ДР-лул БакIчинал дагъусттанлувтурахь АьФ-лул ПаччахIлугърал ттугълил Кьини барча даву

ХIурмат ххисса дагъусттанлувтал!
Аьрасатнал ттугъ хъана­хъиссар жула Ватандалул ца яла бюхттулмур лишанну, мунил ккаккан буллалиссар кьуват бусса ва цинявннан ца­сса паччахIлугъ уттара дуркшиву, халкьуннал чувшиву ва лагма лагаву, кувннал кув бугьаву, чIярусса никирттал цIанихшиву, машгьуршиву.

Жула билаятрал цIакь буллалиссар дунияллий цила бувгьу­сса кIану, дакI дарцIуну, кьянкьану дуручлай суверенитет ва национал мурадру.
Цинявннан дакIнийссар ванияр 20 шинал хьхьичI дагъус­ттанлувтал гьаз хьуну бивкIшиву Ватан дуруччин. ДацIан дурссар дунияллул халкьуннал дянивсса террористурал кьюкьри ва сахла дурссар Аьрасатнал цашиву.

ХIакьину шанна ранг ду­сса ттугълил цачIун буллай бур миллионну аьрасатлувтурал, билаятрал ялун бучIантIимунил цIаний миннал буллалисса хIарачат.
Ва шадлугърал кьини гьарца ялапарчинан чIа тIий ура цIуллушиву ва тIайлабацIуртту Дагъусттаннал ва Аьрасатнал хъиншивурттал цIаний.

Дагъусттан Республикалул БакIчи В. Васильев

ХIадур бувссар
ПатIмат Шихшаевал