Лакку билаятрал бур хъинну авадансса тарих. Бур цала оьрмурдал кьинирдайну ванил тарих чивчусса чIявусса инсантал.
Цумур чулийнай ургарчагу, Лаккуй бур дуллалимунивун шавкь дутлатисса зунттурду, нехру, хъачIру, бакIурду. Лакрал бур кIива цаннийн ца къаршисса кунмасса учала: «Инсаннал яруннин ххал хьун ччимурди ххал шайсса» ва «БакIрал пикри къабарча, яру ккутIрур» тIисса. Бакъаривла инсаннал хасият чIалачIи дуллалисса учалартту?
Махъсса ряхра шинал мутталий Лакку билаятрайсса ттул даву дархIуну дур Вихьлия Ваччавгу лавгун, махъунайгу укIлакIаврицIун. На ттула макьалалун – эсселун «Ваччату Къянивсса ххуллу ягу шавкь дутлатисса зунттал билаят» тIисса цIа дизав.
Къяннал шяравалу жул шяраваллия архну дакъассар. Га цурдагу Ккуллал ва Лакрал районнал дазуцIухсса шяравалу дур.
Лакрал миллат муданмагу хIукуматрайн дакI тIайласса, ганил тIалавшиннарду лайкьну биттур дуллалисса миллат бур. Амма хIукуматгу мудан цалий дарцIуну диркIун дакъар, ца системалия цамунийн дукIлай, жура-жура хъанай, миллатирттангу, инсантурангу хъинну чIявусса ккавккун бур.
ЦIуну бувгьусса ххуллул сиптачиталну бивкIун бур жула миллатрал чIявусса арсру. Мукунминнавасса ца чаннацIукуну ур Ваччиял шяравасса Гьарун Саэдов.
ХIакьинусса кьинигу Ваччиял шяраву яхьуну дур Гьарун Саэдов увсса, яхъанай ивкIсса къатри. Ванал махъва-махъсса «къаттану» хьусса хIатталугу ванал къатрая архну дакъар. Амма пашманшиву ци дур учирча, вай ванал къатри ва паракьат хьусса кIану хъинну лащинну бур. Ваччиял шяраваллил тарихраву чирчусса цайми-цаймигу инсантурал цIарду кIицI къадулланна. Циван учирча, цу-унугу лях лавгун, ттуйра аьй къадулланшиврул.
ХIазран бакъахьунссар «Лавгмунийн жува ттупанг битарча, ялун бучIантIимунил жуйнма ттуп битантIиссар» учайсса. Битлайнма бур ми ттупругу жуйнма.
Ваччиял лагмасса тIабиаьт ябивтнал дакI дуччин дуллалисса тIабиаьт дур. Шяраваллил дяних нанисса неххал кIивагу чулухух сакин хьуну бур Ваччи. Вана ва ратIнил ца чулия тамур чулийн бивхьуну бур кIива ламу. Хъунмур ламул урчIа чулух бур ца хъунмасса чару, чарийгу чивчуну бур Ваччиял шяраваллин 1500 шин хьуссар тIисса хатI.
ЧIяйннал аэродромрал лултту чулия Ваччиял чулийнмай кIура баллалисса мурцIний цахъис хIаллай аглан хьуну, ябитарча, янилун дагьантIиссар хъинну дакI дуччин дуллалисса сурат: Ваччиял шяравалу, ганил ялув мизит, гилу Хъуннех, кIихуннай СумбатIуллал шяравалу, пагьламантурал шяравун нанисса ххуллул чIаравсса кIива цанниха ца лавхьхьусса Ссала-бакIурду… ЧIяйннаарнил ца зуманив чIалай буссар ччянира шяравалу диркIсса кIанттай бацIан бувсса чарил чIула. Ганил чIарах най буссар Ваччату Хъюйннал шяравун буккайсса ахьттачунал ххуллугу. Га аривсса уртту-тIутIал ядувай ттул цIуллушиву. Гичча датIара на кьакьан дуван даруврал уртту: чIаклул тIутIив, хIухчил чIапIив, ппиринж-тIутIив, гулмадаран ва цаймигу.
Га бахьтта ххуллийх най тихунай шайхту, вил янилун дагьантIиссар Хъуннеххал тиячулийсса пирма.
Тикку 2013-ку шинал ЧIяйннал шяравасса мукьа жагьилнал зузи дурну буссия аьнакIал хозяйство. Ттучаннайн баххан булайва аьнакIив. Ци багьана хьуну кьадиртссарив къакIулли, цIана та пирма зий дакъар. Гьакссагу хIайп, аьнакIул дикIрив нахIусса дикIайва.
Та пирмалийн къаршину, аьтарттул шия чулий, дур Ваччав ва ЧIяв щин дуцин дуллай бивкIсса дачIину кьадиртсса къатрал куцру. Укун жунна хIукуматрал итадакьлакьисса арцу буру жува «аьрщараву дучлай», дуллалимур бакIуйн дуккан къадуллай. Укунмасса иш хьуну бур ччянивагу. Ттун ккарккунни Хъусрал-ЧIарттал шяраваллил лувсса аьтарттуйх бувсса ламул чIаравгу, кIичча щин дуцин дуллай бивкIсса давурттал аьшру. ЦIуйшату Хъюйннал ламучIан бияннин бур муххал турбардугума бивхьуну, утти кIай аьрщараву аьллай бур. Лакку билаят ххирассар тIий, махъру лахълай, къуллугъчитал гьапIран бивзун бикIайхьурчагу, амма мяйжаннугу «бакI цIуцIисса» инсан, нажагь акъа, хьунаакьлай акъар.
Шиккува, ялувсса мурзусса гьанав, на чIивиний бикIайва Ваччав ва ЧIяв ток нани бувну бивкIсса электростанциягу. Утти ва бивкIсса кIанувагу кIул хъанай бакъар. ХIасил, чарий чару ливчIун бакъар. БучIия ва электростанция ябувссаниягу, тарихрал гьайкал хIисаврай. Ахттиял шяравун «Шарвили» фестивальданийн лавгсса чIумал, ттун ккарккуна «Ахтынская ГЭС» тIисса чичругу дусса цIувцIучарил къатри. Шиччава Щуну-Зунттул баргълагавал чулий хъинну хъунисса сунну чIалай буссар. Тарив ччянива кIай суннавасса цанний Таркрай тIисса шяравалу диркIссар тIисса хаваргума бикIай.
ЧIяйннал шяравасса Аьбдуллаев Арсеннул бувсуна ттухь кIичча ЧIяйннал шяравасса ца инсаннал мукьцIалла лафет чартталгума дурххуссар куну.
Таркрай шяравалу диркIссар тIисса кIанттая цахъис ухссавнил чулийнай ургайхту, янилун багьантIиссар сун бувцIусса, чIаврдайх ккур-ккур тIий экьинанисса мукьаха лавхьхьусса кьунтту. Ттун кIай кьунтту лащай цуппа кьабитлай тIий аьтIисса Лакку билаятрал тIабиаьтрал мукьаха.
ЧIяйннал-Ария кияйннай бакI кIура даен дурукун, ххал хьунтIиссар ЯтIувахъаллил дяликIулул ялув бакIрай, тIакьагу дирхьусса кунмасса зунтту. КIа зунттуйн жул Вихьуллал Ххаржан-Зунтту учай.
ЧIяйнна-Арнил дазувун ияйхту, я бацIантIиссар Хъюйннал шяраваллий. Щарнил кьиблалул чулий дуссар ятIулсса кирпичирттая дурсса, хъюйннал цала тIийкун, «аваданчунал» къатри. Гай къатри Дагъусттаннал Халкьуннал Мажлисрал депутат Аьвдуллагь Расуловлул къатрир.
Гукунссагу, гайннуяр ялттуссагу къатри шагьрулий яхъанахъисса бюхъу бусса лакралгу дуварча, жула шяраваллал сийгу, шикку яшавугу хъиннура ххуй хьунссия.
Утти зана хьунну бахьтта ххуллияту ЧIяйннал шяраваллил лувсса шанбачIулийн. Шикку дур дацIан дурну СССР-данул Виричу ЦIаххуй Маккаевлул цIа абад дуллалисса гьайкал. Ва дацIан дурунни ванан 100 шин там хъанахъисса 2017-ку шинал, сентябрь зуруй. Ва шанбачIулия арх дакъа дур хьхьичIава райондалул азархана бивкIсса, утти эяллайн дурксса къатри. Вайннуйн къаршину гьарца ххуллункьини дяххуллий бикIайссар ЧIяйннал базар. Циванни, азархана бивкIсса кIанттайсса эяллугу марцI дурну, шиккусса чарттая дахаллугу дурну, бургъи-гъараву даххулт бацIан къабуллай, вайннан къулайшинна хIасул дуван къабучIисса? Учин мукъун, «базарный сбор» тIий, вайннаягурхха арцу ратIайсса. Вай чун харж дайривав? Ялагу на багъишла итияра ва зат гьаз буллай тIий. ЧIяйннал базаллучIа бакъар хIажатхана. Чунни шиккусса инсантал гьан багьлагьисса? Му ЧIяйннал шяраваллил администрациялийн багьайсса иш бур…
ХьхьичIва ва ЧIяйннал шанбачIулул чIаравсса аэродром Вихьуллаарив бикIайссия. Цалчин Ккуллал райондалий лирксса самолет та ариври лирксса. На аьйкьлай акъахьурча, 1958-кусса шин диркIсса ххай ура. ДакIний ливчIуна самолетрал командиргу МахIаммад ЦIинпIаев тIисса адамина ивкIшиву. Цувагу лаккучу ия. Ялагу дакIнийри арх бакъа канакисса яттил ттурзандалувату ца ку самолетран бахшишран лахъан бувну бивкIшивугу.
ЧIяйннал шяравалу, вайми чIяруми лакрал шяраваллугу хьуннав, лахьлан дикIай анфитеатрданул лагрулуха. ЧIяйннал шяраваллил лултту нанисса ххуллу ца ттуршра метралул баргълагавал чулинмай шайхту, ялагу вания хъанай буссар шанбачIу. Му кIилчинмур шанбачIулия ялавай най ца 100 метра дитайхту, бакIрайн дагьантIиссар ххюл ласайсса Ххюлузан (карьер). Ххуллул лултту чулийх най дуссар чуллу кувссан тартсса ратI, цахъис ялавайну чIалай буссар щаращигу. Га щаращи на чIивиния шинмайва бур. Ххюлузандалия, ттун кIулссаксса, муданмагу ххюл ласлан бикIайва. Га чIумал, утти кунмасса самосваллу, экскаватордугу бакъасса чIумал, колхозирттал бортовой машинарттайн бичайва ххюл чIатIрах. Яла, аьркинсса кIанттайн бивукун, чIатIрахва кьатIгу байва. Циваннивгу къакIулли, ваксса чурххайн гуж биллалисса давурттай жул Вихьуллал шяраву ххуллул бригадалуву зузими циняв хъами бикIайва. Миннал бригадирнугу икIайва Хъундяъвилул гьурттучи, ца ка дяъвилий кьадиртсса, МахIаммади тIисса адамина. Укун жула ниттихъал ябуллай бивкIссар зунттавусса шяраваллал дянивсса ххуллурду.
Яла га ратIнил баргълагавал чулиннайсса дуламанттуй зун бацIан багьантIиссар – ца тIабиаьтрал аьламат ххал дуван. РатIнил тия чулийсса кIачIа хьусса аьрщарал дянив ххал хьунтIиссар виххуччал ща, тайннул ялувгу – марцIсса аьрщарал ацIра метралуяр ххисса ганзшиврийсса къат дуссар. Ганил бусласиссар ччянива укун лахъну най бивкIшиву Хъуннеххал аьтара. Ялагу тарихчитал, экологтал буслай бур хIат-хIисав дакъа ччянивасса Вихьуллаар хIасул хьушиву Ссухъиящиял махъсса зунтту ччех бивкIун. Му чIумал дарщуну диркIун дур Хъуннехгу.
Шиччава Хъюйннал шяраваллил лувсса ламул ялтту ябитарча, тиккугу чIалай дуссар укуннасса щамарал ялувсса аьрщарал къат. Ва хъанай дур чIярусса шиннардий неххал лув дагьлай диркIсса гьагълил къат. Цуксса хIал хьуну биявав Хъуннех дарщуну?
Хъюйннал шяравалу дирхьуну дур Хъуннеххал зуманицIухсса мурзусса минхълий. Яла, ттун кIулну, 1960-ку шиннардияр махъ хьунни Хъюйннал неххамачIувмур шяравалугу. Вай шиннардийнин зунттавусса шяраваллаву къатри дувансса кIантту къабуллан бикIайва бакIлахъру ласун шайсса аьрщи дусса кIанттурдай.
Шяраваллил лултту чулий 1960-ку шиннардийва бувсса ламу махъсса шиннардий нигьачIину буссия. Вана утти, 2019-ку шинал дайдихьулий, ламу цIусса буллан бивкIунни. Ламу цуппагу ялтту чулийх бухмур ламул чIарах буллай бур.
На чIярусса шинну дурссар мелиорациялул давурттай зий. Бувссар прорабну зий ламурду, бартхьхьири (плотина) ва цаймигу стройкартту. Мунияту на ва бухмур ламу зия шаврил хIакъиравусса ттуламур пикригу бусан ччай ура. Ва укун зия хьуну бур ххуллул зузалтрал биччибакъулшиврийн бувну. Хъюйннал чулуха гьанату нанисса щин ламул зумардийсса буржирдавун дагьну, яла гай микIлачIлай, даслай, буржру бур хъя куну. Гай щин хьунссияхха чIарах дишин. Укун, буржру сукку шайхту, лархIуну дур муххал бургъурдая дурсса ригеллу. Амма, ттун кIулссаксса, ва ламу бувайни хIисавравун лавсун бивкIун бакъар ванийх чIярусса кIушивуртту дусса машинартту занан бюхъайшивугу. ТIайлар, ламу буллай бивкIсса 1960-ку шиннардий къабикIайва, утти кунмасса, 10-нния лирчусса тоннарду ласайсса «Камаз» машинартту. Вайннул лахIан дурну дур ригеллу.
Ламул лултту чулий, неххаяту мукьра-ххюра метралул лахъну, зул янилун багьантIиссар ца хъунмасса кьасса, киражрал ранг бувни кунмасса кьун. Бакъаривла махIатталсса иш, га кьун бур бургъил кIиришиврул бассан буллай, кIяла лаган бувну. ГаничIава бур чIивисса кьунттул хьхьичI бивщусса, мицIгу бучIан бувсса, кIалабарз. КъакIулли ва инсаннах бивщусса чару буссарив, юхссагу щил-дунугу цIа абад дуван бивщусса буссарив. Чарийсса чичру аьраб хIарпирдайсса дур. На цIухлай уссияв Хъюйннал арамтурахь, амма миннангу кIалабарз бушиву кIулну бия, ванил «хавар» къакIулну бия. Шиччара чIалай дуссар ЦIуйшиял чулуха нанисса неххал урчIа чулийсса ца лирсса гьарахъалугу. Яхьуну бур гьарахъалттил чIиртту, щин ххурупIайлийн тIайла дувайсса тIаннул кьуму. Амма га гьарахъалу зий диркIсса чIунну ттун къакIулли.
Гания гихуннай, Хъуннеххал суннил чулий, на оьрчIсса чIумал дикIайва шанна гьарахъалу. БакIрайсса кIира гьарахъалу мудан гьаянсса къалмул дурцIуну дикIайва. Шамилчинмур гьарахъалттийн «Адамлул гьарахъалу» учайва. Ганая жул Вихьуллал инсантал рязину къабикIайва. Вайминнал ца дарваграя ссахI маркIачIилул ласайни, ганал кIира ласай тIий бикIайва. Мунияту ганачIа къама гьаянгу яржа ччяни бияйва. ЧIяруну ттул нинугу гихун лагайва: «Утти ца ссахIлил ялув кьинирду гьан дуллан къахьунссар гайми гьарахъалттай», — тIий. Амма Адам цува хъинну къама гьаян увкIманал хIурмат буллалисса, на кунмасса мюрщи оьрчIру ххирасса адамина икIайва. Улахъ бакьинсса ппал, гьарахъун увкIманал чул бансса кIанттугу АдамлучIа дузалсса бия. Уттизаманалул мукъурттийну учин, хIалурду хIасул дурсса (сервис) гьарахъалу дия. Нагу лавгссара ниттищал цимилагу га гьарахъун.
Хъиривгу буссар
