[dropcap]С[/dropcap]ентябрьданул 15-нний Аьли Аьлиевлул цIанийсса Спортрал къатраву, ДР-лул БакIчи Владимир Васильевгу гьурттуну, хьунни Дагъусттаннал халкьуннал Цашиврул кьинилун ва 1999 шинал дунияллул халкьуннал террористурал кьюкьри ххит дурну 20 шин шаврин хасъсса мажлис.

Тиккун салкьи хьуну бия 1999 шинал талатавурттавух гьуртту хьуми, федерал исполнител ва законодател властьрал, республикалул ва муниципал властьрал вакилтал, ихтиярду дуруччай органнал, спортрал вакилтал, интеллигенция, районнал ва шагьрурдал делегацияртту.
Шадлугъ дайдирхьуна концертрайну, ккалай бия Расул ХIамзатовлул ва Апанни Къапиевлул назмурду, бия дакIний личIансса театрал инсценировкартту, Мурад Къажлаевлул музыкалул произведениярттащалсса.
БавтIминнал хьхьичI махъ лахълай, Владимир Васильевлул увкунни:
— ХIурмат бусса дагъус­ттанлувтал, дяъвилул иширттал гьурттучитал, жул талихIри хIакьину зущал бушиву. Ттун ччай бур зухь барча дуван Да­гъусттаннал аьрщарайн ххявхсса дунияллул халкьуннал дянивсса террористурал кьюкьри духлаган дурну 20 шин шаву.
1741 шинал, циняв гужру цачIун бувну, Надир-шагьнал аьрал дардагъил бувну махъ Дагъусттаннан тарихраву хьу­ссар агьалинал цашиврул дарс, мунил цIанагу кумаг буллали­ссар дагъусттанлувтуран.
Вай гьантрай жура дуллай буру 20 шин шаврил шадлугъ. Бандитътурал кьюкьри ххярххун, лиян бувна жула инсантурал паракьатсса оьрму, нигьачIаву диян дуруна респуб­ликалул ва щала Аьрасатнал цашиврийн. Аькьилсса Расул ХIамзатовлул та чIумал увкуна: «Бандитътал бувкIунни Да­гъусттан дагъусттанлувтурацIа тархъан буван». Му чIумал Да­гъусттаннал чIявумиллатру бу­сса агьали, циняв ца хьуну, къарши бувкссар душманнайн. Жяматгу, аьралгу, властьгу, диндалул вакилталгу – циняв цачIун хьуссар душманнал хьхьичIалу кьукьин. Ххувшаву ххирану дарцIуссар: жандалуцIа хьуссар 226 саллатI, 53 виваллил ишир­ттал органнал зузала, 25 ополченец – жунма ми кIулссар циняв ва ми бусраврайгу бикIантIиссар жула дакIурдиву. Хушрай гьур­тту хьусса 106-ннан дуллуссар Чувшиврул орден, 42-ннан «Бу­ттал Ватандалул хьхьичI лайкь шаврихлу» тIисса ордендалул медаль, 16-ннан «Къучагъшиврухлу» («За отвагу») тIисса медаль, ттуршлихъайссаннан ду­л­луссар республикалул бюхттул­сса наградартту. «Аьрасатнал Виричу» тIисса цIанин лайкь хьу­ссар тай 13 инсан. Дагъусттаннал ополчентурал, ихтиярду дуруччай органнал зузалтрал ва аьралитурал цачIу бурувччуссар Дагъусттан», — увкунни респуб­ликалул каялувчинал. Ялагу ххи бунни:
— ЦIанасса ппурттуву па­ччахIлугърал бакIчинал хIук­мулийну законодател собраниялул ккаккан бунни так дяъвилул ополчентуран ветерантурал статус дулун. Му хъинну агьам­сса затри хIакьину яхъана­хъиминнан, ялун дучIансса никирттан тIурча, хъиннува агьам­ссар. Вай гьантрай Бущихъиял, ЦIумадиял, ЦIуссалакрал районнай хьунни шадлугърал давуртту, миннувух гьуртту хьунни Дагъусттаннал аьрщарай жанну дуллуминнал гъан-маччами. Миннал цIарду дизлай бур школарттан, миннал цIарду абад дуван дацIан дуллай бур гьайкаллу. ЦIуссалакрал райондалий на хьунаавкьура га аьрщарай ливтIусса вирттаврал кулпатирттащал, ниттихъащал, гъан­ссаннащал. На миннал цIанияту хъунмасса барчаллагь тIий ура циняв дагъусттанлувтурахь, ми цивппалу ливчIун бушаврил асар бакъашиврухлу. Миннал арсру ливтIуссар Дагъусттаннал аьрщарай, амма миннан шикку лявкъунни дустал ва маччачутал. Барчаллагь зун цинявннан!
ХIакьину Дагъусттаннай дур паракьатшиву ва дузалшиндарал иширттайсса оьрму, мунияту бюхълай бур дуван реформартту, агьалинан хъиншивур­ттайнсса дахханашивуртту, жулла республика уздан дувансса ва тIутIайх дичин дувансса давуртту.
Ччай бур хъунмасса барчаллагь учин Дагъусттаннансса хъиншивурттал цIаний зузисса ва ялапар хъанахъисса цинявннахь, ляличIину барчаллагь тIий ура жулла республикалул ва билаятрал кьатIув ялапар хъанахъисса ватанлувтурахь. Миннал кумаг буллай бур мизитру буван, школартту бакьин буван ва цаймигу социал объектру ва проектру бартдигьин.
Цинявннан чIа тIий ура талихI-тирхханну, узданшиву, паракьатшиву, хъиншивуртту, гьарца хъиндайдихьулуву хьхьичIуннайшивуртту ва тIайлабацIуртту Дагъусттаннан ва Аьрасатнан хъинбаларттал цIаний.
Барча байран! — кунни Да­гъусттаннал БакIчинал.
Мажлисрай мукунма махъру лавхъуна: Дагъусттаннал парламентрал председатель Хизри Шихсаидовлул, Дагъусттаннал цалчинсса Президент Муху Аьлиев­лул, Липецкаллал ОМОН-данул командир Сергей Сковородиннул, Полина Халиловал ва м.ц.
ХIадур бувссар
ХI. Аьдиловлул