ХIанапил арс ХIанапиев АхIмади
Уттигъанну Вихьуллал шяраву хьунни инсантурал дакIурдивун къюву дуллусса, куртIсса щаву кьадиртсса иш, ахиратравун лавгунни ХIанапил арс АхIмади.
Ва уссия ччима адаминал цала уссуну чIа чинсса, бунияласса зунттал инсаннал хасият дусса чув.
АхIмади увссар 1960-ку шинал декабрь зурул дайдихьулий Вихьуллал шяраву, ХIанапихъал кулпатраву. 1978-ку шинал къуртал бувссар Вихьуллал школа. Школалиява спортрал чулуха итххявхсса АхIмади гара шинал дуклан увхссар Дагъусттаннал педагогикалул институтрал физкультуралул факультетрайн. Дуклакисса шиннардий цимилгу ххув хьуссар лачIунбуккаврил бяст-ччаллай. АхIмадин дуллуну диркIссар СССР-данул спортрал мастершиврийнсса кандидатнал цIа. Институт къуртал бувайхту АхIмади зун ивкIссар цал Къяннал, яла Ваччиял школардай физкультуралул дарсру дихьлай. Ваччав АхIмади мукуна уссия школалул завучнугу. Цаппарасса шиннардий уссия Краснодардай ишбажаранчишиву дуллай. Дагъусттаннайн зана хьуну, зий уссия МахIачкъалаллал пивзаводрал хъунаманал хъиривману. Буттал шяравун зана хьуну, увчIуна райондалул мажлисрал депутатну ва мура чIумал ивтуна райондалул шяраваллил хозяйствалул управлениялул хъунаманал хъиривчунугу. Ахиратравун гьаннинсса вай махъсса шиннардий цува заллусса КФХ-лий зий уссия.
АхIмади ия инсантал ххирасса, кумаг аьркинманал чIарав ацIайсса, дакI хъинсса инсан. Оькьини дуркнал чIаравгу га цIана шайва цувагу. АхIмади ия дусшиву дуван кIулсса зунттал чув.
АхIмади ахиратравун лагаврил куртIсса щаву дурссар, ца ХIанапихъал кулпатрай дакъагу, ва кIулну ивкIминнал, гъанссаннал, дустурал дакIурдийгу ва миннал дакIурдива АхIмади тачIавгу къауккантIиссар.
Хъуннасса кьурчIишиву кIидачIлай буру АхIмадил буттащал, ниттищал, уссурвавращал, кулпатращал, махъсса цинявппагу гъан-маччанащал. Ци банссар, Аллагьнал чивчуминнуяр ххишаласса кьинирду тIалав дуван жущара къашай.
Шанашу, ххаллилсса зунттал чув, АхIмадий! Гьаттай нур дизаннав, алжаннул ххари аннав. Амин!
Вихьуллал жямат
Вихьуллал шяраватусса ХIанапихъал ХIанапил ва Шамайл кулпат, оьрчIру ва циняв гъан-маччами хъунмасса барчаллагьрай буру, жула аьзизсса арс АхIмади ахиратрал хьусса чIумал, жула чIарав бацIан, жухь кьурчIишиву кIидачIин бувкIсса цинявннайнмагу.
Зул аьрххи-ххуллу хъатIайн-хъиншивурттайн бакъа къабагьаваннав. Зула-зула оьрмурдай барачат бишиннав. Амин!
Рамазаннул арс
Султанхъал АхIмадхан
Уттигъанну, захIматсса цIуцIаврища ххассал ан къавхьуну, ахиратрал хьунни ЧIяйннал шяраватусса Султанхъал АхIмадхан.
Увну ур АхIмадхан МахIачкъалалив мартрал 17-нний 1975 шинал. Къуртал бувну шагьрулул 7-мур школагу, гара шинал увххун ур Шяраваллил хозяйствалул институтрал экономикалул факультетрайн.
ЦIа данну мугу къуртал бувну, зун айивхьуссар буттал сянатрай балугъирттал личIи-личIисса идарарттай. Ва уссия балугъирттал отраслилул хIакьсса специалист, экономист, ишбажаранчи. Зий уссия «Водоканал» системалийгу ва цаймигу личIи-личIисса давурттай. Лайкь хьуссар «ДР-лул лайкь хьусса экономист» цIанингу.
Ва ия хъинну иминсса, хIалимсса, цала буттал яхIгу, адав-намусгу, дакIнил дугъришивугу дуллусса инсан.
Ци банссар, лавгунни дунияллия оьрмулул аргъираву, аьзизсса оьрчIругу кьабивтун.
АхIмадхан ахиратрал шаврил хъуннасса кьурчIишивугу кIидачIлай, жижара буллай буру кулпатрахь, оьрчIахь, ссурваврахь, щалагу агьлу-авладрахь.
Вин алжан нясив баннав, махънал оьрмурдай барачат бишиннав. Амин!
ЧIяйннал, Вихьуллал жямат
