БачIи оьрму аьрщарай, бачIигу ссавруннай бувтсса, бутлатисса инсаннащалсса ихтилат.
Август зурул 18-нний Аьрасатнаву кIицI лаглай дур Гьавалул флотрал зузалтрал кьини. Авадансса ва пахру бан лайкьсса бур лакрал миллатрал тарих цаннаяр ца цIанихсса авиатортурал чулухатугу. Цал архIал жаваблувссагу, захIматссагу ва романтикалул вибувцIуссагу бур летчикнал оьрму. Дагъусттаннай хъанахъимунивух ва лакрал миллатрайн багьайсса гьарцагу иширавух та-ухьурчангу чялишну гьуртту шайсса чув, цала ттинин бартбивгьуцири иширттайну кьадру-кьимат хIалал бувсса инсан ур Акбардул арс Жабир Абакаров. Жу цал уттигу гъирарай хьунабавкьуру ванащал, барду чIиви-хъунсса ихтилат.
— Жабир, буси вила авиациялувунсса ххуллия, летчикнал пиша язи бугьан ци савав хьуссарив?
— Летчикнал пиша ттул оьрчIнийвасса хияллаву загьир хьусса пиша бия. ТачIав хъамакъабитай, жула шяравучу, летчик, ЦIимпIаев МахIаммад Ваччав левххун увкIсса чIумал, кIа жулламур шяраваллил ялттугу гьанан икIайсса чIунну. Му ппурттуву дагьуна ттувун летчик хьунсса шавкьгу.
1971 шинал Хъусращиял школа къуртал бувсса кIива выпускравасса 24 оьрчI лавгссия Бакуйн медкомиссия буван. Тани хъинну ялув бавцIуну буллан бикIайва медкомиссияртту. Ца ппурттуву, комиссия буллай инжит шаврил, ттун хIатта махъунай зана хьунсса пикригума хьуна. Жул дакI дуллай, шаймунил кумаг буллай, хъинну чIарав авцIуссия ЦIимпIаев МахIаммад. ЧIявусса бия тай шиннардий летчиктал хьун ччисса Дагъусттаннаясса оьрчIру.
Абакаров Жабир Акбарович увну ур Хъусрахь 1954 шинал февраль зурул 2-нний.
1971 шинал увххун ур Рязаннал областьрайсса Сасовский училищалувун.
1984 шинал бувккуну бур Дагъусттаннал политехнический институтрал инженер-механик шайсса факультет.
1988 шинал къуртал бувну бур Ленинградуллал граждан авиациялул академия. 1973 шиная шинмай цала щала оьрму бавхIуну бур авиациялущал.
Жабир Акбарович ур 1-мур классрал пилот, техникалул элмурдал кандидат, ДР-лул лайкь хьусса транспортрал зузала. 10 000 лирчусса дур ванал гьаваллаву лехлай гьан дурсса ссятурдил сияхI.
Зий ивкIун ур АН-2 самолетрал 2-ма пилотну, АН-2 самолетрал командирну, АН-24 самолетрал 2-ма пилотну, Ан-2 ва Ан-24 самолетирттал эскадрильялул командирну, леххаврил кьюкьлул командирнал заместительну, МахIачкъалаллал цачIун дур авиациялул командирнал 1-ма заместительну. 2016 шиная шинай зий ур Дагъусттаннал авиакомпаниялул генеральный директорнал маслихIатчину.
Лайкь хьуну ур ХIукуматрал бусравсса наградарттан.
НигьачIийсса ишираву (эстремал тагьар дусса) чувшиву ккаккан даврихлу дуллуну дур ванан «Граждан авиациялул отличник» тIисса хIурматрал лишан ва теракт хьун къариртсса чувшиврухлусса ДР-лул ХIурматрал грамота.
2000 шинал террорданул дазу дурсса чувшиврухлу дуллуну дур Аьрасатнал ПаччахIлугърал «Дусшиврул орден».
ДакIния къабуккай, дурагу 18 къурушгу дуллуну нитти-буттал, нава дуклан тIайла увксса чIун. Миннуягу 5 къуруш поездрах дуллуссия. Нину-ппу цивппагу къаршину бия, ччай бакъая миннан ттуяту летчик хьуну, миннан му пиша нигьачIисса пишану чIалай бия. ТIайлассар, дуклан увххун махъ тIурча, бутта пахрулий икIайва. Мунан цанма самолетраву пассажиртал щябитайшиву кIулнувагу къабикIайва. Самолетрай леххан тIурча буттан нясив хьуссия, цува ивкIуну, шяравун лавсун нанисса чIумал. Му оьрмулуцIа хьуна Каспийск шагьрулий. Та зунттал щархъавунсса ххуллурду лавкьусса, самолетру леххан къахъанахъисса, оьсса микIлачIру-дяркъу дусса чIун дия. Ттул талихIран, кIюрххицIунмай баргъ бивтсса чаннасса кьини хьуна, нагу ппу самолетрай лавсун лавгссияв.
— ДакIний бурив цалчин гьаваллавун гьаз хьусса чIун — асарду?
-Сасовский граждан авиациялул училищалуву ккалай ца шин хьувкун, чара бакъасса программа дия, парашютрая тIанкI учин байсса. Ми учениярттая махъ ттухьхьун леххаврил сант бигьану диривуна. Навагу хьхьичI леххан ккаккан бувминнавух цалчин леххан увнав. Гьай-гьай, цалчин нава самолетрал штурвалданух щяивкIсса чIун оьрмулуву хьусса ца яла яргмур иширан ккалли бара.
[pullquote]Самолетрай леххансса мутта, аьпабиву, ттул буттан нясив хьуссар, цува ивкIуну, шяравун лавсун нанисса чIумал.[/pullquote]
Гания гихунмай самолетрал командирну, инструкторну, самолетирттал эскадрильялул командирну лехлай ивкIссара ва хIакьинусса кьининингу зий ура Аьрасатнал Транспортрал министерствалул авиапредприятиярттай.
— Ина зузисса чIун тIайла дарцIусса билаятрайсса тай яла паракьат дакъасса, экономикалул кризис ялун дирсса 90-ку шиннардий бигьану бакъахьунссия аэропортрал иширттангу?
— Аэропортрай мудангу каялувшиву дуллай бивкIссар даврил опыт бусса профессионалтал. Тай шиннардий аэропортрал директорну уссия Алексей Жабраилов. Мунащал архIал жу МахIачкъалаллал аэропортрая хьхьичIра-хьхьичI лехлахи дуллай байбивхьуссару Ту-154 самолетру. ТIайлассар, тай чIунну бигьасса къадиркIссар. Рейсру чансса дуну зузалтран 7-8 зуруй харжру булун къахъанай бикIайссияв. Гьай-гьай, тай шиннардий жул авиациялийнгу щавщи бивссар. Ххишалдаран, Чачаннавусса дяъви сававнугу биялсса зараллу бивссар. Та ппурттуву дацIан дурну диркIссар чил билаятирттайнсса рейсру. Ци чулийгу, ми захIматшивурттава буккан хIарачат бувна Алексей Жабраиловичлул.
— Жабир, хьуссарив вил практикалуву инава нигьачIавурттавун агьсса , захIмат- жапасса ишругу?
— МахIатталсса иш, сайки гьарица оьлуркъусса тагьарданийн нава тIайла ацIайвав. ЧIунну дия бусан къашайссагу. Москавлия дуркIсса самолетрал колесо пIякь увкуну, му провокациялун хIисав бувну, бувкIун кIюрххицIун изан увну шания увцуну ивкIссара допросрайн. Му дия аэропортрал территориялийн щихчIав — ссахкIуй вичIигу къадирхьуну, бигьанма машинартту буххайсса чIун. Ттупангру, ярагъру лавсун самолетраву левххун бачайва инсантал. ХIукуматрал органнаща бюхълай бакъая низамрал хъирив лаян. Амма, цукунсса ци захIматшивуртту диркIнугу, пIякь учин бавуртту, ягу теракт хьун къаритансса хIарачат бувссар цинявппагу зузалтрал кумаграйну. Шаннахъул шиннардий му режимрай зий, шилтагъшиву хьун къариртссия. ХIатта му ппурттуву кIилла теракт дан кьаст лархIунугу диркIссар.
Ца ппурттуву Ростоврая Ашхабадрайн лерххун нанисса зувияхъул инсантал бусса Як-40 самолет кIия террористнал, вайксса арцу къадулурчан пIякь учин данну тIий, дургьуну бивкIссар. НукIува кIицI лавгсса куццуй, ми иширттайн мудан на бакIрайн агьайвав. Хьхьувай ссят кIинний, ярагъуннил дурцIусса самолетрачIан аэропортрал милицанал начальник Оьмар Тупалиевлущал ярагъ цичIав бакъа лавгун, цалчинсса ихтилат бувссар террорист цахъигу хIаллай аглан аву мурадрайсса. Гания махъ, инсанталгу ххассал бувну, самолет леххайсса полосалиягу арх дуцан дурну террористътуращал пIякь учин дурна.
Яла муния махъгу Ашхабадрайн лерххун нанисса 48 пассажир усса Ан-24 самолет террористурал аэропортрай дургьуну диркIссар. Му самолетгу, пассажиртурангу зарал къабиянну тархъан дан бювхъуссия. Муния шихунмай Туркманнал президентнал Дагъусттанная Ашхабадрайн самолетру леххансса ихтияр къадуллуна. ЧIявусса Дагъусттаннаясса инсантал бикIайва тай шиннардий Туркманнаву ялапар хъанахъисса, ми ишру сававну азурдашиврухьхьун биривсса.
— Гьашину кIицI лаглай бур Дагъусттаннайн ярагъуннищалсса къачагътал ххявххун бивкIсса пашмансса юбилей. Ватандалийн кьини дурксса гьантрай диялсса гьурттушинна дурхьунссия граждан авиациялулгу. ДакIнийн багьлан бикIайрив тай гьантри?
— 1999 шинал август зуруй на уссияв аэропортрал хъунаманал буржру биттур буллалисса къуллугърай. ДакIний бур, зунттавусса ттуйнма республикалул хъунаманал оьвкуну, учIан увсса куц. Мугьлат бакъа, лавгссияв аэропортрайн. Жуй, яни аэропортрай, бивхьуна дяъвилул ишру нанисса Бущихъив, ЦIумадиял ва ЦIунтIиннал районнайн аьрал ярагъуннил, дукиялул щаллу баврил масъала. ЧIявусса аьрал, хъунисса, кIусса самолетру кьамул дуллансса ихтияр дакъассия тани аэропортрахь. Суткалий 70-нния лирчусса самолетру кьамул дуллай, хасъсса режимрай зий бивкIссару. Яла кьурчIи бизансса затну шайва, кIюрххил жува кIиккун биян бувсса инсантурайн щавурду дирну, ягу оьрмурдацIа хьуну, мура вертолетрай махъунмай бувцуну бувкIсса чIумал. Миннащал цимилагу ттунма леххан багьайва, инсантал мобилизовать булланшиврул.
Аэропортрай диялсса ччуччия дакъа, республикалул БакIчинал ттуйн оьвкуну, амру бувна му масъала дузал бан. ЖучIава дяъви бухьурчангу, арцу дакъа ччуччия дулун щинчIав ччай бакъая. Мукунсса тагьарданувун агьсса ппурттуву дакIнийн багьунни Волгоградрайсса ччуччиялул заводрал хъунаманайн уккан. Та заводрал хъунама ия лазгиричу, цувагу 40-хъул шиннардий Дагъусттаннайн къаувкIсса инсан. МахIаттал хьура — оьрмулуву цал ихтилат бувсса инсаннал арцугу дакъанна, 2000 тонна ччуччиялул итадакьин дуруна. Амма ми ччуччия Къизлардайн дирсса чIумал, гичча итакъадакьлай, цикссагу ккавкссар. Гайннан ччай бия, ччуччия дацIан дурну, аэропорт зун къабитан. Ччуччиялул хъирив уклакисса ппурттуву хIатта нава оьрмулуцIа ан кьаст лархIусса ишругума хьуссар. Цуксса оьрму ххиранугу, нигьачIавурттая махъунай къавхьуссара.
Тай дяъвилул иширттал ппурттуву Владимир Путиннущалсса хьунабакьавурттугу хьуссар. 2000-ку шинал Грозналийсса аьралуннахь ЦIусса шин барча дан Владимир Путин цала кулпатращал ва бусравсса делегациялущал увкIун ия. Махъунай нанийни, хар-хавар бакъа, увкIуна жул аэропортрайн. Яла анавархъиндарай багьлай бия миннансса хъамалушинна дан. ЦIусса шинал ттула кулпатрал ичIува тIивтIуну бивкIсса ссупралиятусса дуки-хIачIия дучIан дурну аэропортрайн, Владимир Путиннущал ва МахIаммадаьли МахIаммадовлущал щябивкIун, байран хьунадаркьуссия муна мукун.
— Жабир, буси хIакьинусса вила давриягу.
— ЦIана на зий ура «Дагестан» тIисса авиакомпаниялий. Авиакомпаниялул вертолетру дуссар МахIачкъалаллал аэропортрай, Минводылий, Аьшттарханнай ва Волгоградрай. Компаниялий зузисса летчиктал, инженертал хIадурну буссар 30 минутIрал мутталий Ухссавнил Ккавкказнаву аварияртту хьусса, нажагьлий иш багьсса кIанттурдайн ххассал бувултращал левххун, цалчинсса кумаг бан. Мукунма авиакомпаниялул дайссар медициналул ва санитар рейсругу.
Шикку зий уссар 75 зузала. Авиакомпания хьхьичIунну ва тIалавну дур Дагъусттаннай дакъассагу, Ухссавнил Ккавкказуллал федерал округрайгу. Уттигъанну бувкIру жу, Сочилий хьусса чIярусса хIукуматирттал хъуними бусса дунияллул халкьуннал форумрал мюхчаншиву дуруччаву мурадрайсса гьурттушивугу дурну. Аьшттарханнайгу жул авиакомпаниялийн барчаллагь баян бунни хьхьирий бюкьлайсса экипажру, инсантал ххассал баврицIунсса дунияллул халкьуннал дянивсса ученияртту хьхьичIунну даврихлу.
— Ина мудангу шяраваллил жяматрал, чIявусса лакрал иширттачIа сахаватлувну ацIайсса инсан ура. ХIакьинусса кьини Хъусращиял жямат вийн барчаллагьрай бур, шяравун щин дуцаврил, школалун кумаг баврил, жямат транспортрал щаллу баврил, ккурчIах бишинсса скамейкартту пишкаш баврихлу ва цаймигу иширттаву дурсса чялишсса гьурттушиннарахлу. Иярав Хъусрахьхьунгу, хIакьинусса кьинисса иш-тагьар цукун дизай?
— Буттал шяравунгу на ччя-ччяни ияра. Махъсса ппурттуву дакI ххари хьунсса иш бур, инсантал куннацIух кув бувккун шяраву ялапар хъанай бакъахьурчангума, бювхъусса куццуй, цалла минарду цIу дукккан дуллай, цIу-цIусса къатри дуллай бушиву. На навагу ттула оьрчIшиву ларгсса, нава хъуна хьусса буттал къатри цIу дуккан дуллай ура. Мудангу хIадурссара ттула буттал миналуцIун бавхIусса гьарицагу агьамсса иширттал чIарав ацIан.
— Барчаллагь, Жабир, дакI тIиртIуну бувсса ихтилатрахлу.
Ихтилат бувссар
Имара Саидовал
