Августрал 21-нний ДР-лий аьдлу-низам щаллу даврил координациялул батIаврий дагъусттаннал БакIчи Владимир Васильевлул каялувшиврий ххал бивгьунни 2025 шинайнин АьФ-лий экстремизмалийн къарши буккаврил стратегия дузрайн дуккан даврил масъала.
Му ххуллий дуллалисса давурттая бувсунни ДР-лул миллатирттал политикалул ва диннал иширттал министр Энрик Муслимовлул. Мунал тIимунийну, экстремист сакинлугъирттал дин ишла дуллай бур цала кьюкьравун цIусса члентал кIункIу баврил, диннал ва миллатирттал дянив ссивцIу бичаврил ярагъ кунма.
Энрик Муслимовлул бувсунни экстремизмалул идеологиялийн къаршину министерствалул дуллалисса давурттая. КутIану бусан, тамансса профилактикалул давуртту дурну дур республикалул школарттай дуклаки оьрчIал, студентътурал дянив ва мукунна мизитирттавун заназисса жагьилтурал дянив. Министрнал бувсунни мукунма чил билаятирттая зун бувкIсса инсантуращал дурсса давурттаятугу.
Дагъусттаннал БакIчинал тапшур бунни республикалийн зун бувкIсса чил билаятирттал инсантуран патентру булаврил иш-тагьарданул ялув бацIлан.
-Жува цайми ккаккан къабулланну. Шикку, батIаврий, бур циняв ва даврил жаваб дулайсса инсантал. На тавакъю буллай ура: масъала цила чIумал ва балжину бартбигьин бурж буссар гьарманай, — увкунни Владимир Васильевлул.
БатIаврий махъ лавхъунни республикалул жагьилтурал иширттал министр Камил Саэдовлул. Мунал тIимунийну, министерствалул дуллай бур жагьилтурал сиптардацIун кабакьаврил, хъиривлаявурттал, ахттар бавурттал давуртту ва мукунна экстремизмалийн информациялул ххуллий къарши буккаврил давуртту. Министрнал бувсунни форумирттай дуллалисса давурттая, «Мюхчаншиврул Интернет» тIисса проект дузрайн дуккан даврил, вузирдаву, сузирдаву семинарду баврил, жагьилтурал экстремизмалул ва терроризмалул иширттал масъаларттан хасъсса видеоматериаллу дурну, ми илданийх ппив даврил давурттая.
БатIаврий махъ лавхъунни мукунма ДР-лул виваллил иширттал министрнал кIанайма Дмитрий Гутырял.
Масъала ххал бигьаврил хIасиллу дуллалисса махъгу лавхъун, цаппара тапшурлугъругу дурунни Владимир Васильевлул.
