Ларгсса нюжмардий «Дагестан» РИА-лий «Яла язима 100 ишбажаранчи» тIисса республикалул конкурсран хасъсса пресс-конференция хьунни. Ваний гьуртту хьунни ДР-лул Ишбажаранчитурал чIарах бацIай центрданул каялувчи Загьиди МахIмудов.
З.АьбдурахIманова
Конкурс даврил хъунмур мурадгу бур Дагъусттаннай вихшала дишин бучIисса лахъсса даражалул бизнес душиву ккаккан бансса.
-Жу оьвтIий буру ва конкурсравух гьуртту хьун гъира бусса, низамрал ххуллий цала бизнес дачин дурсса, налогру дуллалисса, хIукуматрал цайми тIалавшиннарду биттур дуллалисса гьарцагу ишбажаранчинайн. Зува бизнес дачин дан кIулсса пишакартал бушиврия агьалинахь бусаврил зур духхинтIисса, зунмар хайр-мюнпат хьунтIисса»,-увкунни ванал.
Гьашинусса конкурсгу, ларгмур кунна, дачIинтIиссар личIи-личIисса номинациярттайх. Цавайннаща бюхъантIиссар цала предприятиялул республикалул социал оьрмулуву бугьлагьисса кIанттуя бусан, цавайннащагу экспортрайн ци хъус дуккан дуллай буссарив ккаккан бан ва гайми номинациярттайгу гьарцаннал цала бюхъу ккаккан бан.
Гьурттучитурая аьрзри кьамул бувну махъ миннал бизнесрал ккаккияртту ххал дувантIиссар экспертътурал ва яла, сайтрай бувчIавурттая баян бувну, чIурду булаврийну язи бугьантIиссар яла хIарачат буллалисса 100 ишбажаранчи.
Конкурсрай гьуртту хьун ччиминная аьрзри кьамул буллай байбивхьуссар августрал 5-нния декабрьданул 1-нин.
Аьркинсса информациялущал кIул хьунгу бюхъантIиссар 100rd.ru сайтрай.
