Лахьхьу, сентябрьданул 19-нний, МахIачкъалалив Национал библиотекалий шадлугърал тагьарданий тIиртIунни гьарца шинах дуллай аьдатравун дагьсса «Тарки-Тау – 2019» луттирдал IХ выставка.
Бадрижамал Аьлиева
[dropcap]М[/dropcap]у тIитIлатIисса ихтилат бунни ярмаркалул куратор Марат ХIажиевлул. Ихтилатру мукунма бувунни ДР-лул ХIукуматрал председательнал цалчинма хъиривчу Анатолий Карибовлул, ДР-лул Чичултрал союзрал председатель МахIаммад АхIмадовлул.
Ххари хьунсса кIану бур луттирдал ярмаркалул география ялу-ялун гьарта хьуну нанаву – хIакьину МахIачкъалалив жува хьунабакьлай буру Аьрасатнал Федерациялул 18 региондалиясса дустал.
Жулла ярмаркалийн увкIунни архмур дазул кьатIатусса хъамаличугу – Канаданавасса шаэр Ренди Коэлгу, — увкунни Анатолий Карибовлул.
Гьарца шинал выставкалун ци-дунугу ца тема ккаккан дувайссар. Гьашинумур выставка наниссар «Литература – террорданийн къаршину» тIисса луттирдал форум-фестиваль хIисаврай.
Выставка лахъи лагантIиссар сентябрьданул 21-нин. Мунил лагрулийсса шадлугъирттал программа хъинну хъуннар ва аваданни.
Фестиваль къуртал хьунтIиссар 11 номинациялий язиминнун ккалли бувсса луттирдал ва миннул автортурал цIарду баян баврийну.
