Хъин-хъинми проектру хъин ритлан

[dropcap]А[/dropcap]вгустрал 13-нний Пятигорскалий байбивхьунни гьар шинах шайсса Ухссавнил Ккавкказуллал жагьилтурал дуккаврил форум «Машук-2019». Муний гьуртту хъанай бур Дагъусттаннал жагьилтурал делегациягу.


Га кьини форумрай жагьилтал хьунабавкьунни региондалул субъектирттал бакIчитуращал. Форумрал лагрулий ДР-лул БакIчи Владимир Васильев хьунаавкьунни Дагъусттаннал жагьилтурал делегациялущал. Жагьилсса профессионалтурал ккаккан дунни экологиялул, дуккаврил ва туризмалул темардаясса цалла проектру. Дагъусттаннал БакIчинал мурадлувсса идарарттайн тапшур бунни хъинми проектру дузрайн дуккан даврил ялувбацIаву дуллан. Владимир Васильевлул мукунна жавабру дуллунни форумрал делегатътурал буллусса, жагьилтурал сиптардацIун кабакьаврил хIакъиравусса суаллахьхьун. Гьашину буллалисса форум ацIулчинссар.

[dropcap]В[/dropcap]аний дур чIярусса дуккаврил ва культуралул программартту. СКФО-рал субъектирттаяту шикку гьуртту хъанай бур 2500-я ливчусса инсантал. Ми циняв гьуртту хьунтIиссар цалла проектру дузрайн дуккан дансса грантру ласаврил хасъсса бяст-ччаллавух. Грантру дур 300 азарда къурушрайн диянуксса. Гьашину Дагъусттанная ккаккан увну ур 500-я ливчусса инсан. ДукIу гьуртту хьуну ивкIссар 399 инсан, минначIа диркIссар 166 проект. Га чIумал грантру ласаврил чулуха дагъусттанлувтурал 1-мур кIану бувгьуну бивкIссар.

ХIакьину, августрал 13-нний, форумрал лагрулий хьунни Ухссавнил Ккавкказуллал федерал округрал Кьини, муний ккаккан дунни личIи-личIисса регионал творчествалул программартту.

ХIадур бувссар
ХI. Аьдиловлул