Аьй-бювкьулийсса информациялул мюхчаншиву

[dropcap]С[/dropcap]ентябрьданул 26-нний Национал библиотекалий хьунни аьй-бювкьулийсса информациялул инфраструктуралул

мюхчаншиву дуруччаврил (обеспечение безопасности критической информационной инфраструктуры) агьамсса масъаларттал хIакъиравусса батIаву.


Муний гьуртту хьунни ДР-лул ХIукуматрал Председательнал хъиривчу Рамазан ЖахIпаров, ДР-лул информатизациялул, дахIаврил ва агьалинайнсса коммуникацияр­ттал министр Сергей Снегирев, Кьиблалул ва Ухссавнил Ккавкказуллал Федерал округирттал техникалул ва экспортрал ялув бацIаврил федерал къуллугъирттал вакилтал, республикалул исполнител властрал органнал вакилтал.
БатIаврий махъ лавхъунни Сергей Снегиревлул.

Мунал бувсунни лахьхьин баврил ва методикалул идаралул (учебно-методический сбор) хьхьичI бивхьусса масъалалул хIакъираву: «Жура аьркинссар сакин дуван АьФ-лул Президент Владимир Путиннул ва ХIукуматрал хIукмурду бартбигьаврил даву, ми хIукмурду бур аьй-бювкьулийсса информациялул инфраструктуралул мюхчаншиву дуруччаврил хIакъираву. ЦIанасса ппурттуву му даву дуллай бур, жун кIулссаксса, так ца ЦIуллушиву дуруччаврил министерствалул, ливчIминнал тIурча, анжагъ байбишинсса пикри бур.

Ми темарду жу ххал дигьарду хIукуматрал 2 комиссиялий Рамазан ЖахIпаровлул каялувшиврий», — увкунни Сергей Снегиревлул. Министрнал тIимунийну, закондалул ккаккан бувну бур цIуллушиву дуруччаврил лагрулийгу, промышленностьрал лагрулийгу, транспортрал лагрулийгу бартбигьин аьркинсса масъалартту, гьарца лагрулий бур аьй-бювкьулул инфраструктуралул объектру, ми буруччин аьркинну бур информациялул гьужумирттаяту ва лахъ дуван информациялул мюхчаншиву.

Яла махъ лавхъунни Аьрасатнал ФСТЭК-рал Кьиблалул ва Ухссав­нил Ккавкказуллал федерал округирттал управлениялул хъунама Александр Косаревлул. Мунал бувсунни ми давуртту бартдигьин кумаг бан хIадурну бушиву. Ихтилат бунни ФСТЭК-рал управлениялул отделданул хъунама Александр Жиляковлул. Мунал бувсунни хIадур буван аьркинсса документирттал хIакъираву. Муния махъ президиумрай гьуртту хьуминнал жавабру дуллунни Дагъусттаннал исполнител властрал органнал вакилтурал буллусса суаллахьхьун.