ПаччахIлугърал наградарттан лайкь хьунни

[dropcap]И[/dropcap]юльданул 26-нний ДР-лул Конституциялул кьини МахIачкъалалив Дусшиврул къатлуву личIи-личIисса арардаву хьхьичIун ливчусса дагъусттанлувтуран дуллунни паччахIлугърал наградартту.


Наградартту дулун хьхьичI ДР-лул БакIчи Владимир Васильевлул бувсунни ДР-лул Конституция кьамул даврил мурадрал хIакъираву. Республикалул каялувчинал тIимунийну, Конституциялийну бювхъуссар сахла дуван республикалул цашиву ва щаллушиву, цIакь бувссар демократиялул дузалшиннардал гьанурду, инсаннал ихтиярду, тархъаншивур­тту, законну лаваймур даражалул ххазина бушиврун ккалли бувну.

Владимир Васильевлул Чувшиврул орден дуллунни Ялув УбекIимащиял шяраватусса Рабадан Рабадановлун (ивкIуну махъ) гражданшиврул бурж бартбигьаврихлу. Награда дуллунни ганал уссихьхьун. ЗахIматраву хьун дур­сса хьхьичIуннайшивурттахлу ва чIярусса шиннардий лажин кIялану зузаврихлу, ДР-лул ХIукуматрал Председательнал 1-ма хъиривчу ХIажимахIаммад ХIусайновлун дуллунни «Ватандалул хьхьичI лайкь шаврихлу» тIисса I даражалул ордендалул медаль. Ветерантурал давурттаву хьхьичIуннайшивуртту хьун даврихлу ва жагьилтал Ватан ххирашиврий тарбия баврил иширттаву чялишну гьуртту шаврихлу «Дагестанский Союз ветеранов Афганистана» тIисса республикалул Жяматийсса сакиншиндарал председатель Нажмуттин Акаевлун ва «Махачкалинский городской совет ветеранов Афганистана» тIисса жяматийсса сакиншиндарал председатель Аьлисултан Аьлисултановлун дуллунни «Ватандалул хьхьичI лайкь шаврихлу» тIисса II даражалул ордендалул медаллу.
Цинярдагу наградартту дуллунни 43 инсаннан.
Гара кьини ДР-лул БакIчи Владимир Васильев гьуртту хьунни ДР-лул ПаччахIлугърал премияртту ва Расул ХIамзатовлул цIанийсса премияртту дулаврил шадлугърайгу.
ПаччахIлугърал премиярттал лауреатътал хьунни 10 инсан ва Расул ХIамзатовлул цIанийми премиярттал­сса – 2.

ХIадур бувссар ХI. Аьдиловлул