Вай гьантрай Аьрасатнал финансирттал министрнал хъиривчу Несмеренко Татьянал баян бувунни хIукуматрал давурттив дачин даврил аралуву чан дантIишиву зузалтрал ккал.
Р. Къардашов
Ва буслай бур: «ЦIана хIукуматрал къуллугъчитурал аьдад чан къадуварчан, вай шинай щаллу буваншиврул бюджетрава ялунгу харж дан багьлай бур 100 млрд. къурушрал. Къуллугъ буллай ливчIминнан харж лахъ бансса мурадгу буссар». Росстатрал ккаккан буллай бур 2018 шинай федерал зузалтрал дянивсса харж бивкIшиву 126,6 азарда къуруш. Мигу хъанай бур Аьрасатнаву дянивну ласайсса харжираяр шамлийну ххисса.
Татьяна Нестеренкол бувсмунийн чул бищурчан, 2021 шинайннин Госаппаратрал зузалтрал аьдад ссуссукьу дан багьлай бур 15%. ЦIана Аьрасатнаву усса ур 855 азара госчиновник (МВД-лул зузалт хIисав къабувну).
Нестеренкол тIимуний рязи къавхьунни Аьрасатнал премьер-министрнал пресс-секретарь Олег Осипов.
— ЦIана ва масъалалул ялув дуллай буссару хъиривлаявуртту, личIи-личIисса ххуллурду ххал бигьлай буссару, цумур кьяйда язи бугьантIиссарив цалсса балжину кIулну бакъар, — увкунни Олег Осиповлул.
Шиккува бусан, Аьрасатнал премьер-министр Анатолий Медведевлул 2010 шинал кьамул бувну буссия федерал чиновниктурал 20% сияхI чан дансса хIукму. Бунияларив чан хьуссар 3,4%. Хъиривгу, 2015 шинал, укунмавасса хIукмулий ккаккан буну буссия чиновниктурал аьдад ссуссукьу дан 10%. Мяйжаннугу дан хьуссар 1,4%. Ахиргу, чIалай бур — агьаммур масъала госслужащийтал, даврия букьан баву бакъарча, агьалинан ва паччахIлугъран мюнпатранну зузи баву бур.
Ци учирчагу, цIанагума ялун ликлакисса цифрардал экономикалул ва мунил каширдал, агьалинаха зузисса хIукуматрал къуллугъчитал даву дакъана личIлай бур.
