Бархху-МахIаммадлул арс ХIажиев Дундар
Вай гьантрай хар-хавар бакъа лавгунни дунияллия захIматрал ветеран, чичу, тарихчи, публицист, Ккуллал шяраватусса Бархху- МахIаммадлул арс ХIажиев Дундар.
Дундар увну ур 1933 шинал Ккуллал шяраву. 1944 шинал бизан бувсса кулпатирттавух вайнналссагу буну, Дундардун школа ЦIуссалакрал шяраву къуртал буван багьну бур. Физкультуралул учитель шайсса курсругу къуртал бувну, зий ивкIун ур ЦIуссаккуллал школалий. 1964 шинал бувккуну бур ккарччал усттар шайсса техникум. Республикалул ккарччал поликлиникалий зий, ларсун дур «Дагъусттаннал цIуллу-сагъшиву дуруччаврил лайкь хьусса зузала» тIисса цIа.
Дундардул канила бувкссар Ккуллал тарихрая ва хьхьичIунсса инсантурал оьрмурдая бусласисса луттирду. Ва ия «Илчи» кказитралгу муданасса автор. ПасихIсса мазрай асар хьунсса чIярусса макьалартту чирчуссар ванал. Буккултран бусрав хьуссар цаймигу луттирду: зунттава бизан бувсса лакрал захIматсса тагьарданиясса «Тахсир бакъасса танмихIру», тIисса «МахIаммад Хачилаев дакIнийн утлай» тIисса ва махъва-махъмур лунугу хьхьуссар «Махъва-махъсса махъ» тIисса.
Дундар ХIажиевлун сахаватну буллуну бия цаймигу гьунарду: ванан ххирая музыка, паргалну мандолиналий, флейталий макьанну дуцайва, скрипка ва аккордеон бищайва. Бия ванал художникнал гьунаргу, цалва луттирдахунсса суратру, эскизру цалла дувайва. Ва ия спортралгу итххявхсса, лахъинмайгу, лавайгу тIанкI учаврил рекордру ккаккан дурсса чув. «ТIанкI учай Дундар» тIисса ялунцIагу дуссия ванал. ХIасил, гьарца чулуха итххявхсса, гьунардал паргалсса инсан ия.
Дундар дунияллия лагаврил кьурчIишиву кIидачIлай, жижара буллай буру ванал кулпатрахь, арсваврахь, душваврахь, вайннал наслулухь ва цинявппагу гъан-маччацириннахь. Ванан къабуллумур оьрмулул бутIа наслулун ххи бувну лякъиннав, гьаттай нур дизаннав, алжаннул ххари аннав!
Ккуллал ва 1-мур ЦIувкIуллал жямат, дустал, гьалмахтал
Абусупияннул арс Камалов Камал
Вай гьантрай, лахъину къашавайгу ивкIун, оьрмулул 81 шинаву лавгунни дунияллия Читтурдал шяраватусса, цIанихсса Камаловхъал агьулданиятусса ххаллилсса зунтталчу, захIматрал ветеран, Абусупияннул арс Камалов Камал.
Гъумук 10 классгу къуртал бувну, дуклан увххун ур МахIачкъалаллал строительный техникумравун, техник-строительнал касмугу лархьхьуну, армиялийн лавгун ур. Аьралий бурж лавхъун махъ Москавуллал автоххуллурдал институтравун дуклан увххун ур, Москавуллал аьрали округрал ххуллурдалсса буллалисса даврий зий айивхьуну ур, ца шинава ДЭУ-лул (дорожно-эксплуатационный участок) хъунама инженерну ивтун ур. 1970 шиная 1984 шинайн ияннин зий ивкIун ур Москавлив личIи-личIисса къуллугъирттай: 1984 шинал ивтун ур Щаллагу Союзрал шяраваллил хозяйствалул институтрал проректорну, 27 шинай зий ивкIун ур му къуллугърай. Ванал даврин хIукуматралгу лахъсса кьимат бивщуну бур, ччарча строительствалул даврий каялувчи хIисаврай, ччарча проректор хIисаврай. АрхIал зузиминнал ва студентътурал дянив ванал сий лахъсса диркIссар. Мудангу гьуртту шайссия Дагъусттаннай дуллалисса агьамсса давурттавухгу, шяраваллил жяматрал иширттавухгу. Давриву ва элмулуву итххявхсса ушивруцIун инсаншиву дусса, чIарав ацIан чялишсса, дакI-аьмал хъинсса, хIал бавкьусса инсан ия.
Камал дунияллия лагаврил кьурчIишиву кIидачIлай, жижара буллай буру ванал кулпатрахь, арсурваврахь, вайннал наслулухь, уссурваврахь ХIасан-ХIусайннухь ва Рамазаннухь. Камал алжаннул ххари уваннав, гьаттай нур дизаннав.
Махъминнал оьрмурдай барачат бишиннав!
Читтурдал жямат
* * *
ДакIнихтунусса кьурчIишиву кIидачIлай, жижара буллай буру жулва уртакь, «Инт» кафелул хъунмур Кьурбанова Саидатлухь ванил аьзизсса ппу
Дундар
дунияллия лагаврийн бувну. Угьара хьуну, оьрмулия щаливххун акъасса зул агьулданий цучIав дунияллия къагьаннав, буттал барачат зучIава ливчIун лякъиннав, цIуллушиву дулуннав!
Мариян Илиясовал цIанийсса «Дараччи» фонд
