Республикалул Халкьуннал творчествалул къатлул сакиншиндарайну, сентябрьданул 14-нний ЦIуссалакрал шяраву «Дусшиврувур дусса жулла цашиву» тIисса цIанилу
хьунтIиссар аслийсса культуралул республикалул байран, ЦIуссалакрал район сакин дурну 75 шин ва ЦIуссалакрал райондалийн ххявхсса къачагътал ххит бувну 20 шин шаврин хасну.
Бадрижамал Аьлиева
Байрандалий гьуртту хьунтIиссар Буйнакск ва Хасавюрт шагьрурдаясса, Ахттиял, Ахъушиял, Бабаюртуллал, Дарбантуллал, Къайтагъуллал, Ккуллал, Лакрал, ЦIуссалакрал, Нугъайнал, Тарумовкаллал, Хасавюртуллал ва Ххунзахъиял районнаясса коллективру, мукунма гьуртту хьунтIиссар паччахIлугъралми коллективругу. Республикалул байрандалул хъамаллуравух бикIантIиссар Костромалиясса, Къиримнавасса, Армавирдаясса, Волгоградраясса ва Ингушнавасса балайчитал.
Му кьини ЦIуссалакрал шяраваллил майданнив тIивтIуну бикIантIиссар «Аьдатру» тIисса цIанилусса миллатрал майданну. Микку республикалул шагьрурдаясса ва районнаясса гьурттучитурал ккаккан дувантIиссар миллатрал культура, канил пишарду, зунтIиссар «Рисуем мир» арт-площадка. МахIарамккантуллал райондалиясса пагьламантурал «Гьунар» тIисса группалулгу ккаккан бувантIиссар цалвами бюхъурду.
Байран дуллалиссар ЦIуссалакрал райондалул администрациялул ва Культуралул управлениялул ДР-лул Культуралул министерствалущал ва Республикалул Халкьуннал творчествалул къатлущал цачIуну.
