[dropcap]М[/dropcap]оскавлив оьрмулул 79 шинаву дунияллия лавгунни Аьрасатнал жяматийсса ишккакку, РАЕН-далул академик, Гуманитар элмурдал академиялул член,
мубараксса Кьурандалул лу ххаллилну оьрус мазрайн таржума бувсса инсан Иман ( Валерия) Порохова. Ислам кьамул дайхту, ванил Иман тIисса цIа ларсун дур. Цила лас МухIаммад Саид Аль- Рошдлущал бувкIссия ва Дагъусттаннайнгу. Дагъусттаннал муфтий АхIмад- хIажинащал бивссия щайх ЧиркIайннал Саид-АпанниначIангу.
П. Рамазанова
«Ккуркки столданул» журалийсса пресс-конференциярдай ванил Дагъусттаннал журналистал ва жяматийсса ишккаккулт хIайран хьуну личIан бувна исламрал дунияллийсса цилла куртIсса ва цIакьсса кIулшивурттайну.
«Ванил нину-ппу оьруснал дворянтурал наслулияссар, сталиннул режимрал репрессиялул щатIахьхьун биривссар, Валерия Михайловнагу бувссар ссивирлив.
[dropcap]В[/dropcap]анил оьрмулул ххуллу къабигьасса хьуну бур. Ванил Кьурандалул лу так таржума къабувссарча, Кьурандалул ххуйшиву, исламрал ххуйшиву ккаккан дурссар, диндалул гьанурдуну хьусса хъиншиврул ва гуманизмрал кьараллу ккаккан дурссар», — тIий, чичлай ур политик ва динчи Аьли Полосин.
БувкIссия Иман Порохова Аьрасатнал Бусурманнал союзрал каялувчину ивкIсса Надиршагь Хачилаевлул ужагърайнгу, дуссия мунащал ванил хъинну гъансса дусшивугу. Эльвира Сагидовал Валерия Пороховащалсса интервью дуссия «Илчи» кказитрайгу. Ванил чаннасса ва иман ххисса цIа личIантIиссар халкьуннал дакIурдиву. Алжаннул ххари буваннав цув!
