Гьар мудан кунна, гьашинугу, гъинттул цинявппа буттал шяравун кIурабавсса чIумал, Ккурккуллал шяраваллил Культуралул къатлуву хьунни студентътуращалсса хьунабакьаву.
Ва даврил сиптачитал хьунни Культуралул къатлул директор Абризат Аьбдуллаева, художествалул каялувчи Аймисай Аьбдуллаева ва шяраваллил библиотекалул хъунмур Сияли Аьбдуллаева.
Билаятрал личIи-личIисса ВУЗ-ву дуклакисса жагьилтуращал хьунабакьин бувкIун бия Ккурккуллал школалул учительтал, Каспийскалийсса машиностроениялул ва сервисрал колледжрал преподаватель, экономикалул элмурдал кандидат Анжелика Мусаева.
А. Аьбдуллаева
Аймисай Аьбдуллаевал ихтилат бунни буттал кIанттухсса, миллатрахсса ччаврия, ниттил мазгу, жула аслийсса культура ва аьдатру дуручлан аьркиншиврия.
Сияли Аьбдуллаевал хIадур дурну дия лакрал чичултрал луттирдал ва миллатрал прессалул выставка. Ванил бувсунни оьрчIахь бусравсса, эбратсса ккурккуллая.
[dropcap]С[/dropcap]тудентътуращал архIал жу ххал буварду ва нюжмардий бувксса «Илчи» кказитгу.
Ялу-ялун аьч буклай, жагьилсса оьрчIал ва душварал бувсунни цивппа дуклакисса институтирттая, колледжирттая, студентътурал оьрмулия, багьу-бизулия.
Чяйлул стакандалухунсса ихтилатру хьунни аьчухсса, дакIнихтунусса.
Ахирданий студентътуран ккаккан бунни Культуралул къатлуву музейрал мурцIу бувну дирхьусса нукIузаманнул кьай-кьуй. ОьрчIан, хаснува шагьрулий хъуни хьуминнан, хъинну хIаз дирзунни хьхьичIарасса жула буттал буттахъал ишла дуллай бивкIсса матахI. Хьунабакьаву мюнпатсса ва дакIний личIансса хьунни.
