Дагъусттан Республикалул Конституциялул Кьинилун хас дурсса шадлугъру хьунни щаллара республикалий, миннувасса агьаммурдив дия республикалул хъуншагьрулий – Филармониялул Гъинттулмур майданнив.
Бадрижамал Аьлиева
Шадлугърайсса батIаву тIитIлай, бавтIми барча буллалисса ихтилат бунни ДР-лул Халкьуннал Мажлисрал председатель Хизри Шихсяидовлул. Цалва ихтилатраву мунал кIицI лавгунни 1994-ку шинал кьамул дурсса КонституциялуцIун бавхIусса агьамсса кIанттурду, дакIнийн бивчунни жулла республикалий 1999-ку шинал хьусса ишру. Шиккува кIицI лавгунни Аьрасатнал ПаччахIлугърал Думалул кIилчинсса дуккавриву кьамул дуршиву «О ветеранах» тIисса Федерал закон, 1999-ку шинал август-сентябрь зурдардийсса аьрали иширттавух гьуртту хьуминнайн дагьайсса.
Ихтилатру мукунма бунни ДР-лул ХIукуматрал председательнал цалчинма хъиривчу Анатолий Карибовлул, республикалул министерстварттал бакIчитурал, депутатътурал, шагьрулул администрациялул ва жяматийсса организациярттал вакилтурал.
Ихтилатирттая махъ бавтIминнан хъуннасса концерт ккаккан дунни республикалул районнаясса ва шагьрурдаясса творчествалул коллективирттал. Концертравух гьуртту хьунни дунияллул халкьуннал дянивсса «Ччаврил музыка» фестивальданул директор Наталья Орлова ва Финляндиянавасса дирижер Маркку Лааксогу.
