[dropcap]Ч[/dropcap]Iявусса халкь хьунабакьай жула хъуншагьрулул дязаннивсса «Тарнаир» санаторийлий хъин хъанай бивкIун, гиккусса тагьардания рязину ливчIун, цIарду дуллалисса.
Республикалул кьатIув къалавгна, жула шиккува бигьалаган, хъин хьун ххуйсса иш-тагьар хIасул дурсса, шаппайн гьан-бучIангу бигьашиву дусса кIану бур тIий.
Залму АьбдурахIманова
ДакI даркьуну бикIай санаториялийсса хIаллихшиннардайгу, шартIирдай ва зузалтрайгу. Мяйжаннугу, санаторий «Тарнаир» шагьрулул агьалинан кIулссар аьрщарава нанисса дару-дармансса щинай бувсса ва вайннул чIарах медициналул цаймигу къулайшиннарду дузал дурсса кIану бушиву. Шикку бур инсаннал чурх рахIат буккан байсса кьяркьарал, щинал, массажрал ва цаймигу иширттал кабинетру, ишлагу дуллай бур уттизаманнул медициналул технологияртту.
[dropcap]З[/dropcap]ийгу бур шикку гьарцагу муштари-къашайшалах ххуйсса къулагъас дуван кIулсса, нахIу-хIалимсса, бавкьусса коллектив. Вайннавух чансса бакъар жула лакгу. ЧIа-чIаннин вайннайн барчаллагь тIисса ва вайннал захIматран кьимат бишлашисса мяъна-мурадрал чагъарду жучIангу бучIай. Уттигъанну бувкIсса ца мукунсса чагъарданул мурадгу бур жул кказитрайхчIин дакIнихтунусса барчаллагь баян бувара санаториялул хъунмур хIакин Аьлиева Замирайн ва кIикку зузисса циняв зузалтрайн тIисса. Барчаллагь тIий бур Ккурккуллал шяравасса Дибирова-Магьдиева ПатIиматлухь ва массажрал кабинетраву зузисса Карашрал шяраватусса АьбдуллатIипова Эльмирахь. ПатIиматлул, медициналул училищагу къуртал бувну, захIматрал ххуллул дайдихьу хьуну дур МахIачкъалаллал №3 Хъаннил консультациялия. 2000-ку шиная шинмай ва санаториялий ххютукалун дарувсса процедурартту дайсса кабинетраву зий бур.
[dropcap]Э[/dropcap]льмира санаториялий 2005 шиная шинмай зий бусса бур. Вай кIивагу бур цала пишарду канилух бувксса, гьарцагу къашайшалах личIлулну буругайсса ва коллективравугу хIурмат-бусравсса жаваблувсса зузалт.
Санаториялул муштаритуралгу, жулагу чулуха барчаллагь тIий вай жула душвавран, чIа учин ччай буру давриву тIайлабацIу ва дакIнийсса мурадру бартлагаву!
