Уттигъанну Пятигорскалий хьусса ххассал бувултрал многоборьелул Аьрасатнал чемпионатрай ххув хьуну, цалчинсса кIану бувгьунни Дагъусттаннал ххассал бувултрал командалул.
Шикку гьуртту хьунни Аьрасатнал личIи-личIисса регионнаясса ва Беларусьнавасса 20 команда. Соревнованияртту тIитIлай, ихтилат бунни Аьрасатнал Граждан обороналул ва ЧС-рал министрнал хъиривчу Павел Барышевлул.
Дагъусттаннал ххассал бувултрал командалул уттинингу цимилагу ккаккан бувссар цала бюхъулул ва хIадуршиндарал даража.
Ккавкказуллал командарттал дянивсса бяст-ччалливу вайннал аруйлва цалчинсса кIану бувгьуссар.
Мукьра шинал хьхьичI укуннасса Аьрасатнал чемпионатрай вай шамилчин бувкссия. Мунияр махъсса Аьрасатнал чемпионат хьунни гьашину. Шикку жула ххассал бувултраща цалчин буккан бювхъунни.
— Лавайсса даражалул хIадуршинна дусса ва чIярусса ххувшавуртту ларсъсса командартту дия чемпионатрай гьуртту хьун дуркIун. ЛяличIинура цIакьсса командартту дия Москавуллал, Самаралул, Удмуртиянал, Беларусьнал. Бяст-ччал хъинну ягинсса хьунни. Жула оьрчIал хъунмасса хIарачат бунни. Аьмну командалулгу (8 инсан), такну 2 спортсменналгу – Мижев Адлердул ва Аьлиев Ренатлул бувгьунни цалчинсса кIанттурду. Дагъусттаннал командалул лайкьну дурурччунни цила чIумал ттула ниттиуссил, ва службалул ветеран Зиябуттин Муртузааьлиевлул гьаз дурсса Дагъусттаннал ххассал бувултрал цIа. Ванал личIлулну язи бугьайссия кадрарду, хъинну ялув ацIайссия тренировкарттал, зузалтрал хIадуршиндарал, — тIий, рязину буслай ур Дагъусттаннал ххассал бувултрал кьюкьлул хъунама, ДР-лул лайкь хьусса ххассалбуву, Ккурккуллал шяравасса ХъунамахIамма Жабраилов.
Чемпионатрай гьуртту хьун увкIсса ххассал бувултрал департаментрал директор Игорь Кутровскийл, барчагу бувну, яла хьхьичIунмур команда хIисаврай кIицI ларгунни Дагъусттаннал команда. Ххув хьуми мукунма барча бунни жагьилми хIадур бавриву хъуннасса хъар лахълахъисса Аьрасатнал МЧС-рал ветерантурал. Миннавух ия чIярусса шиннардий Дагъусттаннал ххассал бувултрал отрядрай каялувшиву дуллай ивкIсса Аьрасатнал альпинизмалул лайкь хьусса тренер Зиябуттин Муртузааьлиевгу. Жула оьрчIал ххувшавриву ванал захIматрал бутIагу буссар.
