса хIаллай Лаккуйн къабивну бивкIми хъиннува махIаттал бувну бия махъсса шиннардий Ватандалий хьусса ххуй чулиннайсса дахханашивурттал.
Ххуйсса хIадуршинна дурну дия цинярдагу щархъал, тIивтIуну бия авадансса ссуп­рарду. Щалагу билаятрайх цIа дурксса гьалмахтал бувкIун бия Гъумукун.

Альберт Алиметов, Да­гъусттаннал медициналул университетрал ректорнал кумагчи:
-На увкIра лакрал байрандалийн жула университетрал ректор Сулайман Маммаевлущал. Лакрал райондалий на цалчин акъара хьусса. ХIакьинусса байраннив ттун хъинну ххуй дирзунни ва тIааьнну дакIний личIанссар. Вайксса халкь бавтIсса укун хъуннасса лагрулийсса байран ваксса лавайсса даражалий кIицI лаган цуксса захIмат бишин аьркинни ччарча райондалул хъунаманал, ччарча жяматрал. Вайннал лайкьну ккаккан дунни райондалул лажин.
На барча тIий ура лакрал жяматрахь ва агьамсса байран. Зул аьрщарай байранну ва ххарисса мажлисру чIяву баннав. Дуллайгу, дан бюхълайгу личIаннав!

ХIадур бувссар
Андриана Аьбдуллаевал