Дагъусттаннал Конституциялул кьини республикалул БакIчи Владимир Васильевлул ПаччахIлугърал премияртту дуллалисса шадлугърай гьуртту хьуссия элмулул ва
техникалул аралуву ва премиялун лайкь хьусса Цалчинмур ЦIувкIратусса медициналул элмурдал доктор, профессор, Шагь-Рамазаннул арс Рамазанов МахIаммад.
П. Рамазанова
Ва дакIнихтунусса захIматрайну, куртIсса кIулшивурттайну ва бюхъу-гьунарданийну машгьургу, бусравгу хьусса хIакин ва аьлимчури. 1991 шинал Пермь шагьрулул мединститутраву дурурччуну дур элмурдал докторнал диссертация. Яла махъ МахIачкъалаллал мэрну зузисса Саид Амировлул ванал кабакьаврийну МахIачкъалаллал Портрал азарханалий тIиртIуну дур сосудру итххяххан дуллалисса хасъсса центргу бусса хирургиялул отделение.
[dropcap]П[/dropcap]рофессор Рамазановлул каялувшиву дуллалисса ва Центр хьуну бур яла хирургиялул кIулшивуртту студентътуран лахьхьин дувай кIанугу, сосудирттай ва чурххал вивсса базурдай захIматсса операцияртту бувай кIанугу. Центрданул давугу ччаннай дацIан дурну, медициналул сфералуву диялсса сий рутайхту, МахIаммадлун укунмасса цамургу центр дузал буллан багьну бур – Республикалул оьрчIансса азарханалул лагрулий тIигу-тIивтIуну, ччаннайгу бацIан бувну бур хирургиялул центр. Аьрасатнаву хIакьину укунсса даражалул цамур центр бакъасса бур. Ва, Медакадемиялул хирургиялул лахьхьин баврил база хIисаврайгу, захIматсса къашайшалт ччаннай бацIан буллалисса центр хIисаврайгу, машгьурну бур. ВайнначIан хъин хьун бучIайсса бур Азирбижаннава, Беларусьнава, цаймигу регионная.
[dropcap]М[/dropcap]ахIаммад Шагь-Рамазановичлул 2500 операция бувну бур, хъунмурчIин сосудирттал инжитминнай. Ва ур 416 элмийсса даврил автор, итадаркьуну дур 7 монография, цимилагу докладру бувну бур дунияллул халкьуннал конференциярттай ва симпозиумирттай. Ванал захIматран паччахIлугъралгу лавайсса кьимат бивщуну бур, ва ур Аьрасатнал лайкь хьусса хIакин, Дагъусттаннал лайкь хьусса хIакин ва изобретатель, СССР-данул изобретатель, МАИ-лул академик, Аьрасатнал ангиологтурал ва сосудирттал хирургтурал обществалул член. Утти лайкь хьунни Дагъусттаннал паччахIлугърал премиялунгу. Барча уллай буру, чIа тIий буру цIуллушиву ва давриву, гьарцагу дуллалимуниву тIайлабацIу!
