Август барз къуртал хъана­хъисса гьантрай Москавлив хьусса Дунияллул халкьуннал элмийсса ва кIулшивуртту цIакь 

дуллалисса «Школа Брикс» программалул давриву гьуртту хьунни 1-мур ЦIувкIратусса жагьил­сса аьлимчу, Совет Союзрал кIийла Виричу АхIмад-Хан Султаннул цIанийсса фондрал хъунмур Лаура Кьурбановагу.

---

П. Рамазанова
[dropcap]Л[/dropcap]аура, хIасулгу дурну, каялувшиву дуллай бур дуккаврицIун, элмулуцIун ва культуралуцIун кабакьу буллалисса ва фондрай.
«Ца ххуттайну учин, «Школа Брикс» дунияллул политикалул яла къювуми масъалартту ххал бигьлагьисса кIанур. Бия Бразилиянавасса, Индиянавасса, Китайнава­сса, Кьиблалул Африканавасса ва цаймигу билаятирттаясса 35 инсан, дипломатътал, жагьилсса аьлимтал, студентътал ва аспирантътал, мукунма журналистъталгу.

Проектрал гьанумур мурад – личIи-личIисса билаятирттаясса интеллектуал гужру цачIун бувавур, школалул хъунмур къуллугъ-бигаргу ва даву сантирай дуван лахьхьин дуллалисса мурад бия, — тIий бур, Москавлиясса аьрххилия бусан рязий хьуну, жул редакциялийн бувкIсса Лаура. — «Школа БРИКС» — анжагъ лекциярду ба­къаяча, Аьрасатнал ва кьатIаллил билаятирттал экспертътурал аьщуйн щусса, агьамсса, цIурувкьюсса масъаларттан, цIуцIи кIанттурдан дару-дарман лякъаврил ххуллийсса ихтилатру бия. Цалчинсса дискуссия хьуна, масалдаран, Аьрасатнал кьатIаллил иширтталсса буллалисса министрнал хъиривчу Сергей Рябковлущал. Ванал кIицI лавгуна Союз ххюва билаят­рал дусшиврийсса ва сантирай­сса даврил кюруну хьушиву.

Проектрал сиптачитурал хIисавравун ларсун дия дунияллий хъанахъисса агьамсса иширттал сияхI-повестка. ЧIявусса ихтилатру бия США-нал ва Китайнал дянивсса машлул цIанийсса дяъвилия, финансирдал кризис ягин хъанай душивриясса, дунияллий терроризмалул ва экстремизмалул нигьачIаву душивриясса. ХIакьину, билаятир­ттал ва жяматрал дянив кувннан кув къабувчIлачIисса кIанттурду ва питнарду хъана­хъисса ппур­ттуву, жагьилтал луглан аьркинни ми питнарду лещан бувансса ххуллурдах ва чараннах. Ва кIанугу хIисавравун лавсун, Москавлив­сса ихтилатру цинявннанма мюнпатрансса хьунни».

Жугу дакIнихтуну чIа тIий буру Лауран ва дунияллул лагрулийсса давривугу тIайлабацIу. Лаурал БРИКС-рал даврияту бусласисса телеканалданун интервьюгу дуллуну дур. Проектрал сиптачину хьусса Публичная дипломатиялун кабакьу буллали­сса А.М. Горчаковлул цIанийсса Фондрал хъунама Джон Ксенофонтов дакIнихтунусса барчаллагь тIий ур Лаурахь, программалул давриву хьхьичIунсса гьурттушинна дуваврихлу.

[dropcap]Ш[/dropcap]иккува бусан, Да­гъусттаннал Шяраваллил хозяйствалул министерствалул тти­гъанну Лаура Кьурбанован буллунни Барчаллагьрал чагъаргу: ятту-гъаттара ябуллалисса кулпатир­ттал фермардал иш бачин буван­сса ва дахьва зун байбивхьусса фермертуран кумагрансса конкурсрай гьуртту хьунми личIи буван був­сса кумаграхлу. Лаура, бакIрайва кIицI лавгсса куццуй, шяраваллил хозяйствалул элмурдал кандидатгу бур. Ва ци даву дулларчагу, цилва опытгу, кIулшивурттугу агьалинан мюнпатну тIайладацIансса бюхъулий ва хIарачатрай зузисса душ бур. Дуллалимуниву тIайлабацIу баннав!