12[dropcap]Ч[/dropcap]Iал къавхьуну МахIачкъалалив цIусса журалий зунтIиссар диспетчертурал къуллугъ. Ва давугу дувантIиссар «Мюхчансса шагьру» тIисса проектрал лагрулий.
Цасса диспетчертурал къуллугърал агьалиная кьамул буллантIиссар личIи-личIисса мурадрал аьрзри. ХIасил, циняв апатIирттал хIакъираву ца кIанайн оьвкуну, агьалинан кумаг бавансса шартIру дузал дувантIиссар.
Шикку зунсса пишакартал хIадур бувну бур ДР-лийсса Аьрасатнал МЧС-рал Управлениялул центрданий. Цалсса проект щурущи дувантIиссар республикалул мукьва шагьрулий – МахIачкъалалив, Каспийскалий, Дарбантлив ва Къизилюртлив.
ЦIана, мисалдаран, щурущи дуллай байбивхьуну бусса бур цурда системагу, агьалинан бигьану бикIан мобил телефоннайсса «приложениегу». Мисалдаран, бала-апатIравун агьсса инсаннал Цасса диспетчертурал центрданул 112 телефондалийн оьвчирча, най буна га иширавух хIала-гьуртту хьун бюхъантIиссар кIива-шанма къуллугъраща.
Машинартту щусса кIанайн, мисалдаран, ца инсаннал оьвчаврийну цал архIал буккавантIиссар полициялул, «Анаварсса кумаграл» ва МЧС-рал къуллугъирттал зузалт. Мобил телефоннайсса ва системалул кумаграйну агьалинаща бюхъантIиссар республикалий чув цIу ларчIун дуссарив, чув щин гьаз хьуну дуссарив, чув ци авария хьуну дуссарив кIул бан.
Сайки ца дачIи шинавату МахIачкъалаллал агьалинан кIул хьунтIиссар «Мюхчансса шагьру» программалул къулайшиннарду.
ХIадур бувссар
З.АьбдурахIмановал
