Жула дянив чансса бакъар, цаятува лакрал агьалигу хъинну рязину, буттал улчагу тIутIайх бичин буллай, паракьатсса, аькьлулул куртIсса, бусайсса мукъуй цIу-цIанпир бусса, дус-ихтивартурал дянив бусравсса, гьарца дуллалисса давурттавух цалчин гьуртту шайсса, аьркиннал чIарав бацIайсса инсантал. Мунил хIакьну бугу-бусай га инсаннан миллатрал мазгу, магьирлугъгу, ла­кку дунияллуцIун дархIусса гьарзатгу лахъсса даражалий ххирашиву. Вана укунсса агьулданиясса цану хъанай бур Каспийск шагьрулий ялапар хъанахъисса ЧIяйннал шяраватусса Рамазанов Загьидинал ва Бадуржигьаннул кулпат.

Р. Къардашов
Ххюра шинал хьхьичIва, цIанасса заманалул цIинцI цила-цила журалий личIи дайсса тIалавшинна дучIан най душиву кIулхьунссия Бадуржигьаннун, Каспийскалий хьхьичIва-хьхьичI бувну бур личIи-личIисса журалул цIинцI дичайсса къуршив. Цила пенсиялух, щихькIуй дула къаувкуну, цилалу хIадур бувну бур цIинцI-ччюрк дичайсса къуршив бацIан бан­сса кIанттугу. 2014 шинал ккаккангу дурссия «Дагестан» РГВК-лул, «ТБС-Каспийск» телекомпаниярттал ва интернетравух, «Самая лучшая мусорка» тIисса, ванил дурмунин лавай­сса кьадру-кьимат бишлашисса киносурат.
Ххаллилсса чаннасса дакI дусса, цила лагмацири агьалинан хъинбалартту буван ччи­сса хIакьсса зунттал хъамитайпа бур ва.
Москавлив Аьрасатнал аьра­луннал Генеральный штабрал академиялул профессорну зузи­сса, 50 шинал хьхьичI Каспийскалий 2-мур школа къуртал бувсса генерал-майор Герман Кириленкол 2006 шинал Каспийскаллал 2-мур школалул хъуниминнайн баян бувну бур июньдалий цащала 10 класс къуртал бувминнащал хьунаакьин учIан ччай ушиву. Директорная тIайла хьуну, щала учительтурал коллектив буруккинттарахун багьну бур – чуври ми кьамул бувайсса тIий. Актовый зал сант дакъасса бивкIун бур. Тай шиннардий Бадуржигьаннул арсру Сяид ва Шяпи ва школалий дуклай бивкIун бур. Цуппа Бадуржигьангу арсру дуклакисса классрал нитти-буттахъал комитетрал председательну бивкIун бур. ЧIумул кутIасса мутталий Бадуржигьаннул актовый залдануву хъинну ххуйсса ремонт дурну дур. Магъи дакьинсса пластик ва чIавахьулттайх дичинмур ларсун дур нитти-буттахъая дартIсса арцух. Яласса цимурца, чIиртту, поллу, чIавахьулттив, нузру, сахIна – гьармур цилла арцух, дурну дур. Герман Кириленкогу, ганал гьалмахталгу хъинну ххуйну кьамул бувну бур Бадуржигьаннул цIу буккан бувсса залдануву, ванингу, цинявппа бавтIсса кIанай барчаллагьгу увкуну, Барчаллагьрал чагъаргу буллуну бур.
Нитти-буттал тIабиаьтраха лавхьхьусса, хъинну тарбия бувсса, тIайлану шаттирду ласласисса бур ванил наслугу.
Загьидинал ва Бадуржигьан­нул бур мукьва оьрчI: кIива душ ва кIия арс. Хъуними душваврал Эльмирал ва Альбинал ларайсса кIулшиву ларсунни, ца дахху-ласулул касмулий, ца экономистнал касмулий зий бур. Вай, кулпатиртталгу хьуну, цIуну хьусса ляхъингу ххирану, цала оьрчIругу лайкьну тарбия буллай бур.
Хъунама арснал Сяидлул Каспийск шагьрулий мусил медальданий къуртал бувну бур школа. ЯтIул дипломран лайкьну къуртал бувну ДГУ-лул юридий факультетгу, муния махъ увххун ур аспирантуралувун.
Юридий элмурдал кандидатнал цIа дуллалисса диссертация дуруччайни, Сяидлул официал оппонентнугу ивкIун ур хIакьину жуна цинявннан кIулсса, АьФ-лул Конституцион Судрал судия, профессор ХIадис ХIажиев. ЦIана Сяид зий ур АхIмад-Хан Султаннул цIанийсса МахIачкъалаллал аэропортрал хъунаманал хъиривчуну.
Бадуржигьаннул чIивима арснал Шяпинал, цува школалий дуклакисса хIаллай, школалийсса, шагьрулийсса, республикалийсса жура-журасса мероприятиярттай хъинну ххаллилну гьурттушинна дуллай уну тIий, 18 диплом, грамота ва барчаллагьрал чагъар лавсун бур. Ва лайкь хьуну ур «бивкIу бакъа­сса кидовец» цIанингу. Каспийск шагьрулий 2-мур школа мусил медальданущал къуртал бувсса Шяпи ДГУ-луву кьамул уллай ивкIун ур цал архIал мукьва факультетрайн. Ванал язи бувгьуну бур, цала хъунама уссил Сяидлул кунма, юридий факультет. Мугу ЯтIул дипломращал къуртал бувну, аспирантуралувунгу увххун, зун айивхьуну ур Каспийскалий дахьва тIивтIусса МФЦ-лий юрисконсультну, яла идаралул хъунама юристну. Лавайсса даражалул пишакар уну тIий, Шяпи увцуну ур зун Мос­кавливсса «Евроцемент груп» компаниялул отделданул хъунама юристконсультну.
Дагъусттаннай чIалай дур махъ ппурттуву хъанахъисса дахханашивуртту. Республикалул хъуниминнал баян буллай бур хIукуматрал лавайсса къуллугъирттай битайни, язи бугьлагьишиву даражалул лавайми специалистътал. Лавайсса даражалул специалист хIисаврай, МахIачкъала шагьрулул хъунама Салман Дадаевлул ивтунни жула Шяпи администрациялул Ихтиярдал управлениялул каялувчину зун. Ва хъинну жаваб­лувсса къуллугъ бушиву чIалай бур. Ванан утти шагьрулул ва шагьрулул инсантурал ихтиярду бартдигьаврил хъирив ацIлан багьлагьиссар.
ЦIусса къуллугърай Шяпинан чIа тIий буру цIакьсса цIуллушиву, цIу-цIусса хьхьи­чIуннайшивуртту, давриву тIай­лабацIуртту!