[dropcap]С[/dropcap]ентябрьданул 24-нний Кировский райондалул бакIчи СалихI Сагидов хьунаавкьунни ЖКХ-лул тагьарданул жаваблувшиву дуллалисса МахIачкъалаллал бакIчинал хъиривчу Апанни Хайдакьовлущал.
Залму АьбдурахIманова
БатIаврий мукунма гьуртту хьунни личIи-личIисса къуллугъирттал жаваб дуллалисса пишакарталгу. Вайннал цачIу ххал бивгьунни «Комфортная городская среда» программалул лагрулий дяркъу хьуннин чIяру зивурду ду къатри хIадур даврицIун кучардайсса бухсса ттукIрал тталлу баххана баврицIун бавхIусса масъалартту. Ихтилат хьунни мукунма кучардай ва ххуллурдайсса марцI-чапалшивурттал давурттая ва миннул низамрая.
БатIаву тIитIлай, СалихI Сагидовлул кIицI бунни, шагьрулул хъуниминнащал цачIу ххал бигьларча райондалийсса агьалинал масъалартту, чIярусса ххуй-ххуйсса, мюнпатсса давуртту дан бюхълантIишиву.
Бувсунни бакIчинал цIанасса ппурттуву Кировский райондалий дуллалисса агьамсса давурттаягу. Мисалдаран, дагьайкун марцI дуллай байбивхьуну бусса бур цинявннал зума-ккарччулусса ва Цалчинмур МахIачкъалаллал агьулданун «цIуцIи кIанттун» ккаллисса Тарнаирка тIисса чIири нех ва баххана бувну бур кучардайсса бух хьусса 560 ттукIрал ттала. Райондалул поселокирттайсса 80-ннийн бивсса ххуллурдайн аьрщи-ххюл бивчуну, грейдер гьан дурну дур ва «100 ххуллу» тIисса программалул лагрулий ацIва ххуллу ттигу бакьин буллай бусса бур.
Апанни Хайдакьовлул, шикку хьусса масъаларттах вичIигу дирхьуну, махъ буллунни циняр давуртту дурну, бакIуйн дурккун махъ, кIани-кIанттурдайн ивну, чув ци дахханашивуртту ва къулайшиннарду хьуну дурив ххал дан.
