[dropcap]И[/dropcap]нсаннал кьадру-кьимат хъиннува кIул шай жунма га хьхьичIа лавгун махъ. ХIакьину Дагъусттаннай­сса аьрщаралгу, дазурдалгу цIанийсса къалмакъаллу хъанахъисса тагьарданий чIявучин бувчIлан бивкIунни укунсса ишру Дагъусттаннан,

лакран зарал къахьунсса куццуй щаллу бан хIарачат буллай бивкIсса уссурвал Хачилаевхъал кьад­ру.

---

Халкьуннал хьхьичI махъру лахълай, оьвчавуртту дуллай, хьхьичIун ххяхлай акъахьурчагу, Дагъусттаннайн, хаснува лак­райн багьайсса цавагу агьамсса масъалалул чIарах къауккайсса, иш-тагьар ххуйну кIулсса политик ва жяматийсса ишккакку ур Хачилавхъал чIивима уссу Жавраилгу. ХIакьинусса ттул ихтилатгу ванащалли.

— Жавраил, байбихьулий виятува, вила нитти-буттаяту бувсун ччива.
— Увну ура на 1964 шинал октябрь зурул 12-нний Бабаюртуллал райондалийсса «Чапаево» тIисса Кумиял колхозрал къутандалий. Ниттил увну ура на шава, цанчирча га диркIун дур кьакъадагьавай гъараллу лачIлачIисса, ххуллурду бявхху­сса чIун. Нину Тамаза-Тюбелийн ягу Татаюртлив роддомрайн диян дансса машина къабивкIун бур.
Нину-ппу — Вихьлиятусса МахIад ва Куматусса ХIабибат захIматрал агьлу бия.

[pullquote]Ттул ппу ия хъинну тIайласса, иттату ­иттав махъ учайсса чув-адамина. ХIухчу унугу, гьарца чулуха чантI увкусса ия.[/pullquote]

Буттал ппу МахIаммад дяъвилул шиннардий колхозрал председательну ивкIун ур. Фронтран кумаг бавриву хьхьичIунсса кIану бувгьуну, Щурагьун гьан увну ивкIун ур Занази ЯтIул Ттугъ ласун. Амма нани ххуллий, машина кIура бавну, ивкIуну ур. Оьр­мулул 12 шинавусса ттул ппугу ливчIун ур ниттищал. Цанна дуланмагъ дан Кумав хIухчушиву дуллан ивкIун ур. Нинугу цащала дурцуну, Кумав мина дирхьуну дур. Мукун бакIрайн багьну бур ттул нину-ппу цаннайн ца. Нину жан дуссаксса колхозраву зий дикIайва. Жул кулпатраву 7 оьрчI бия – 4 уссу, 3 ссу. ЧIанма-чIивимур ссу шин хьуннинма бивкIуну бия, къашай хьуну.

70-ку шинал жу бивзру Хасаврайн. ХIадур бай классрая 4-мур классравун ияннин на дуклай икIайссияв Хасавюртуллал муххал ххуллул 112-мур школалий. Мукьра-ххюра шинава жу МахIачкъалалив бивз­ру. Ххюлчинмур классравун дуклан лавгссара 2-мур школалийн. МахIачкъалалив бивзун ца шинавату нину аьпалухьхьун ларгуна. Му чIумал ттун 12 шин дия. Нину ялату ларгукун, жу цичIанма бувцунав Кумав ялапар хъанахъисса ни­ттилссил Аьйшатлул. Та чIумал та цуппагу советрал председательну бия. Ниттилссил цилагу бия шанма душ.

[pullquote]МахIаммадлул хъа­ттиралу хъуни хьуссару жу – Хачилаевхъал агьлу-авлад. Му ия жун кIилчинма ппу. [/pullquote]
Кумав байбихьулул классру бакъа бакъа, школалийн Ккурк­лив лагайссияв. КIиккур на 10 классгу къуртал бувсса. Ларай­сса кIулшиву ласун увхссара Ростовуллал шяраваллил хозяйствалул институтравун. Мунияр махъ, 1995 шинал, ЯтIул дипломрай къуртал бувссар Москавуллал Ишбажаранчишиврул ва ихтиярдал институт.

— Цукунсса хасиятру дирну дур вин нитти-буттая?
— Ттул хасиятирттая, тIул-тIабиаьтрая на ххуйну кIул­миннал бусича. Нарив бусанна ттула нину-ппу цукунсса инсантал бивкIссарив. КIивагу уздан­сса агьлу-авладраясса бия. Бу­ттал агьлу зий бивкIун бур Гъази-Гъумучиял хантурачIа хъус-хъиншиврул масъалар­тталсса байсса къуллугъирттай. Гайннал гьанна бухьунссия, ттул буттангу ххуйну кIула цумур аьрщи щиллив, кIула дазурду, зун­ттурдал, хъачI-мачIал, неххардил, щаращал цIарду. Бутта ия хъинну тIайласса, иттату иттав махъ учайсса адамина. Ия гуж­сса психолог, га цIана увчIайва цума цу уссарив. ХIухчу унугу, гьарца чулуха чантI увку­сса ия. Мудан луттирду ккалай икIайва. Ххуйну кIула Дагъусттаннал тарих. Ганащал хIала-гьурттуну бивкIми цинявппа бикIайва ганал бусласимуних вичIи дишин хъунмасса гъира бикIай тIий.
[pullquote]Дагъусттаннай мудангу къучагъшиврул культ дуссар.
Аьпа баннав, ттул уссу Надирдул тIийкун: «Да­гъусттан, цайми-цайми билаятирттах бурувгун, витIянхъуксса бур, амма цIа тIурча, цилла аьрщараяр хъунна­сса дур». [/pullquote]

Гъинтнил каникуллал шанмагу барз на буттащал яттичIа ТтурчIайнна-Зунттуй, Дул­ттияллил чуллай гьан байссия. Му чIумал хъиннура аьч шайва бу­ттал хасият, тIул-тIабиаьт. ХIухчу тIий, жува цал-цал инсан ккалли-сан къауллан бикIару. Ттул бутта дурккуминнаяргу за кIулсса ия. ХIухчушиву ца яла бусравмур пишалун ккалли бара на. Ниттил агьлу-авладрай машгьурну ивкIун ур СалихI-апанни, ханттурачIа диндалул ва дяъвилул иширттал маслихIатчину ивкIсса.

— Вил хъуними уссурвал, аьпа баннав, МахIаммад ва Надиршагь, бия цIа дурксса политиктал, жяматийсса ишккаккулт, ххаллилсса спортсментал. Цумур ххуллий ци лавхьхьур вин миннацIа? Буси уссурваврацIун бавхIусса, оьрчIний винма дакIний ливчIсса ишру.

[pullquote]ДазуцIухсса 20-30 метIралул цIаний ­уссур­валсса дагъус­ттан­нал ва чачаннал миллатир­ттал дянив тачIав къадагьантIиссар. Я жура тайннан кьаритантIиссар,
я тайннал жунна. [/pullquote]

— МахIаммад ия жун кIилчинма ппу. Мугу нитти-буттал тарбия духьунссия. МахIаммадлул хъаттиралу бивкIссар Хачилавхъал кулпат учирчагу, къааьйкьинссара. МахIаммад цинявппа уссурссуннаха аякьалий, жаваблувшиву дуну икIайва. Хъинну захIмат ххирасса ия цувагу. Зий акъацIайва. ТачIав жу зузи бувну, цува тинай къаацIайссия. Ялунгума, хъунмур даву цала дайва. Гьарца ишираву цува хьхьичI най, жу хъирив бачин байвав. Спортравугу мукунма. Школагу къуртал бувну, шярава бувкIсса чIумал, цалчинсса кьинирдайва ганал жу каратэлул секциялийн занази бувнав. Аьра­луннаву къуллугъ буллали­сса чIумал хъиннува машхул хьу­ссияв каратэлухун. МахIаммад икIайссия Аьрасатнал каратэлул федерациялул президентну.

1990 шинал лавгссара га бакI­чисса группалущал Чехословакиянавун квалификация ласун. Тикку ларсъссар Цалчинмур Дан (ЛухIи мухIлу). [pullquote]Жула халкьуннаха дацлай, Европанал билаятирттай щурущи дуллай, цайми хIукуматру авадан дуллалаву на лавмартшиврун хIисав дара.[/pullquote] 2010 шинал лавгссара Абу-Дабилийн Щалагу дунияллул Рюи-Джицу каратэлул Ассоциациялул хъунама АльмеричIан. Ттул гьунар ххал бувну, ганал дуллуна ттун Мукьилчинмур Дан (ЛухIи мухIлу).
МахIаммад жул чул бищай кIануя, ялувсса магъия. КIиягу уссу кумаг аьркиннал чIарав бацIайва. Спортрал ххуллийгу кIиягу хьхьичIунну бия. Циняв­ппа дагъусттанлувтуран кунма, жунгу жува авурну, сивсуну, гуж буну ччай бикIайва. Дагъус­ттаннай мудангу гуж бушиврул, къучагъшиврул культ дуссар. Аьпа баннав, Надирдул тIийкун, Дагъусттан, Аьрасатнах, цайми дунияллул бутIрах бурувгун, витIянхъуксса аьрщарал парча бур, амма Дагъусттаннал цIа цилла аьрщараяр хъуннасса дур. — Славы больше, чем земли, -чIявуну тикрал байссия Надирдул.

ДакIний личIансса ишрурив жул оьрмулуву чансса къавхьунни. Яла-яла дакIний ливчIунни нава цалчин Дулттияллил зун­ттуйн лавхъсса чIун. Жул ичIува мудан Дулттияллил зунттуя­сса ихтилатру бикIайва, уссур­ваврал зумату къабукьайсса зунттуйн лахъансса хияллай нагу икIайссияв. Ххюйлчинмур класс къуртал бувсса каникуллал чIумал, ттухьва буттал цащала зунттуйн уцинна увкукун, ттул ххаришиврул дазу-зума да­къая. ТачIав дакIния къабу­ккай кIа аьрххи. Буршиял шярава НикъурахI тIисса кIанттурдайн кIурабаяйхту, най дуна асар шайссар караматсса Дулттияллил тIабиаьт: уртту-тIутIал кьункьал лавсун нанисса ляличIисса гьава, я батIин къашайсса ххуйшиву. КIикку бавцIуру жу хьхьу рутан. КIюрххил чантI увкусса чIумал, жул ялув марххалттанил бакIу бия. Хьхьувай марххала буллай бивкIун бия, нахIу шанаву жун кIулвагу къавхьуна.

Буттал вин зана икIан багьанссар увкукун, къащи шаврил на хъювссулгума увкра. Къагьанна на махъунай тIий, кьянкьану авцIуссияв. Бутталгу, пишгу куну, кьаивтунна. КIюрххил бивтсса бургъил марххала ба­ссан бувну, къюллу чят бувну бия. Дукра гъили дан цIу дишин хъанай дакъая. Буттагу, нагу, ца цамагу хIухчалтрал гьан бунну Буршайн. Буршиял колхозрал председатель жул хъамаличу ия. ТайнначIа гъилигу лавгун, загу дуркуну, махъунмай бувкIру. Та чIумал лавхъссара на Валиялу тIисса 4 азарунния ливчусса метралул лахъшиву дусса зун­ттул мицIлийн. ДакIнийри, Надиргу, навагу (Надир кIиккува ивкIссарив, ялун увкIссарив дакIний бакъар), бюхттулнийгу щябивкIун, авлул кьяцрай тамаша буллай бивкIсса. Ккашил хьуну, кIарттул ччатIухунсса къалмукьчяйлух тамахI багьну бивкIсса.
ЧIяруну ва тIааьнну дакIнийн дагьай ттун та чIун.

— Машгьурсса Хачилавхъал фамилиялул буржлув уллалисса кIанттурду чIявусса хьунабакьайрив?
— Фамилия машгьурсса да­къахьурчагума, адаминасса инсаннал оьрмулуву дуруччин аьркинсса яхI-къириятрал, инсаншиврул кьанунну дуссар. Республикалий бикIу, вила миллатраву бикIу, хъанахъисса агьам­сса ишру къулагъас къадурну, хIала къаувххун битан къашай­ссар. Гьай-гьай, жула фамилия лайкьну дуруччин аьркинссар тIисса затгу аькьлулул кьукьайхьунссар.
— Жавраил, вин кIулну бур ва дахIаву дур цIанихсса политиктал (лидертал) Юнусбек Евкуровлущал, Рамзан Кьадировлущал, Дмитрий Рогозиннущал.

Миннава хасиятрал, тIул-тIабиаьтрал чулуха вина гъансса цума ур? Ци учинна Дагъусттаннал ва Чачаннал дазул цIаний хъанахъисса аварарттал хIакъираву?
— КIицI лавгсса цинявппагу лидертурал хIурмат буссар ттул. Ттул уссурвавралгу дуссия миннащал дусшиврийсса хIала-гьурттушиву. Дазуйсса къалмакъалдания тIурча, Дагъус­ттаннал ва Чачаннал дазу цIакь дурну дур 80-хъул шиннардил хьхьичIра федерал центрданул. Миннал учин аьркинссар хIакьинугу цала махъ, кIивагу миллатрал агьлу цаннахун ца бичлачи къабувну. Сакин бан аьркинссар Москав бакIчисса шанмагу чулухасса вакилтураясса комиссия. КIункIу бан аьркинссар цаппара пишакартал. Бусан аьркинссар ахир-махъ. БувчIлай бакъар, вайксса шиннардий гьаз къавхьусса дазурдал масъала цIана циван ва щил су­кку бувссарив.
Дазуйсса 20-30 метралул цIаний уссурвалсса дагъусттаннал ва чачаннал миллатирттал дянив тачIав къадагьантIиссар, ттухьва цIуххирча. Я жура тайннан кьаритантIиссар, я тайннал жунна.

— Циванни Жавраил Хачилаев политикалувух хIала акъасса, властьрал органнавун кIункIу-хъит къатIисса?
— Политика цири? Му дур агьалинал масъаларттаха зузаву. Ттун къакIулли жува халкьуннал масъаларттаха къазузисса чIун. На, телевизорданувух, халкьуннал хьхьичI махъру лахълай акъа­рача куну, политикалия яувцун акъассара. Ттун нара дуллалимур майшан тIун къаххирар.
Къуллугърая тIурчарив, хIакьинусса кьини жучIарасса властьрал органнаву ттун къа­ччива. Къаччай ура я дацлан, я лулттурасри ласлан. Ттухьва бияла буну, ттун ччива Да­гъусттаннал халкьуннан бигьа-рахIатсса оьрму дузал бан, ччива жучIара инфраструктура хьхьичIуннай дан, аьркинсса куццуйсса ххуллурдив бан, багъ-бахчарду тIутIайх бичин бан, аьрщив дугьлан. Жула халкьуннаха дацлай, Европанал билаятирттай щурущи дуллай, цайми хIукуматру авадан дуллалаву на лавмартшиврун хIисав дара.

— Оьрмулуву инава итабавкьусса цукунсса гъалатIрая пашманну икIара?
— ГъалатI иткъаххяххайсса цучIав къаикIайхьунссар. Амма на хьумур гьан битара, пашман шаврийну цичIав баххана бан къахьунтIишиву кIулну.

— Инсаннаву яла-яла цуми хасиятру ххуй дизай вин?
— ДакI тIайлашиву, хъиншиву.

— Миллатрал вирттаврава, Лакку билаятрал ххазинарттава цумур кIицI давияв?
— ХьхьичIра-хьхьичI кIицI лагавияв Лакку билаятрал караматсса тIабиаьт, бюхттулсса зунттурду, дяркъу щинал щаращив, ябатIин къашайсса жюружантту, уртту-тIутIул авадан­сса бизантту. Ялагу учин ччива, зума-ккарччулусса Дарбантуллал Нарын-Къала кунмасса къалагу, тихсса Джума-Мизит кунмасса, 1200 шинал хьхьичI бувсса, мизитгу жучIавагу бу­ссар. КIанттул олигархтурал дазул кьатIув щурущи къадурну цала арцу, ватандалий дайссания ххуйну хьунссия. Ца Сулайман Керимов лакрангу хъина.
Миллатрал вирттаврава тIур­ча, пахрулий кIицI давияв кIиягу Сурхай-ханнал ва шайх Жамалуттиннул цIарду.

— Вил уссурвал, аьпа бивухъул, хъуннасса бакI цIуцIаву дуллай, лакку маз ябансса чараннах луг­лай бикIайва. Ци чаран лякъин аьркинссар жула маз бухлаган къабитан? Вил оьрчIан кIулссарив лакку маз?
— Ччайнугу, къаччайнугу, мюрщи миллатирттал мазру бухлаглай бур. Му дунияллий муданма хъанахъисса иш бур. ЧIяву-чIявусса цайми мазру кунма, бюхъайссар та-бунугу жулассагу бухлаган. Ттула оьрчIая тIурча, хIакьину миннан кIулли лакку маз. Хъунама словарьду лавсун, миннухгума уруглан икIай. Амма хъирив наниминнан му кIулну бикIантIиссар куну кьянкьану учин ттуща къахьунссар.
— Оьрмулул вихьра дирхьусса дарс?

— Анавар къауккаву. Ссавур даву. Ссавур – ятIул мусири учайссар жула.

— Вина ххирасса чичу?
— Виктор Пелевин, Борис Акунин («Азазель»).

— Тархъансса чIумал ссаха зун ххирар?
— Пикри-щугълурдай щяи­кIан.

— Винма ххирасса учала?
— Ма, цIукуй, винна ппал, къачча ттун, гъал дакъа.

— Барчаллагь, Жавраил. Гьарца ина дулла­лимуницIун Занналгу кабакьиннав.

Ихтилат бувссар
Андриана Аьбдуллаевал