ТтурчIи
КутIасса справка

ТтурчIиял шяравалу диркIссар ТтурчIайнна-Зунттул урчIа чулух, 2300 метралул лахъшиврий.

Мунил аьрщарал дазурдацIухсса шяраваллуну хъанахъиссар: Ккур­ккул, ЧукIун, Кьуби, ЧIухъи (ярусса), Мияйми (ярусса).
Бусалардал тIимунийн бувну, ТтурчIиял шяравалу хIасул хьуну дур Ла­ккуй ислам дин кьамул даннин хьхьичIра ВицIхъиял махIалданий.
1741-ку шинал, ТтурчIайнна-Зунттуй Надир-шагьнал аьрал ххит бувсса талатавриву ТтурчIайннал агьалиналгу дурну дур асар хьунсса гьурттушиву Хъунмур талатаву хьун хьхьичIмур хьхьуну, ццунну даркьусса ттурлугу ишла дурну, ТтурчIиял ва ЧукIуннал къучагътурал илхъи чулиннай рищун дурну, душман хъинну чIявусса дучрацIа увну ивкIун ур, та чIумал балчан бакъасса талатала ачIи акъассаннун ккаллину ивкIссар.
ВицIхъиял территориялий ТтурчIи хIисав хъанай бур ца яла лахъмур шяраваллин: щарнил урчIа чулухсса КIяла-Муруллул бакIрава хъинну дарусса кьини ххал хьун бюхъайссар тIар Каспи хьхьиригума.

1888-ку шинал Аьрасатнал дурну диркIсса переписьрайн бувну, ТтурчIиял шяраву бивкIун бур 114 къатта-къуш ва яхъанайгу ивкIун ур 467 инсан.
Революция хьуну махъсса заманнай шяраву зун бивкIун бур цалчин­сса дуниявийсса байбихьулул школа, му цуппагу тIивтIуну бивкIун бур Мирзахъал ХIажимахIаммад тIисса инсаннал къатраву. Мукунма зузи бувну бивкIун бур хьхьувайсса ликбезрал курсругу.
Колхоз сакин дурну диркIун дур 1928-кусса шинал – «Турчинский» тIисса. Мунил цалчинсса председательнугу ивкIун ур Гъазихъал МахIаммад, вава инсан председательшиву дуллай ивкIун ур ттурчIи ЦIуссалаккуйн бивзун мукьахгу.
Хъунмасса Буттал кIанттул цIанийсса дяъвилийн ТтурчIиял жяматраяту лавгун ур 76 жагьил, минная зана къавхьуну ур 28.
1944-ку шиналсса департациялул чIумал, ТтурчIиял шяравату дизан дурну дур 139 хозяйство – 540 инсан.
Ванияр 20 шинал хьхьичI ЦIуссалаккуй хьуну бивкIсса «баян къабув» дяъвилийгу жанну дуллу­ссар ТтурчIиял шяравату­сса арула органнал зузалал. Вайнна миннал цIарду: Мутай Исяев (Аьрасатнал Виричунал цIанин лайкь хьу­сса, Рустам ХIамзатов, Руслан ХIаммадаев, Неъматуллагь Айгунов, Аьвдулкьасим МахIаммадов, ­Оьмар Оьмаров, Аьли Куркиев (вайннан дуллуссар Чувшиврул орденну).
ЦIуссалакрал райондалул бакIчиталну личIи-личIисса шиннардий зий бивкIссар ТтурчIиял жяматраясса вакилтал – Юсуп Мирзоев, Арсен Каммаев, Тимур Оьма­ев.
Цаннаяр ца язисса ва цIанихсса дур Лакку кIан­ттулгу, ЦIуссалакралгу республикалулгу тарих-таварихраву ТтурчIиял арсурваврал ва душурваврал чирчусса цIарду. Лак­райн, жяматрайн багьай­сса гьарцагу агьамсса ишираву ттурчIи мудангу бур хьхьичIунсса ххуттай.