Ларгсса алхIаткьини ва итникьини агьали, Кьурбан-байран дуллай, хIайвант бихлай, цадакьартту буллай бия.
Москавлив Кьурбан-байрандалул кьини мизитирттавун сайки 240 азара инсан бавтIшиву баян бунни Москавуллал национал политикалул департаментрал хъунама Виталий Сучковлул. Жяматийсса ишккакку Аьвдурашид Саэдов буслай ур, Москавуллал чIаравсса Раменское райондалийсса мизит бувцIуну, чIявусса агьлу кьатIувва чаклий бавцIуну бивкIшиву, сайки гьарца мизитрачIагу вара сурат диркIшиву. Бувсунни мизитрал имамнал микрофондалувух дурккушиву Москавуллал областьрал губернаторнал барча буллалисса телеграммагу.
Аьрасатнал бусурмантал барча бунни Президент Владимир Путиннул ва Дмитрий Медведевлулгу. Дагъусттаннал агьали барча бунни республикалул хъуниминналгу. Вице-премьер Артём Здунов ва ХIукуматрал ва БакIчинал Администрациялул хъунама Владимир Иванов бивунни муфти АхIмад- хIажи АьбдуллаевлучIангу. МахIачкъала шагьрулул мэр Салман Дадаев байрандалул кьини ивунни Ятинсса ва ургала акъа ливчIсса оьрчIру тарбия буллалисса школа- интернатрайн. Ванал бувсунни шагьрулул агьлу интернатрайн кьурбандалул дикI диян дуллай бушиврул цувагу ххари увшиву, вайва гьантрай интернатрайсса оьрчIру «Дракон», «Акваленд» паркирдавун буцинтIишиву. Гьар шинах кунна, Кьурбан- байран гьашинугу хьунни инсантурал дакIурдиву рахIму- цIими ххи буллалисса давуну, исламрал ххазинартту ва рувхIанийсса ххуйшивуртту цIу лагаврил ххуллийсса шану.
