[dropcap]Л[/dropcap]аргсса арвахIкьини «Илчилул» редакциялийн увкIунни Да­гъусттаннал ХIукуматрал хъунаманал цалчинма хъиривчу ХIажимахIаммад ХIусайнов.

П. Рамазанова
Ва миллатрал кказитрал редакциялийн учIаврил гьанумур мурадгу бия «Илчилул» отделданул редактор Амин Аьбдуллаевлун «За любовь к родной земле» тIисса хIурматрал лишан дулаву. Уттигъанну 85 шин хьу­сса Амин Аьбдуллаевлун ва лишан дулун кусса Республикалул БакIчинал указ бувккуна август­рал 30-нний.
Залуннан награда тапшур дуллай, ХIажимахIаммад ХIу­сайновлул кIицI лавгунни цува гъирарай увкIшиву агьалинал бусрав- барчаллагьрай кьамул бувсса ххуй-ххуйсса луттирду чивчусса, ГьунчIукьатIрал шяраваллил тарих биялну уттава бувсса инсаннан награда дулун Республикалул БакIчинал цайнма тапшур бувсса бигар бартбигьин.

Вице-премьер редакциялийн учIансса кIулну, цала бусравсса шяравучунал кьини хъун дуван бувкIун бия ХIажибутта ХIусайнов бакIчину ГьунчIукьатIрал ккурандалул вакилталгу. Вайнналгу Амин Аьбдуллаевлул гьунарданунгу, творчествалунгу, уттинин дурсса даврингу лавайсса кьимат бишлашисса ихтилатру бунни.
Жула «Илчилул» зузалал даврин лайкьсса кьимат бищаву – жул коллективралгу пахрур ва ххаришивур. Укунми буру­ччавугу, лавай бавугу жуйва­сса буржри.
Ва кьинисса хьунабакьаврил мажлисрая цинявппагу рязину ливчIунни.