Авгъуст зурул гьантрай 1999 шинал дяъвилул цIарахьхьун дирирссар Дагъусттаннал цаппара щархъурду. Чапхунчитурая Ватан дуручлай, оьрмурдацIа хьуссар Дагъусттаннал язисса арсру.

Ккавкссар жула оьрчIан дяъви. БивкIссар ми лихъачалтну. Тания шиннай ларгунни 20 шин.

---

Зулайхат Тахакьаева
Цалчин чапхунчитал ххявхссар ЦIумадиял райондалийн. Агьали кьянкьану данди бавцIуну, къаивтссар душман цала аьрщарайн уххан.
Август зурул 3-нний, Агъваллал аьрщи дуручлай, оь экьибувтIуссар Кьубиял шяраватусса аьрали хIакин МахIаммад Берцинаевлул.
Бюхттулну бия ЦIумадиял райондалул жяматрачIа виричунал кулпатрал хIурмат. Вай цумур-дунугу мероприятиялийн Агъвалив нанисса чIумал, щалла щар дуккайва райондалул дазуйн хьунабакьин. Мероприятиялийн бучIайва чIаххувсса Бущихъиял ва Аьхьхьа­хъиял районналссагу жямат. МахIаммадлул ниттил Ххадижатлул хьхьичI кьяпригу ливккун, бакI кьус ритайва администрациялул ва РОВД-лул зузалтрал.

— Шамагу виртталну ливтIусса жагьилтал къабивкIссания, бюхъайва Чачаннаву кунмасса дяъви ххаваххангу. Жула аьрщи дуручлай, оьрмурдацIа хьу­сса жагьилтуран жу оьрмулухун буржлувссару. Хаснува Берцинаевлун, яруссаннал аьрщарай оь экьибувтIусса лаккучунан, мунал кулпатран, тухумран, шяраваллин, щалагу миллатран. Цала Ватан ядан буржлувсса райондалул милицалтравасса цаппара боевиктурал канийнгума лавгун бивкIссар. Ярагъ кIунттил бугьан бурж ба­къасса МахIачкъалалия увкIсса хIакин, лаккучу МахIаммад тIурча, хIучIгу къакуну, душманнайн лажинну авцIуссар. Жул дакIурдиву га абадлий личIантIиссар, — тIий бикIайва Агъваллал агьлу, виричунал ни­ттийн барчаллагьрай.

Чумартсса дакIнил заллу бия Ххадижат, аьпабиву. ТачIав къабавссар ганил зумату «Ссал цIанийри ттул арс ивкIусса?» тIисса калима.
Чапхунчитал ххит бувну 10 шин кIицI лаглагисса иши­райнгу лавгун, махъунмай нани ххуллий та данди бу­ккавриву ливтIуминнан дацIан дурсса гьайкалданучIа къуллугърай бавцIусса полицалул зузалтрачIангу гъан хьуну: «На махъва-махъссарача шийн бувкIсса, хъамакъабитулун ва оьрчIачIа ттул сурат рищара», — куна ниттил. Муния махъ барз ва бачIи къалавгун цуппагу дунияллия лавгуна.
Ликкурттай бавцIунни Ма­хIаммадлул арсругу. Хъуна­ма Зураб, Дагъусттаннал па­ччахI­лугърал медакадемиягу къуртал бувну, зий ур Санкт-Петербурглив. Саэдгу ур цала маэшатрай.

Шагьрузат, Берцинаевлул кулпат:
— Ттун МахIаммад ЦIумадав лавгссавагу къакIулссия. Тай гьантрай на оьрчIащал ттула нитти-буттачIа Буйнакскалий буссияв. МахIаммад жу буцин учIан аьркинссия. КъаувкIукун, командировкалий лавгхьун­ссар тIий буссияв, цанчирча ганал на тачIав ялугьлагьи къабайвав. Га кьини циняв бур ттухь, МахIаммад чуври тIий, щак-щуклий цIухлай. Гъан­сса хъамитайпалун телевизорданувух ЦIумадиял райондалий хъанахъисса иширттая бавну ва кIикку ливтIуминнавух МахIаммад Берцинаевлул цIагу бавну, фамилия кIулсса дурхха тIий, гъан-маччаминначIан телефондалувух оьвтIий бивкIун бия. МахIаммадлул канийн щаву дирну дусса дур куну, нитти­уссил бусайхту, ттуйва бияла бакъа вев учав: «Канийн щаву диян га чув ивкIссар?!» — куну. Къа­ккавкссар МахIаммад ивчIаннин я ттуна, я оьрчIан. Дяъвилул иширттаву ивчIаву бакъасса, цукун ивкIуссаривгу жун къакIула. МукьцIал лавхъун махъ жуннийн жижара бан бувкIуна кIикку ивкIусса ХIусайнов Закарьянал ниттиуссу Якьуб ва Дагъусттаннал ХIукуматрал жагьилтурал иширттал комитетрал зузала МахIаммад ХIабибов. Гания махъ ЦIумадиял райондалул администрациялул чулуха жуйн оьвкуна дяъвилул иширттаву ливтIуминнан гьайкал тIитIлатIисса чIумалгу, чапхунчитал ххит баврин хас дурсса мероприятиярттайнгу. ЦIумадиял райондалул администрациялул ва РОВД-лул зузалтрал жул кулпатрах хъуннасса къула­гъас дурссар, хъунмасса хIарачат бувссар, МахIаммадлун Виричунал цIа тIалав дуллай.

Биюкагъа Лачинов, МахIач­къалаллал 102-мур бригадалул оператив зузала:
— МахIаммад ттул хьхьи­чIун­­сса дус-ихтиваръя. Га ия хха­ллилсса инсан, лавайсса даражалул хIакин. Август зурул кIилчинмур кьини на шава игьалаглай уссияв. ЦIумадиял райондалийн чапхунчитал ххяв­ххун бур тIисса леххаврий на даврийн учIан увнав. Аьралий частьрал хIаятравун уххайхтува, ххал хьунни гьаваллавун гьаз хъанахъисса вертолетрал чIавахьулттивух уруглагисса МахIаммад. МахIаммад игьалаглай шава икIан аьркинссия. «Ина чунна, Магай, вий дежурство дакъархха хIакьину», — тIий, цIухлай ура, лавайгу уруглай. КIарив, мудана куна, пиш-пишгу тIий, ттуйн ка кIутIу дуллай ур. Ххишала ттун МахIаммад ххал къавхьуссар. Хъиривмур кьини гара вертолетрая аьралий частьрал хIаятраву МахIаммадлул жаназа ликкан дуруна. 17 ккулла щуну бия. Ярагъ кIунттил бугьан МахIаммадлуй бурж ба­къассия, ганахь цаламур ярагъ буссия – хIакинналмур. Цала яруннил хьхьичI чапхунчитурал кIия жагьил, ЦIумадиял РОВД-лул зузалт литIайхту, гайннал ярагъгу лавсун, ххявххун ия душманнайн лажинну. Цала ялун ккуллардал ларчIун дуна, урчIа боевикгу ивкIуну, ацIнияссаннайн щавурду диян дурну дия. Къабювхъуссар ттуща дуснал ка махъра-махъсса дугьан. Амма МахIаммадлул виричусса аьпа мудангу уттавассар.