Дагъусттаннал Росгвардиялул управлениялул хъунаманал хъиривчу, полициялул полковник МахIаммад МахIаммадовлул «Ястреб» СОБР-ал ветеранЭльдар Багьауттиновлун дуллунни Республикалул БакIчи Владимир Васильевлул чулухасса цIа кусса ссят.
2014 шинал Хасавюртуллал райондалийсса хасъсса операциялуву Эльдардуйн захIматсса щаву дирну диркIссар. Мунияр махъ му пенсиялийн лавгссар.
Эльдар Багьауттиновлун бахшиш дунни щалагу Аьрасатнал СОБР-ал кьинилуцIун бавхIуну. Ветераннащал хьунабакьин бувкIун бия «Ястребрал» командир, полициялул полковник Запир Алискантов, ванал хъиривчу, полициялул подполковник ХIасан Шяъбанов ва СМИ-дащал дахIаву дуллалисса кIанттул управлениялул хъунаманал кумагчи, полициялул полковник Константин Шиян.
-Эльдардул СОБР-ву зий дахьра 3 шинни хьуну диркIсса, амма му чIумул дянив мунаща ккаккан бан бювхъунни цала даража.
Щаву дирну махъ Эльдардуща цала къуллугърай зун къабювхъунни. Амма ва, дакI гъагъан къадурну, цала цIуллу-сагъшиврул ялув авцIуну ур ва къуллугърайн зана хьунсса пикрилий ур. Жугу ва жула кьюкьравун зана хьуншиврийн вихшала кьукьлай бакъару, — увкунни МахIаммад МахIаммадовлул.
