Чакъал

КутIасса справка

Цила зумуну ца сси­гъарисса цIагу дусса Чакъаллал шяравалу ду­ссар Щуну-Зунттул ухнил урчIамур чулий, Ваччату ца 4 километралул манзилданий, 1-мур ЦIувкIрав нанисса ххуллул урчIах.

Бусласимунийн бувну, кIикку цIу ппурттуву диркIун дур ЧIяйннал мащи. Яла, чан-чанну тIий хъунна хъанай, ахиргу сакин хьуну дур чIири-хъунсса шяравалу.
1933-ку шинал Чакъалив тIивтIуну бур шяраваллил совет. Мивун духлай диркIссар кIа даралуву­сса ялагу мукьра шяравалу: Къичурлухи, Бярнихи, Тукъатул ва Оьллауртти.
Колхозру сакин дурну махъгу мира шяраваллал аьмсса колхозрал правлениягу бивкIун бур кIава Чакъалив. Цахъи махъ тIивтIуну бур кIиккува байбихьулул школагу, изба-читальнягу. Учительнугу му ппурттуву зий ивкIун ур Закарижа МахIаммадов тIисса инсан.

ЦIуссалаккуйн бизан буллалисса чIумал Чакъаллал шяраву диркIун дур 70 тIюва.
Хъунмасса Буттал кIанттул цIанийсса дяъви байбивхьусса шинал Ча­къалия аьрайн лавгун ур 33 чув, минная 18 къазана хьуну ур махъунай.
ХIисавравун ласунсса затну ккалли бан багьлай бур ЦIуссалаккуйн дизан дурсса кIай цинярдагу шяраваллал инсантуравату так ца Чакъаллал шяраватусса Ибрагьимхъал Ися тIисса инсаннахьхьун махъунай цала буттал миналийн зана хьунсса изму буллуну бикIаву. Му ихтияр дулаврицIунсса хъунмур аргументнугу хьуну бивкIун бур хасну муна му ппурттуву Исял кIия арс аьрай ивкIуну ушиву – МахIаммад ва Паша, миннацIун куяв ХIусайнгу. Занагу хьуну ур Ися зунттавун цала душ Лайлищал ва душнил арс МахIаммадащал.

КIа Чакъаллал шяраваллил рухI ядуллайгу махъсса чIярусса шиннардий буссия му МахIаммадагу, мунал кулпат Зумрутгу. МахIаммада уттигъанну аьпалухьхьун лавгунни. Цал бунагьирттал аьпа баннав.
ЦIуссалаккуйн бивзун мукьах Чакъаллал жямат миналул хьуну бивкIссар Чапаевкаллал шяраву.