[dropcap]В[/dropcap]ай гьантрай Щардал шяраву хьунни экстремистурал каруннища ливтIусса райондалул полицанал зузалтрал аьпалун хас дурсса аьдатравун дагьсса футболданул турнир.

Зулайхат Тахакьаева
Турнирданул сиптачиталну ва спонсорталну бувкссар Аьра­сатнал шагьрурдая отпускардай ватандалийн бигьалаган бувкIсса Щардал шяравасса ишбажаранчитал.

Гьашинусса турнир хьунни «Щара-Ареналий». ДакIнийн бутанну, ва арена буллай хьу­ссар ххюра шин. Ва даврил сиптачиталгу хьуссар шяраваллил жагьилтал цивппа. Уттигу Щардал жагьилтал зий бур,«Цурда ца къуруш бюджетрава харж къадурну, жула гужирацIух ва кашилуцIух» тIисса проектраха, шяравалу цIу дуккан даврил цIаний щурущисса. Ва давриву гьуртту хьун буржлув увну ур цума-цагу шяравучу.

ДахIалай чинсса давуртту ттинингу дурунни Щардал шяраву, вания тихуннайгу дуллан дакIний бур. Ттигъанну шяраву сакин бунни оьрчIру бялахълансса майдан. Къуртал бавай бур хъатIив, тяхъашивуртту дуллансса хъунмасса зал. Буллай бур щинаххуллурду. ЧIал къавхьуну байбишинтIий бур Жагьилтурал парк буллай.
Райондалул бакIчи Юсуп Ма­хIаммадовлул барчаллагь ув­кунни буттал улча цIу бу­ккан бансса, райондалул цIа ларай дансса, мархри хъамакъабитан­сса давуртту дуллалисса жагьилтурахь.

Шиная шинайн хъун хъанай дур турнирданул сий. Гьашину муний гьуртту хьунни 12 команда. Цалчинсса тIуркIу хьунни футболданул лаваймур лигалул командарттал дянив – Гъуниннал райондалиясса ва МахIачкъалалиясса «Сирона». Турнирданул бусравсса хъамаличуну ия цIанихсса спортсмен Забит МахIаммадшарипов.
Турнир хьунни ларайсса сакиншиндарай, МахIачкъалалия бувкIсса пишакарсса судьятурал кьимат бишлай. «Щардал шяравалу цIу дуккавриха зузи­сса фондрал» завардан дулун кка­ккан дурну дия 250 азарда къуруш. Цалчинмур кIану бувгьунни ЦIуссачIурттащиял командалул, кIилчинмур кIану – Щардал 2-мур командалул, шамилчинмур кIану – Ххюлуссуннал командалул. Мукьилчинмур кIану бувгьусса Хъурхърал командалун «За волю к победе» тIисса цала чулуха­сса бахшиш дуллунни райондалул бакIчи Юсуп МахIаммадовлул.
Дуллунни сакиншинначитурал чулухасса хасъсса бахшишругу – Къушиев Заурдун, Маммаев Надирдун, Къушиев Аьлиллун, Рамазанов Исламлун, РахIимов Исмяиллун.

Къуллугърал бурж биттур буллай ливтIусса полициялул зузалт­рал аьпа абад бансса даврихлу сакиншинначитурахь барчаллагь увкунни Республикалул виваллил иширттал министрнал хъиривчу, виваллил къуллугърал полковник Сахават Сахаватовлул. Министерствалул чулухасса бахшишру дуллунни Щардал шяраваллил бакIчи Мирослав Ибрагьимовлун – ххаржан, хьхьичIунну уклакисса Ислам Рамазановлун – Имам Шамиллул сурат.