Насруллагьлул арс Хахаев Билал
ЗахIматсса цIуцIаврил къашавайгу ивкIун, оьрмулул 86 шинаву аьпалухьхьун лавгунни хъунасса аьлимчу,
«Недра» тIисса элмийсса центрданул генералсса директор, техникалул элмурдал доктор, РАЕН-далул академик Насруллагьлул арс Хахаев Билал.
Билал увну ур 1933-кусса шинал ЦIущуллал шяраву. 1955-кусса шинал къуртал бувну бур Губкиннул цIанийсса Москавуллал навтлил институт. Институт къуртал бувну ххюра шинавату зун ивкIун ур КаспийлуцIухсса навт ххал бигьлагьисса давурттал хъунаману, 1972-ку шиная 1981-ку шинайн ияннин тIурча, каялувшиву дуллай ивкIун ур Къазахъисттаннал Навтлил ва газрал хъиривлаявурттал управлениялий. Мунил ахир-мураднугу хьуну бур цаннияр ца хъунисса ва авадансса мяъданну бусса кIанттурду аьч баву, тIитIаву.
1981-кусса шинал ивтун ур «Волгокамскгеологиялул» генералсса директорну. Хахаевлул биялалий лябукку буну зун диркIссар «Байкал-бурение» тIисса Дунияллул халкьуннал дянивсса проект.
ХьхьичIунсса аьлимчу хIисаврай, ванал кIунттила дуркссар 200-нния лирчусса элмийсса давуртту, миннувух – 4 монографиягу, 16 изобретениягу.
Ванал бартбивгьуцири иширттан бивщусса лахъа-хъунсса кьиматну хъанахъиссар укунсса цIарду:
СССР-данул ПаччахIлугърал премиялул лауреат (1982 ш.)
Къазахъисттаннал ССР-данул ПаччахIлугърал премиялул лауреат (1976 ш.)
АьФ-лул лайкь хьусса геолог (1994 ш.)
Лениннул орден (1977 ш.)
ЗахIматрал ЯтIул Ттугълил орден (1976 ш.)
Орден «ХIурматрал лишан (1966 ш.)
КьурчIишивугу кIидачIлай, жижара буллай буру Билаллул агьлу-авладрахь. Билаллул бунагьирттал аьпа баннав, гьав нурданул дуцIиннав!
Ккуллал ва Лакрал райондалул агьали
Ярославль шагьрулийсса Дагъусттаннал
землячестволул вакилтал
Аьбдуллул арс ХIусайнов МахIаммад
Оьрмулул 49 шинаву, хар-хавар бакъа, оьрмулул чагъираву жуятува лавгунни ххаллилсса лаккучу, ГьунчIукьатIатусса Аьбдуллул ва Зинал арс МахIаммад.
МахIаммад увну ур 1970 шинал МахIачкъалалив. Шагьрулул 1-мур школагу къуртал бувну, МахIаммад увххун ур Политехникалул техникумравун. 1988 шинал лавгун ур армиялийн. Зана шайхту, зун ивкIун ур теплосетирдай инженерну.
Му бакъассагу, му ия ххуйсса уссал ва бишай яруннил усттар. Махъсса ппурттуву МахIаммад зий уссия оптикалий.
МахIаммад ия ХIусайновхъал ва ХIажимирзаевхъал тухумраясса, дугъришиврул бутIа лавайну буллусса, буттахъал мина ххирасса лаккучу.
МахIаммадлул чIун дакъасса бивкIулул къумашиву кIидачIлай, жижара буллай буру ссурваврахь, кулпатрахь, ссурахъаврахь, цинявппагу маччаминнахь. Цал бунагьирттал аьпа баннав, алжаннул ххари аннав.
ГьунчIукьатIрал
ва КIямашрал жямат
Хъуннасса кьурчIишивугу кIидачIлай, дакIнийхтуну жижара буллай буру Мурачуева РитIахь, ванил аьзизсса ппу
МахIаммад
аьпалувух ишаврийн бувну.
Цал бунагьирттал аьпа баннав, рухI рахIатний дишиннав!
М. Илиясовал цIанийсса «Дараччи» фондрал хъами
