Дуаьлул мяъна-мурад

«Дуаь» тIисса киносуратрал лахIза

[dropcap]В[/dropcap]а нюжмардий Башкирнал хъуншагьру Уфалий хьунни Мукьилчинсса Дунияллул халкьуннал дянивсса этнический кинорал фестиваль «Арцу-мусил Акбузат». Муний ккаккан дурну дур 49 билаятраясса 80 киносурат.

Зулайхат Тахакьаева
Аьрасатнава фестивальданий гьуртту хьуну бур Москавлиясса, Башкирнавасса, Якутиянавасса, Хакасиянавасса, Да­гъусттаннаясса, Чачаннава­сса, Ухссавнил АьсатIиннавасса режиссертал.
Жюрилул хъунаману увчIуну ур РСФСР-данул халкьуннал артист Сергей Шакуров.
Кинофестивальданий хаснура къулагъасралун дагьну дур Ккавкказнавасса киносуратру – Армяннал, Азирбижаннал, Дагъусттаннал, Ухссавнил АьсатIиннал ва Чачаннал режиссертурал давуртту. Кинофестивальданул агьаммур бахшиш ларсун дур Якутиянал киносуратрал.

ХьхьичIунсса ацIра киносуратрал сияхIрай дур Дагъус­ттаннаясса сценарист ва режи­ссер ХIамзат Аминовлул ларсъсса кутIасса тIуркIулийнусса фильмгу – «Дуаь». Ва хьуну дур Дагъусттанная цалчин­сса тIуркIулийнусса киносурат дунияллул лагрулийсса фестивальданий ккаккан дан лайкь хьусса.

Ссаятуссар киносурат ва щийн­ссар дуаь?
— Жагьилсса, иш бавчусса адаминан ккарккун дур макI. ХIакинтал бяйкьуну, анализру даххана хьуну, цайра захIматсса диагноз дирхьуну махъ, га айивхьуну ур оьрмулул ва кулпатрал пикрирду буллай. ХIакинтал бяйкьусса кIул хьувкун, айивхьуну ур цала анализ щищал дяйкьин дурну дурив луглай. Лявкъуну бур къашавайсса хъамитайпа бивкIуну. ЛивчIун ур ганил мушакъатсса арс. Ятинну ливчIсса оьрчI ганал цалашиврий ивхьуну ур.

Киносуратрал агьаммур пикри ссаву бур чирча. Цайра азар къалякъаврия Заннайн барчаллагьрайсса адаминал оьрчI цала аякьалийн лавсун ур ва гьарца хьхьуну дуаьрттай ур.
Халкьуннал ва сурат кьамул дай гьарцаннал личIи-личIину. Аьрасатлувтал цIухлай бур, бяйкьусса хIакинтуран танмихI къакьувкьуссарив тIий. Европанал агьлу цIухлай бур ганал оьрчI авцуну урив тIий. Амма щилчIав къацIувххунни щийнни га адамина лаизлазисса куну, — тIий ур ХIамзат Аминов.