Оьмардул арс Щейхов МихIа

Уттигъанну Ккуллал райондалийсса Ссухъиящиял шяраву хьунни хъинну

язисса инсан ахиратравун лавгсса кьурчIисса иш.

Хар-хавар бакъа, ца куну чурххавун дурхсса цIуцIаврил бас увну, жул дянива лавгунни Щайхов МихIа Оьмар­дул арс.
Махъсса шиннардий МихIа цала кулпатращал яхъанай ва зий уссия Къизлардал райондалий Рыбалко тIисса шяраву учительну.
МихIа увссар Ссухъиящиял шяраву февраль зурул 19-нний 1951-ку шинал. ЧIаххуврайсса Вихьуллал шяраву къуртал був­ссар школа. Школалий дуклай унува спорт­рахунгу агьну икIайссия. Школа къуртал байхту лавгссар армиялий къуллугъ буллан, зана шайхту, увхссар Дагъусттаннал Пединститутрал физкультуралул факультет­райн. Мугу къуртал бувну, 1974-ку шинал тIайла увкссар ЦIуссалакрал райондалийн, спортшколалий боксертурал тренерну зун. Га чIумал ванал учениктуравасса ХIажиметов КьурбанхIажи хьуссар СССР-данул чемпион.

МахIачкъалалив ивзун, Ми­хIа зий ивкIссар Республикалул спортшколалий тренерну 1987-ку шинайннин. Ганияр махъ зунгу, яхъа­нангу ивзссар Къизлардал райондалийсса Рыбалко шяравун ва миккусса школалий физкультуралул дарсру дихьлай ивкIссар. Ванал тIивтIуну бия оьрчIансса бокс­рал секциягу.
МихIа уссия хъамал ххирасса, дусшиву дуван кIулсса ссухъиричу. МихIал рухI паракьат хьуссар бу­ттал шяраву.

Хъуннасса кьурчIишиву кIи­дачI­лай буру ванал кулпатращал, уссищал, оьрчIащал, гъан-маччанащал, махъминнащал. Аьпа баннав МихIал. РухI АллагьначIан гъанну хьуннав. Гьаттая нур дизаннав.

Ссухъиящиял жямат

---

Аьвдуссаланнул душ МахIаммадова Сиянат

Уттигъанну, оьрмулул 90 шинаву, ахиратравун лавгунни Ххюлусматусса ххаллилсса зун­ттал хъамитайпа, захIматрал ветеран МахIаммадова Сиянат.

Бувну бур Сиянат Ххюлу­с­мав 1929 шинал Аьвдуссаланнул ва Рукьижатлул кулпатраву. Сиянатлул щала оьрму лавг­ссар Ххюлуссуннал шяраву, та заманнул никирал агьлу кунма, цуппагу ччяни захIматрал ххуллийн бувккун бур. ЧIярусса шиннардий зий буссия дояркану фермалий. Ва бия хьхьичIунсса зузала.

ДакIнийхтуну бивхьу­сса захIматрахлу лайкь хьуссар чIярусса бахшиширттан, барчаллагьирттан, лайкь хьуссар захIматрал ветераннал цIанингу. Жула паччахIлугърал хъунаманал Сиянат юбилейращал барча буллалисса телеграммагу дуркIссия.

Сиянат бия лагма-ялттунащал хIал бавкьусса, дакIнил хъиншиврул бутIа ххишалану бив­сса, дан-дитан кIулсса, уздансса хъамитайпа.
Сиянат ахиратрал шаврил хъуннасса кьурчIишиву кIи­дачIлай, жижара буллай буру ванил уссихь ХIасаннухь, гъан-маччаминнахь, цинявннахьвагу. Цил гьав нурданул дуцIиннав. Алжаннул ххари баннав. Ваксса къавхьуну цучIав дунияллия къагьаннав. Амин!

Ххюлуссуннал жямат

---

ДакIнихтуну кьурчIишиву кIидачIлай, жижара буллай буру Илиясов Хизри Илияслул арснахь ванал ххирасса буттауссу

МахIаммад
дунияллия лагаврийн бувну. Зул агьлу-авладрай угьара хьуну, оьр­мулия щаливххун акъасса цучIав яла къагьаннав, махъминнал оьр­мурдай барачат бишиннав.
Цал гьав нурданул дуцIиннав, бунагьирттал аьпа баннав. Алжаннул агьулданувух ишиннав.
«Илчи» кказитрал коллектив