Цимирагу къумашиву рахIатшиврийн дуккан дурсса хIакин

ДР-лул лайкь хьусса хIакин, медициналул элмурдал кандидат, чIалачIиндарал ва пластикалул реконструкциялул хирургтурал Аьрасатнал обществалул мяйжаннугусса член,

 МухIсиннул ва СахIибатлул арс Камалов Шамсуттиннун октябрьданул 20-нний хьунтIиссия 80 шин.


Увну ур Шамсуттин 1939 шинал КIулушацIрал шяраву. Ванан кIива барз хьусса чIумал ппу увцуну ур армиялийн. Дяъвилия ласгу зана къавхьуну, 17 шинавусса ниттил, тай захIматсса шиннардий ппу акъашиву кIул хьун къабивтун, ссахчIав мюхтажнугу къаивтун, хъуна увну ур арс.
1955 шинал Гъумучиял дянивмур даражалул школагу ххуй­сса кьиматирттай къуртал бувну, увххун ур Дагъусттаннал медициналул институтравун.

Миву дук­лакисса чIумал Совет заманнай сийлийсса студентътурал кьюкьлущал лавгссия Къазахъисттаннал целиналийн. Тийх бувсса захIматрахлу лайкь хьуссия «За освоение целинных и залежных земель» тIисса медальданун ва ЦК ВЛКСМ-рал хIурматрал грамоталун.
РяхцIалку шиннардий институтгу бюхттулсса даражалий къуртал бувну, зун тIайла ув­ккун ур Лакрал райондалийн. Зий ивкIун ур цал Ккурклив, яла Гъумучиял азарханалий хирургну.

Му чIумал Гъумукун учIайсса ивкIун ур отпускалийн дунияллийх цIа ларгсса лор-хIакин, профессор Къажлаев МахIаммадхан (композитор Мурад Къажлаевлул ппу). Ла­ккуйсса къашайшалт кьамул буллай, операцияртту буллай ивкIун ур. Бан багьайминнай, цичIав харж-хурж бакъанма, операцияртту цанма чирилун буллай ия МахIаммадхан. Шамсу­ттин га зузиссаксса хIаллай, ганан кумаг буллай, чIарав ацIлай икIайсса ивкIун ур. Ванал гъирагу, бюхъу-бажаргу чIалай, МахIаммадханнул, отпуск къуртал шайхту, Шамсуттиннухь цIувххуну бур: «Лор-хIакин хьун­сса гъира бурив?» — куну. Шамсуттиннул, ххаригу хьуну, рязишиву бувсун бур. МахIаммадхан цува лавгун министрная измугу лавсун, цащала Бакуйн увцуну, цува каялувшиву дуллали­сса институтраву му касму цила багьайкун лахьхьин дурну дур.

МахIаммадханнул Шамсуттиннун цала давриву ишла бай­сса инструментирттал бувцIусса чемодан пишкаш бувну бур ва му бусраврай ябуллай ивкIун ур. Шамсуттин МахIачкъалалив увкIун, цаппара хIаллай зийгу ивкIун, увххун ур Москавлив аспирантуралувун. Дугу-дуклай, зугу-зий кIира шин ва дачIиннул дянив чирчуну диссертация, 1969 шинал ххаллилну му дурурччунугу дур. Москавлия увкIун махъ Шамсу­ттин Дагъусттаннал университетраву хIакиншиврул дарс дихьлан ивкIун ур ва МахIачкъалаллал кIилчинмур азарханалий вичIай, майрай, кьакьарттуй операцияртту буллай ивкIун ур. 1971-73 шиннардий Шамсуттин ивтун ур Дагъусттаннал курортирттал управлениялул хъунаману, ми­кку зузиссаксса хIаллай дурну дур диялсса ххуйчулиннайсса давурттив.

1974-ку шинал МахIачкъалалив муххал идаралул цIусса больница тIивтIукун, лор отделениялул хъунаману ивтун ур. ЦIу бутIуй цичIар дакъасса отделение, хъирив излай, тIалав дуллай аьркин­сса аппаратура, медициналул инструментру, гьарца аьркинмунил щаллу бувну бур. Шамсуттиннул цIа шагьрулий машгьур хъанан диркIун дур. ВаначIансса бухху-букку гьарза хъанан бивкIун бур. Шамсуттин хъунмасса хIаллай парторганизациялул секретарьнугу ивкIун ур. Ванал кабинетрал чIира чIюлу бувну бикIайва ванал хIалал дурсса грамотар­ттал, дипломирттал барчаллагьрал чагъардал.

Цала пишалул даража лавай баву мурадрай ва цимилагу лавгун ур чил хIукуматирттайн: Германнавун, Чехословакиянавун, кIул хьуну ур машгьурсса пишакартуращал. Аьрабусттаннал билаятрай Яманинал республикалул Таиз тIисса шагьрулийгу зий уссия Шамсуттин.
Оьрму рахIму бакъасса бур, яла язими, яла гьунар буми яла лавгун, миллат мискин шай.

Цума-цаннангу Заннал итабакьай цанмасса оьрмулул бутIа. Шамсу­ттиннун къабуллуну бур лахъину оьрму бутансса мутта. Лавгунни дунияллия, дуллалисса давур­ттивгу кьариртун. Учайхха, аьрщи лаллай, чIун най, дакIнил къюву хьхьара шайссар куну. КъакIулли та хьунтIиссарив!
Авадансса дакIнил заллу, яхI-къириятрал виувцIусса зун­ттал чув, чIявусса инсантуран ххуй-хъиншивуртту дурсса, цIу­ллушиву зана дурсса, цимирагу къумашиву рахIатшиврийн дуккан дурсса инсанъя Шамсуттин.

Ссурахъу Нажбуттин,
ш. КIулушацI