Августрал 20-нний ДР-лул ХIукуматрал Председательнал хъиривчу Аьвдулмуслим Аьвдулмуслимовлул каялувшиврий хьусса батIаврий ххал бивгьунни Дагъусттаннай биологиялул ххиличIрурдан бан-битанмунил масъала. 

Хаснува буруккин бутлай бур коммунал ва медициналул биологиялул ххиличIрурдал (биоотходру). БатIаврий гьуртту хьунни цаппара мурадлувсса министерстварттал, федерал идарарттал, муниципал сакиншиндарал каялувчитал ва жяматийсса ккураннал бакIчитал.

---

Аьвдулмуслимовлул тIи­мунийну, респуб­ли­ка­лий ба­къар биологиялул ххиличIрурду мюнпатран ишла дайсса предприятияртту. Ми ишла даврил ва духлаган даврил чулухасса хъунмур захIматшивугу дагьлай дур цивппа заллусса тIювалул хозяйстварттайн (ЛПХ), микку буну тIий 80% ливчусса ризкьи. Республикалий бусса бур биологиялул ххиличIрурду духлаган дувансса 714 кIану, миннувату – 153 ризкьи буччайсса кIану (скотомогильники) ва 561 – биотермиялул къуви. Миннувату 422 объект бур шяраваллаву ва 292 – ризкьилул фермардай. Амма ветеринариялул ва санитариялул кьяйдардацIун бавкьусса бур бувагу 6 объект.

Председательнал хъиривчунал бусаврийну, биологиялул чулухасса мюхчаншиву щаллу даншиврул ва эпидеотикалул тагьар цалий дацIан даншиврул, 1618 шяраву аьркинну бур дузал буван биологиялул ххиличIрурду духлаган дувансса кIанттурду ва ялунгу дузал буван 1196 кIану – ххиличIрурду ишла дуллансса, ттинин бувну бивкIсса 422 кIану аьркинну бур бакьин буван ветеринариялул ва санитариялул кьяйдардал тIалавшиннардацIун.
Цалва ихтилатраву вице-премьернал ляличIисса къула­гъасрайн лавсунни ссибир язва ду­сса ризкьи буччай­сса кIанттурду, хаснува ми кIанттурду бухьурча, гъараллу ларчIун, нехру ду­ккайсса лухччай.
«ХIакьинусса кьини респуб­ликалий зий бур биологиялул ххиличIрурду ишла дайсса бувагу ца идара – ООО «Центр-Групп». Мунищал кьутIирду чирчуну дур цаппара идарар­ттал», — увкунни Аьвдулмуслимовлул.
Му идаралул давурттая бувсунни мунил гендиректор Пирзанат МахIаммадовал. Масъалалул хIакъираву ихтилатру бунни цайминналгу.