[dropcap]С[/dropcap]ентябрь зурул дайдихьулия шинмай Ккуллал райондалул шяраваллаву дакIнин бичлай бур 1999-ку шинал Дагъусттан зиянчитурая буручлай бивкIсса вирттал.
ХIажимурад ХIусайнов
Сентябрь зурул 10-нний Вихьуллал Культуралул къатлул зузалтрал дурсса хьунабакьаврийн бувкIун бия шяраваллил бугьарасса инсантал, социал зузалт, жагьилтал. Гай цукунсса чIунну диркIссарив ва цукунсса бала-апатI жула ялун най бивкIссарив кутIану бувсуна Вихьуллал Культуралул къатлул худрук Оьмариева Камилатлул.
Нагу, зул корреспондентнал, дакIнийн дирчуссия гай шинну. КIицI бувссия ттунма ссалам-аьлайк булун бахтти хьуну бивкIшиву га чIумал Аьрасатнал Виричунал цIанин лайкь хьусса, Ккуллал шяравасса Мурачуев Халидлул буттахьхьун Рашидлухьхьун. ХIайп, цува ччяни ахиратравун лавгунни.
Ихтилат бувна мукунма хъуначу ЧIанкIаев ЧIанкIал. Бала ялун бувкIни, ца хьуну, хьхьичIун буккаву Дагъусттаннал миллатирттал цаллара хасият душиву кIицI буллай бия ихтилатру буллалими. Муниятур гай зиянчитураща жущара тархъаншиву зеххин къархьуссагу.
